ପଟ୍ଟାମୁଣ୍ଡାଇ,୪ା୩(ସ୍ବ.ପ୍ର.): ପଟ୍ଟାମୁଣ୍ଡାଇ ବାଇପାସ ପାଖରୁ ବାହାରିଥିବା ପଟ୍ଟାମୁଣ୍ଡାଇ-ରାଜନଗର ଉତିକଣ ଘେରି ବନ୍ଧ ପୁରୁଣା ରାସ୍ତା ଅଞ୍ଚଳବାସୀଙ୍କ ପାଇଁ ଗୁରୁତ୍ୱ ବହନ କରେ। ରାସ୍ତା ନିର୍ମାଣ ଶେଷ ହୋଇ ନ ଥିବା ବେଳେ ପିଚୁ ଉଠି ଯାଉଛି। କୋଟି କୋଟି ଟଙ୍କାର ରାସ୍ତା ନିର୍ମାଣ କାର୍ଯ୍ୟରେ ଜାଲିଆତିର ଗନ୍ଧ ବାରି ହୋଇପଡିଛି। କାମ ଆରମ୍ଭରୁ ବିଭ୍ରାଟ ଦେଖାଦେଇଥିବା ବେଳେ ବିଭାଗୀୟ କର୍ତ୍ତୃପକ୍ଷଙ୍କ ଉଦାସୀନତାକୁ ନେଇ ସ୍ଥାନୀୟ ଜନସାଧାରଣଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇ ଆସୁଛି। ଏବେ ନଦୀବନ୍ଧରୁ ୫ ଫୁଟ ମାଟି କାଟି ନେଇ ରାସ୍ତା ନିର୍ମାଣ କରାଯାଉଥିବା ଅଭିଯୋଗ ହୋଇଛି। ଏହି ବନ୍ଧ କାର୍ଯ୍ୟ ୨ ବର୍ଷ ତଳେ କରାଯାଇଥିଲା। ଏ ନେଇ କାମ ବନ୍ଦ ଆନ୍ଦୋଳନ, ପୂର୍ତ୍ତ ବିଭାଗ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଆଦି ଅନୁଷ୍ଠିତ ହୋଇସାରିଛି। ତେବେ ପ୍ରଶସ୍ତୀକରଣ ଓ ସୁଦୃଢ଼ୀକରଣ କାର୍ଯ୍ୟ ଠିକ୍ ଭାବେ କରାଯିବ ବୋଲି ବିଭାଗୀୟ କର୍ତ୍ତୃପକ୍ଷ ବାରମ୍ବାର ପ୍ରତିଶ୍ରୁତି ଦେଇ ଆସୁଥିଲେ ହେଁ ତାହା ପାଳନ କରାଯାଉନାହିଁ।
ଉତିକଣ ସଂଗ୍ରାମ ପରିଷଦର ଆବାହକ ପ୍ରଶାନ୍ତ ମହାନ୍ତି, ବିଚିତ୍ର ସେନାପତି, ଅର୍ଜ୍ଜୁନ ସାହୁ, ରଞ୍ଜିତ ସେନାପତି, ରମାକାନ୍ତ ଦାସ, ବୁଟୁନା ପଣ୍ଡା, ପ୍ରଦୀପ ପଣ୍ଡା, ନିରଞ୍ଜନ ଦାସ, ବୃନ୍ଦାବନ ପରିଡା, ସର୍ବେଶ୍ୱର ସେଠୀ, ପ୍ରଶାନ୍ତ ସାହୁ ପ୍ରମୁଖ କୁହନ୍ତି, କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ପୂର୍ତ୍ତ ବିଭାଗ ସବ୍ଡିଭିଜନ ପକ୍ଷରୁ ପଟ୍ଟାମୁଣ୍ଡାଇଠାରୁ ମଦନପୁର ପର୍ଯ୍ୟନ୍ତ ୧୫ କିମି ରାସ୍ତା ୨୧,୧୭, ୭୯,୪୨୩ ଟଙ୍କାରେ କାର୍ଯ୍ୟ କରାଯାଇଛି। ତେବେ କାର୍ଯ୍ୟରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ଆଣି ଉତିକଣ ସଂଗ୍ରାମ ପରିଷଦ ପକ୍ଷରୁ ବର୍ଷେ ହେବ ଆନ୍ଦୋଳନ ଚାଲିଛି। ନିର୍ମାଣାଧୀନ ରାସ୍ତା କାର୍ଯ୍ୟ ଶେଷ ହେବା ପୂର୍ବରୁ ପିଚୁ ଉଠିଯାଇଛି। କେନ୍ଦ୍ରାପଡ଼ାର ଏକ ଠିକା ସଂସ୍ଥା ଏହାର ନିର୍ମାଣ ଦାୟିତ୍ୱ ନେବା ପରେ କାର୍ଯ୍ୟ କରିଥିଲା। ସମ୍ପୃକ୍ତ ଠିକା ସଂସ୍ଥା ପୁରୁଣା ରାସ୍ତା ଉପରେ ପିଚୁ ମିଶା ବଜୁରି ପକାଇ ରୋଲିଂ କରି ଛାଡି ଦେଇଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ବର୍ତ୍ତମାନ ବିଭିନ୍ନ ସ୍ଥାନରୁ ପିଚୁ ଉଠିଯିବାରୁ ସଂଗ୍ରାମ ପରିଷଦ ପକ୍ଷରୁ କାର୍ଯ୍ୟାନୁଷ୍ଠାନ ଦାବି କରାଯାଇଛି। ଏ ସମ୍ପର୍କରେ ପଦକ୍ଷେପ ନିଆ ନ ଗଲେ ରାଜରାସ୍ତାକୁ ଓହ୍ଲାଇବାକୁ ଉତିକଣ ସଂଗ୍ରାମ ପରିଷଦ ଓ ଜନସାଧାରଣ ଚେତାବନୀ ଦେଇଛନ୍ତି। ରାସ୍ତା ଦାଢରେ ଥିବା ବହୁ ମୂଲ୍ୟବାନ ଗଛକୁ କଟା ଯାଇଥିବା ବେଳେ ବନ ବିଭାଗ ପକ୍ଷରୁ କୌଣସି ସୂଚନା ରହିନାହିଁ। ଏପଟେ ସରକାରଙ୍କ ବନୀକରଣ ଚାଲିଥିବା ବେଳେ ସେପଟେ କଞ୍ଚାଗଛ ଧ୍ୱଂସ ପାଉଛି। ନିମପୁରଠାରୁ ମଦନପୁର ପର୍ଯ୍ୟନ୍ତ କୌଣସିଠାରେ ଖରାଦିନେ ଆଶ୍ରୟ ନେବାକୁ ଗଛ ରହିନାହିଁ। ଏହି କାର୍ଯ୍ୟକୁ ଠିକ୍ ଭାବେ କରିବାକୁ ନିକଟରେ ରାଜନଗର ବିଧାୟକ ଧ୍ରୁବ ସାହୁ ସ୍ଥାନୀୟ ଅଞ୍ଚଳର ସରପଞ୍ଚ ଓ ଖବରଦାତାମାନଙ୍କୁ ଡାକି ଏକ ତଦାରଖ କମିଟି ଗଠନ କରାଇଥିଲେ। ଏହାସତ୍ତ୍ୱେ ବି ନିମ୍ନମାନର କାର୍ଯ୍ୟ ଚାଲିଛି। ଏହି କାମ ପାଇଁ ଗାର୍ଡୱାଲ ଭୁଶୁଡି ପଡିବ। ରାସ୍ତା ମଧ୍ୟ ପିଚୁରେ ଗାଡି ଦବିଯିବା, ଫୁଟ୍ପାଥ ନିର୍ମାଣ ନ କରିବା, ରାସ୍ତାରେ ଥିବା ବିଦ୍ୟୁତ୍ ଖୁଣ୍ଟକୁ ଅପସାରଣ କରା ନ ଯିବା ଆଦି ଅଭିଯୋଗ ହୋଇଥିଲା। ଏବେ ଏହାସହ ଆଉ ଏକ ଫର୍ଦ୍ଦ ଯୋଡି ହୋଇଯାଇଛି। ୨୦୧୮ ମସିହାରେ ନାବାଡ଼ ଅନୁଦାନରେ ପଟ୍ଟାମୁଣ୍ଡାଇ ଜଳସମ୍ପଦ ବିଭାଗ ପକ୍ଷରୁ ଅଳଭାଠାରୁ ମଦନପୁର ପର୍ଯ୍ୟନ୍ତ ପ୍ରାୟ ୧୪ କୋଟି ଟଙ୍କା ବ୍ୟୟରେ ଉତିକଣ ବନ୍ୟା ବନ୍ଧ ବାମପାର୍ଶ୍ୱକୁ ଉଚ୍ଚା କରାଯାଇଥିଲା। ଏହି ବନ୍ଧର ଉନ୍ନତୀକରଣ କାର୍ଯ୍ୟ ହୋଇଥିଲା। ବର୍ତ୍ତମାନ ବ୍ରାହ୍ମଣୀ ବନ୍ୟା ବନ୍ଧ ପ୍ରଶସ୍ତୀକରଣ ଓ ସୁଦୃଢୀକରଣ କାର୍ଯ୍ୟ କରୁଥିବା ଠିକାଦାର ୨ ବର୍ଷ ତଳେ ନିର୍ମାଣ କରାଯାଇଥିଲା। ଉତିକଣ ବନ୍ୟା ବନ୍ଧ ପାର୍ଶ୍ୱରୁ ୫ ଫୁଟ ଓସାରରେ ଜେସିବି ଲଗାଇ ମାଟି ତାଡ଼ି ନିଆଯାଉଛି। ସେହିପରି ଜଳସମ୍ପଦ ବିଭାଗ ଅଧୀନରେ ଥିବା ଅଳଭା କେନାଲ ବନ୍ଧରୁ ମଧ୍ୟ ଠିକାଦାର ଜେସିବି ଲଗାଇ ମାଟି ତାଡ଼ି ନେଇଥିବା ଅଭଯୋଗ କରାଯାଇଛି। ଏ ସମ୍ପର୍କରେ ଜଳସମ୍ପଦ ବିଭାଗ କନିଷ୍ଠଯନ୍ତ୍ରୀ ମନୋରଞ୍ଜନ ସାହୁଙ୍କୁ ପଚାରିବାରୁ ବିଭାଗ ପକ୍ଷରୁ ପୂର୍ତ୍ତ ବିଭାଗକୁ ଚିଠି କରାଯାଇଛି, ହେଲେ ଏ ପର୍ଯ୍ୟନ୍ତ କୌଣସି ଉତ୍ତର ଆସିନାହଁି। ଏହି ବନ୍ଧର ଦକ୍ଷିଣ ପାର୍ଶ୍ୱରେ ଫୁଟପାଥ ପାଇଁ ପ୍ରଶସ୍ତୀକରଣ କାମ ଚାଲିଛି। ଏହାର ଦାୟିତ୍ୱରେ ଥିବା ଠିକାଦାର ବାହାରୁ ମାଟି ଆଣି ରାସ୍ତାପାର୍ଶ୍ୱରେ ନ ପକାଇ ବନ୍ୟା ବନ୍ଧକୁ ତାଡ଼ି ନେଉଛନ୍ତି। ଫଳରେ ନଦୀବନ୍ଧ ଦୁର୍ବଳ ହୋଇପଡୁଥିବାରୁ ଉତିକଣ ଅଞ୍ଚଳର ଲୋକ ଭୟଭୀତ ହୋଇପଡ଼ିଛନ୍ତି। ଏ ସଂକ୍ରାନ୍ତରେ ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ଅଶୋକ ଜେନାଙ୍କୁ ପଚାରିବାରୁ ବିଆର୍ଏଫ୍ଇ ରାସ୍ତା କାମ ଚାଲିଛି। ଯେଉଁଠି ଖରାପ ହୋଇଥିବା ଅଭିଯୋଗ ହେଉଛି ତାହାକୁ ପୁଣି କରାଯାଉଛି।
