କେସିଙ୍ଗା,୨୭ା୪(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅଧୀନସ୍ଥ ଶିରୋଲସ୍ଥିତ ରାଜସ୍ବ ନିରୀକ୍ଷକ କାର୍ଯ୍ୟାଳୟ ପଛପଟରେ ସ୍ବାସ୍ଥ୍ୟ ବିଭାଗର ଏନ୍ଆର୍ଏଚ୍ଏମ୍ ଦ୍ୱାରା ୫୫ଲକ୍ଷ ବ୍ୟୟ ଅଟକଳରେ ଉପସ୍ବାସ୍ଥ୍ୟକେନ୍ଦ୍ର କେସିଙ୍ଗାର ଜନୈକ ଠିକାଦାରଙ୍କ ଦ୍ୱାରା ନିର୍ମାଣ ଚାଲିଛି। ଉକ୍ତ କେନ୍ଦ୍ରର ଫାଉଣ୍ଡେଶନଠାରୁ ଛାତର ସ୍ଲାପ କାର୍ଯ୍ୟ ଶେଷ ହୋଇଥିଲେ ମଧ୍ୟ ନିମ୍ନମାନର କାମ କରାଯାଉଥିବାରୁ ଗ୍ରାମବାସୀ ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି। ଏହି ଉପସ୍ବାସ୍ଥ୍ୟକେନ୍ଦ୍ର ନିର୍ମାଣ ପୂର୍ବରୁ ବିଦ୍ୟୁତ୍ ସଂଯୋଗ କରିବା କଥା, ନଳକୂପ ଖନନ କରାଯାଇଛି, କିନ୍ତୁ ବିଦ୍ୟୁତ ସଂଯୋଗ କରାଯାଇ ନାହିଁ। ସ୍ଥାନୀୟ ରାଜସ୍ବ ନିରୀକ୍ଷକ କାର୍ଯ୍ୟାଳୟରୁ ବିଦ୍ୟୁତ୍ ଚୋରାରେ ସଂଯୋଗ କରି ନିର୍ମାଣ କାମରେ ଚୋରାରେ ପାଣି ଦିଆଯାଉଛି। ଆଜକୁ ଛାତ ପଡ଼ି ୧୦ ଦିନ ବିତି ଯାଇଥିଲେ ସୁଦ୍ଧା ଉକ୍ତ ଉପସ୍ବାସ୍ଥ୍ୟକେନ୍ଦ୍ରରେ ପାଣି ସିଞ୍ଚନ କରାଯାଇ ନ ଥିବାରୁ ଗ୍ରାମବାସୀ ପ୍ରକାଶ କରିଛନ୍ତି।
ସ୍ଥାନୀୟ ସରପଞ୍ଚ, ଓ୍ବାର୍ଡ୍ମେମ୍ବରଙ୍କ ଅଜାଣତରେ ନିର୍ମାଣ କାର୍ଯ୍ୟ ଚାଲିଥିବାରୁ ପଞ୍ଚାୟତରେ ଅସନ୍ତୋଷ ପ୍ରକାଶ ପାଉଛି। ପ୍ରଚଣ୍ଡ ଗ୍ରୀଷ୍ମପ୍ରବାହରେ ୫୫ଲକ୍ଷ ବ୍ୟୟ ଅଟକଳରେ ନିର୍ମାଣ ଉପସ୍ବାସ୍ଥ୍ୟକେନ୍ଦ୍ରରେ ପାଣି ସିଞ୍ଚନ କରାଯାଉନାହିଁ। ଫଳରେ କିଛି ଦିନ ପରେ ଉପସ୍ବାସ୍ଥ୍ୟକେନ୍ଦ୍ରରେ ଫାଟ ସୃଷ୍ଟି ହେବାର ସମ୍ଭାବନା ରହିଛି। ନିମ୍ନମାନର ସିମେଣ୍ଟ, ଲୁହା ରଡ୍ ଏଠାରେ ବ୍ୟବହାର କରାଯାଇଛି। ଠିକାଦାର ଓ ମୁନ୍ସି ଦ୍ୱାରା କାମ ଚାଲିଛି। କେତେବେଳେ କେମିତି ବିଭାଗୀୟ ଜେଇ ଭବାନୀପାଟଣା ଆସି ଦେଖି ପଳାଇ ଯାଆନ୍ତି।
ଏ ସଂକ୍ରାନ୍ତରେ ସ୍ଥାନୀୟ ସରପଞ୍ଚ ଝରଣା ବାଗଙ୍କୁ ପଚାରିବାରୁ ମୋ’ ପଞ୍ଚାୟତରେ ଉପସ୍ବାସ୍ଥ୍ୟକେନ୍ଦ୍ର ହେଉଛି ଅଥଚ ମୋତେ କେହି ବି ସୂଚନା ଦେଇ ନାହାନ୍ତି। ବିନା ସୂଚନାଫଳକରେ କାମ ଚାଲିଥିବାରୁ ପଞ୍ଚାୟତ ପକ୍ଷରୁ ତଥା ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଏ ନେଇ ଏନ୍ଆର୍ଏଚ୍ଏମ୍ର ଜଣେ ଅଧିକାରୀ ପି.କେ ଦାଶ ଙ୍କୁ ପଚାରିବାରୁ ମୋତେ କେହି ଅଭିଯୋଗ କରି ନାହାନ୍ତି, ଏହି ଉପସ୍ବାସ୍ଥ୍ୟକେନ୍ଦ୍ର ୫୫ଲକ୍ଷ ବ୍ୟୟ ଅଟକଳ କାମ ଚାଲିଛି, ମୁଁ ତଥାପି ତଦନ୍ତ କରି ଠିକ୍ ଭାବେ କାମ କରିବାକୁ ଠିକାଦାରଙ୍କୁ ପରାମର୍ଶ ଦେବି ବୋଲି କହିଥିଲେ।
