ନିମାପଡ଼ା,୫ା୭(ଡି.ଏନ୍.ଏ.): ନିମାପଡ଼ା ଜଳସମ୍ପଦ ବିଭାଗ ଡିଭିଜନ ଅନ୍ତର୍ଗତ କାକଟପୁର ସବ୍ଡିଭିଜନର କାକଟପୁର ମା’ ମଙ୍ଗଳା ମନ୍ଦିର ନିକଟରେ ୨୦କୋଟି ଟଙ୍କା ବ୍ୟୟରେ ପ୍ରାଚୀ ନଦୀ ଉପରେ ଏକ ନୂତନ ବ୍ୟାରେଜ ନିର୍ମାଣ କାର୍ଯ୍ୟ ସମ୍ପନ୍ନ ହୋଇଛି। ଏହି ବ୍ୟାରେଜ ନିର୍ମାଣ ହେବା ଦ୍ୱାରା କାକଟପୁରରେ ବର୍ଷା ଓ ବନ୍ୟାଜଳ ପ୍ରବେଶ କରିପାରିବ ନାହିଁ। ଏଥିସହ ଚାଷକ୍ଷେତ୍ରରେ ଚାଷୀମାନେ ବହୁତ ଉପକୃତ ହୋଇପାରିବେ ବୋଲି ନିମାପଡ଼ା ଜଳସମ୍ପଦ ଡିଭିଜନର ନିର୍ବାହୀ ଯନ୍ତ୍ରୀ ଶଶିଭୂଷଣ ମିଶ୍ର କହିଛନ୍ତି। ଅନ୍ୟପକ୍ଷେ ଦେବୀ ନଦୀର ଦକ୍ଷିଣପାର୍ଶ୍ୱ ୧୭କି.ମି. ନଦୀବନ୍ଧର ସୁଦୃଢ଼ୀକରଣ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି। ଏହି କାର୍ଯ୍ୟ ସମ୍ପନ୍ନ ହେଲେ ବନ୍ୟାଦାଉରୁ ଦେବୀ ନଦୀର ତଟବର୍ତ୍ତୀ ଅଞ୍ଚଳର ଲୋକେ ରକ୍ଷାପାଇପାରିବେ। ମୁଖ୍ୟ କଥା ହେଲା ସହନ-ବଳଭଦ୍ରପୁରରେ ସାଢ଼େ ୭କିମି, କୁହୁଡି-ପଇଚଳିଆ ୩କିମି, ଉକୁଳେଇ-ଅସ୍ତରଙ୍ଗ ଅଢ଼େଇ କିମି, ଝାଡ଼ଲିଙ୍ଗ-ବେଳଙ୍ଗରେ ୨୨କିମି ବିଶିଷ୍ଟ ଲୁଣାଘେରି ବନ୍ଧର ସୁଦୃଢ଼ୀକରଣ କାର୍ଯ୍ୟ ଚାଲିଛି। ଏହି ନିର୍ମାଣ କାର୍ଯ୍ୟ ଖୁବ୍ଶୀଘ୍ର ତ୍ୱରାନ୍ବିତ ହେବ ବୋଲି ନିର୍ବାହୀଯନ୍ତ୍ରୀ ଶଶିଭୂଷଣ ମିଶ୍ର ସୂଚନା ଦେଇଛନ୍ତି। ନିର୍ମିତ ହେଉଥିବା ଲୁଣା ଘେରିବନ୍ଧରେ ୩୪ଟି ସ୍ଲୁଇସ୍ ଗେଟ୍ ଜଳସମ୍ପଦ ବିଭାଗ ପକ୍ଷରୁ ନିର୍ମାଣ କରାଯାଇଥିବାବେଳେ ଘେରିବନ୍ଧ ଉପରେ ଗମନାଗମନ ପାଇଁ ପକ୍କା ସଡ଼କର ନିର୍ମାଣ କାର୍ଯ୍ୟ ମଧ୍ୟ ଚାଲିଛି। ଏହି କାର୍ଯ୍ୟ ଖୁବ୍ଶୀଘ୍ର ସମ୍ପନ୍ନ ହେବ ବୋଲି ନିର୍ବାହୀ ଯନ୍ତ୍ରୀ ମିଶ୍ର କହିଛନ୍ତି।
