ନୟାଗଡ଼ ଅଫିସ,୧୨।୪: ନୟାଗଡ଼ ଜିଲାର ଅଧିକାଂଶ ପେଟ୍ରୋଲ ପମ୍ପରେ ଅପମିଶ୍ରିତ ତେଲ ବିକ୍ରି ହେଉଥିଲେ ହେଁ ଧରପଗଡ କରାଯାଉନି। ସେହିପରି ଅନ୍ୟାନ୍ୟ ସୁବିଧା ସୁଯୋଗ ମିଳୁନି ବୋଲି ଅଭିଯୋଗ ରହିଛି। ଜିଲାରେ ପେଟ୍ରୋଲ ପମ୍ପ କର୍ତ୍ତୃପକ୍ଷ ସରକାରୀ ନିୟମକୁ ଫୁ କରି ଉଡାଇ ଦେଉଛନ୍ତି। ଗ୍ରାହକଙ୍କୁ ଆନୁଷଙ୍ଗିକ ସୁବିଧା ନ ଯୋଗାଇ କେବଳ ପେଟ୍ରୋଲ ଓ ଡିଜେଲ ବିକ୍ରି କରି ରୋଜଗାର କରିବାରେ ଲାଗି ପଡିଛନ୍ତି। ଗ୍ରାହକ ସୁବିଧା ପାଇଲା କି ନାହିଁ ତଦାରଖ ହେଉନି। ପମ୍ପରେ ଗ୍ରାହକଙ୍କ ପାଇଁ କ’ଣ କ’ଣ ସୁବିଧା ରହିଛି ସେନେଇ ପ୍ରଶାସନ ପକ୍ଷରୁ ମଧ୍ୟ ସଚେତନତା କରାଯାଉନାହିଁ। ଜିଲାର ସଦର ମହକୁମାରେ ସେବା ମିଳୁ ନ ଥିବାବେଳେ ଗ୍ରାମାଞ୍ଚଳ ଓ ଅନ୍ୟ ସହରରେ ଅବ୍ୟବସ୍ଥା ଅଧିକ। ଏଭଳିସ୍ଥିତିରେ ଜିଲାର ବିଭିନ୍ନସ୍ଥାନରେ ଗଢ଼ି ଉଠିଥିବା ପେଟ୍ରୋଲ ପମ୍ପର ସ୍ଥିତିକୁ ଅନୁଧ୍ୟାନ କଲେ ଖାଉଟି ସୁରକ୍ଷା ଆଇନ ଅପହଞ୍ଚ ହୋଇରହିଛି ।
ଅଭିଯୋଗ ରେଜିଷ୍ଟର ନାହିଁ
ପେଟ୍ରୋଲ ପମ୍ପରେ ଅଭିଯୋଗ ରେଜିଷ୍ଟର ରଖିବାକୁ ନିୟମ ରହିଛି। ହେଲେ ଜିଲାର କୌଣସି ପେଟ୍ରୋଲ ପମ୍ପରେ ଏହି ସୁବିଧା ନାହିଁ। ଏହାକୁ ପମ୍ପରେ ରଖିଲେ ଗ୍ରାହକ କ’ଣ ଅସୁବିଧାର ସମ୍ମୁଖୀନ ହେଲେ, ସେବା ପାଇଲେ କି ନାହିଁ ସେନେଇ ଉଲ୍ଲେଖ କରି ପାରନ୍ତେ। ତେଲ କମ୍ପାନୀ କର୍ତ୍ତୃପକ୍ଷ ଏହାର ଯାଞ୍ଚ କରି ଗ୍ରାହକଙ୍କୁ ସେବା ଯୋଗାଇବାକୁ ପଦକ୍ଷେପ ନେବାକୁ ପରାମର୍ଶ ଦିଅନ୍ତେ। ତେବେ ଗ୍ରାହକଙ୍କ ଅଭିଯୋଗ ପାଇଁ ବ୍ୟବସ୍ଥା ରଖିଲେ ଠକେଇ କରିବାରେ ଅସୁବିଧା ହେବ। ଏଣୁ ଏ ଦିଗକୁ କେହି ଚିନ୍ତା କରୁ ନ ଥିବା ଅଭିଯୋଗ ରହିଛି।
ଖରାଦିନେ ବି ପାନୀୟ ଜଳ ମିଳୁନି
ପେଟ୍ରୋଲ ପମ୍ପରେ ପାନୀୟ ଜଳ ସୁବିଧା ଯୋଗାଇବାର ବ୍ୟବସ୍ଥା ନିଶ୍ଚିତ ରହିବା ଦରକାର। କେତେଗୋଟି ସ୍ଥାନରେ ପାନୀୟ ଜଳ ସୁବିଧା ରହିଛି। ହେଲେ ଏହା ପେଟ୍ରୋଲ ପମ୍ପ କର୍ମଚାରୀଙ୍କ ପାଇଁ ଉଦ୍ଦିଷ୍ଟ। ଗ୍ରାହକଙ୍କ ପାଇଁ ଏହି ସୁବିଧା ଅନେକ ପମ୍ପରେ ନାହିଁ। ଖରାଦିନେ ବି ପାନୀୟଜଳ ମିଳୁନି। ସେହିଭଳି କିଛି ପେଟ୍ରୋଲ ପମ୍ପରେ ଅଗ୍ନି ନିରାପତ୍ତା ବ୍ୟବସ୍ଥା ନାହିଁ। ଯାହା ଅଛି ତାହା କାମ କରୁନି।
