ଧର୍ମଶାଳା,୧୫ା୧୧(ଡି.ଏନ.ଏ.): ଚଣ୍ଡିଖୋଲଠାରୁ ଭଦ୍ରକ ପର୍ଯ୍ୟନ୍ତ ୧୬ ନଂ. ଜାତୀୟ ରାଜପଥର ସମ୍ପ୍ରସାରଣ କାର୍ଯ୍ୟ ଚାଲିଛି। ତେବେ ଏହି କାର୍ଯ୍ୟ କରୁଥିବା ଠିକାସଂସ୍ଥା ମନ୍ଥର ଗତିରେ କାମ କରୁଥିବା ନେଇ ଅସନ୍ତୋଷ ପ୍ରକାଶ ପାଇଛି। ରାଜପଥର ଧର୍ମଶାଳା ବ୍ଲକ ଜାରକାଠାରେ ଏକ ଫ୍ଲାଇ ଓଭର ସାଙ୍ଗକୁ ବାଇପାସ୍ ରାସ୍ତା କଡ଼ରେ ଡ୍ରେନ ନିର୍ମାଣ କାର୍ଯ୍ୟ ବହୁ ବିଳମ୍ବ ହେଉଥିବା ଦେଖିବାକୁ ମିଳିଛି। ଦେଢ଼ ବର୍ଷ ହେଲା ଜାରକା ଛକରେ ଫ୍ଲାଇ ଓଭର ନିର୍ମାଣ କାର୍ଯ୍ୟ ଚାଲିଛି। ହେଲେ ଏହା ଅଦ୍ୟାବଧି ଶେଷ ହୋଇ ପାରିନାହିଁ। ଫଳରେ ଜାରକା ଛକର ଉଭୟ ପାର୍ଶ୍ୱରେ ଥିବା ବାଇପାସ ରାସ୍ତାରେ ବ୍ୟାପକ ଗାଡ଼ି ଚଳାଚଳ କରୁଥିବାରୁ ତାହା ଖାଲଖମାରେ ଭର୍ତ୍ତି ହୋଇଗଲାଣି। ଏଠାରେ ଏହି ୧ କିମି ବାଇପାସ ରାସ୍ତା ଅତିକ୍ରମ କରିବାକୁ ଗାଡ଼ିଗୁଡିକୁ ୩୦ମିନିଟରୁ ଊର୍ଦ୍ଧ୍ୱ ଲାଗୁଛି। ତେଣେ ବାଇପାସ୍ ରାସ୍ତା କଡ଼ରେ ଡ୍ରେନ କାର୍ଯ୍ୟ ଅଧା ପନ୍ତରିଆ ଥିବାରୁ ରାସ୍ତା ସଂକୁଚିତ ହୋଇ ଗାଡ଼ି ଚଳାଚଳରେ ବାଧା ଉପୁଜୁଛି। ସେହିପରି ଡ୍ରେନ୍ଗୁଡିକ ଆବଶ୍ୟକତାଠାରୁ ଅଧିକ ଉଚ୍ଚ କରିବା ଫଳରେ ଦୋକାନୀ ନିଜର ବ୍ୟବସାୟ ହରାଇବାକୁ ବସିଛନ୍ତି।
ଅନ୍ୟପଟେ ଏଠାକାର ଜନପ୍ରତିନିଧି ଓ ତହସିଲ ପ୍ରଶାସନ ସହ ଠିକା ସଂସ୍ଥାର ମଧୁ ଚନ୍ଦ୍ରିକା ଯୋଗୁ କାମ ବିଳମ୍ବ ହେଉଥିଲେ ବି କେହି ପ୍ରତିବାଦ କରୁ ନ ଥିବା ଅଭିଯୋଗ ହୋଇଛି। ଠିକା ସଂସ୍ଥା ପ୍ରତି କୌଣସି ଲଗାମ ନ ଥିବା ଯୋଗୁ ଉକ୍ତ ସଂସ୍ଥା ନିଜ ମନମାନିରେ କାମ କରୁଥିବା ଲୋକେ ଅଭିଯୋଗ କରିଛନ୍ତି। ସମ୍ପ୍ରସାରଣ କାର୍ଯ୍ୟ ଯୋଗୁ ପ୍ରତ୍ୟେକ ଦିନ ଏଠାରେ ଛୋଟ ବଡ଼ ଦୁର୍ଘଟଣା ଘଟୁଛି। ଫଳରେ ରାସ୍ତା ଉପରେ ଘଣ୍ଟାଘଣ୍ଟା ଧରି ଗାଡ଼ିଗୁଡ଼ିକ ଠିଆ ହୋଇରହୁଛି। ତେବେ ଜାତୀୟ ରାଜପଥର କାର୍ଯ୍ୟ ଯଦି ଏଭଳି ଚାଲିଛି ତେବେ ରାଜ୍ୟରେ ଗ୍ରାମ୍ୟ ରାସ୍ତା ନିର୍ମାଣ କାର୍ଯ୍ୟ କିଭଳି ଚାଲିଥିବା ତାହା ଏଥିରୁ ସହଜରେ ଅନୁମେୟ। ରାସ୍ତା ନିର୍ମାଣ ଦାୟିତ୍ୱରେ ଥିବା ସମ୍ପୃକ୍ତ ଠିକା ସଂସ୍ଥାକୁ ପ୍ରଶାସନ ପକ୍ଷରୁ ଦାଗିଦ କରା ନ ଗଲେ ଏହି କାର୍ଯ୍ୟ ସମାପ୍ତ ହେବାକୁ ଆହୁରି ୧ ବର୍ଷ ଲାଗିବ ବୋଲି ସାଧାରଣରେ ଆଲୋଚନା ହେଉଛି। ତେଣୁ ଏ ଦିଗରେ ଯାଜପୁର ଜିଲାପାଳ ଦୃଷ୍ଟି ଦେବାକୁ ଧର୍ମଶାଳା ଅଞ୍ଚଳର ଜନସାଧାରଣ ଦାବି କରିଛନ୍ତି। ଜିଲାପାଳ ଦୃଷ୍ଟି ନ ଦେଲେ ଲୋକେ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛନ୍ତି। ଏ ସମ୍ପର୍କରେ ପ୍ରତିକ୍ରିୟା ପାଇଁ ସମ୍ପୃକ୍ତ ଠିକା ସଂସ୍ଥାକୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ପାରିନାହିଁ।