ପ୍ରେସର ଚେକ୍ ଫାର୍ସ
ପେଟ୍ରୋଲ ପମ୍ପରେ ଗାଡି ଚକା ପ୍ରେସର ଚେକ୍ ବ୍ୟବସ୍ଥା ବାଧ୍ୟତାମୂଳକ। ପେଟ୍ରୋଲ ଓ ଡିଜେଲ ପକାଉଥିବା ଗାଡି ଚାଳକମାନେ ମାଗଣାରେ ପ୍ରେସର ଚେକ୍ କରିପାରିବେ। ତେବେ ଅଧିକାଂଶ ପେଟ୍ରୋଲ ପମ୍ପରେ ପ୍ରେସର ଦେବା ମେଶିନ ନାହିଁ। କାଁ ଭାଁ ସ୍ଥାନରେ ବ୍ୟବସ୍ଥା ରହିଛି ସତ, ହେଲେ କର୍ମଚାରୀ ନିୟୋଜିତ ନାହାନ୍ତି। କେଉଁଠି କେବଳ ନାମକୁ ମାତ୍ର ପ୍ରେସର ଚେକ୍ ମେଶିନ ରଖାଯାଇ ଖରାପ ଅଛି ବୋଲି ସଫେଇ ଦିଆଯାଉଛି।
ବିଲ୍ ମିଳୁନି
ପେଟ୍ରୋଲ ପମ୍ପରେ ତେଲ ପକାଇଲେ ବିଲ୍ ଦିଆଯାଉନାହିଁ। ବିଲ୍ ମାଗିଲେ ହାତ ଲେଖା ବିଲ୍ ବହୁ ସମୟ ଅପେକ୍ଷା ପରେ ଧରାଉଛନ୍ତି। ଅଧିକାଂଶ ପେଟ୍ରୋଲ ପମ୍ପରେ ହାତଲେଖା ବିଲ୍ ମିଳୁ ନ ଥିବାବେଳେ କମ୍ପ୍ୟୁଟର ବିଲ୍ ପାଇବା ଆଶା ରଖିବା ନିରର୍ଥକ। ତେଲ ପକାଉଥିବା ଚାଳକ ଗୋଟିଏ ମାଗଣା ଟେଲିଫୋନ କରିବାର ସୁବିଧା ରହିଛି। ଏହି ସୁବିଧା ଜିଲାରେ ଆଦୌ କୌଣସି ପେଟ୍ରୋଲ ପମ୍ପରେ ନାହିଁ। ଶୌଚାଳୟ ସୁବିଧା ୯୫ ପ୍ରତିଶତ ସ୍ଥାନରେ ନାହିଁ। କେତେକ ସ୍ଥାନରେ ଏହା ରହିଥିଲେ ମଧ୍ୟ ତାହା କର୍ମଚାରୀଙ୍କ ପାଇଁ ଉଦ୍ଦିଷ୍ଟ ବୋଲି କୁହାଯାଉଛି। ଏ ନେଇ ଜିଲା ଖାଉଟି ମଞ୍ଚ ସଭାପତି ଶୂନ୍ୟଜୟୀ ମିଶ୍ର କୁହନ୍ତି, ସରକାରୀ ନୀତିନିୟମକୁ ଜିଲାର କୌଣସି ପେଟ୍ରୋଲ ପମ୍ପ କର୍ତ୍ତୃପକ୍ଷ ମାନୁନାହାନ୍ତି। ଅଭିଯୋଗ କଲେ ଉତ୍ତର ମିଳୁଛି ଗ୍ରାହକଙ୍କୁ ଆନୁଷଙ୍ଗିକ ସେବା ଯୋଗାଇବାକୁ ଆମକୁ କିଛି ନିର୍ଦ୍ଦେଶ ନାହିଁ। ଜିଲା ଖାଉଟି ମଞ୍ଚରେ ଏ ନେଇ ଅଭିଯୋଗ ରଖିଲେ ସୁଫଳ ମିଳୁନି। ଦର୍ପନାରାୟଣପୁରର ଚନ୍ଦନ ରାଉତରା ନାମକ ଜଣେ ଗ୍ରାହକଙ୍କ ଅଭିଯୋଗ ଅନୁସାରେ, ଅତର୍କିତ ଭାବେ ପେଟ୍ରୋଲ ପମ୍ପରେ ଚଢ଼ାଉ କରାଯାଉନି; ଯାହାଦ୍ୱାରା ସେମାନେ ଗ୍ରାହକଙ୍କୁ ଭୁଆଁ ବୁଲାଉଛନ୍ତି। ଅପମିଶ୍ରଣ ପେଟ୍ରୋଲ, ଡିଜେଲ ପକାଇ ଲାଭବାନ ହେଉଛନ୍ତି। ଜିଲାପାଳ ଏ ଦିଗରେ ଦୃଷ୍ଟି ଦେଲେ ଗ୍ରାହକ ଉପକୃତ ହୋଇପାରନ୍ତେ ବୋଲି ସେ କହିଛନ୍ତି।
