ଭଦ୍ରକ ଅଫିସ,୧୬ା୧୧: ସେତୁ ପ୍ରଶସ୍ତୀକରଣ ପାଇଁ ଭଦ୍ରକ ସହରକୁ ସଂଯୋଗ କରୁଥିବା କୁଆଁସ ସ୍ଥିତ ଅର୍ଜୁନ ସେତୁକୁ ଭାଙ୍ଗି ଦିଆଗଲା। ନୂତନ ସେତୁ ନିର୍ମାଣ ପାଇଁ ଶିଳାନ୍ୟାସକୁ ପ୍ରାୟ ୧ ବର୍ଷ ବିତିଯାଇଥିଲେ ମଧ୍ୟ କାର୍ଯ୍ୟ ଅଧା ହୋଇନାହିଁ। ଏହାକୁ ନେଇ ସହରଠାରୁ ବିଚ୍ଛିନ୍ନ ହୋଇ ଦୁର୍ଦ୍ଦଶା ଭୋଗୁଥିବା ଲକ୍ଷାଧିକ ଜନ ସାଧାରଣ ଏବେ ଭଦ୍ରକ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀଙ୍କୁ ଘେରିବାକୁ ଯୋଜନା କରୁଥିବା ସୂଚନା ମିଳିଛି। ଭଦ୍ରକ ଥାନା ଛକ ନିକଟରେ ସାଳନ୍ଦୀ ନଦୀ ଉପରେ ନିର୍ମିିତ ଏହି ସେତୁ କେବେ ସମ୍ପୂର୍ଣ୍ଣ ହେବ ତାହାକୁ ନେଇ ଉଠିଛି ପ୍ରଶ୍ନବାଚୀ। ୨୦୨୩ ମାର୍ଚ୍ଚା ସୁଦ୍ଧା ଏହି ସେତୁ ନିର୍ମାଣ ଶେଷ କରିବାକୁ ନିର୍ଦ୍ଦେଶ ରହିଥିଲା। କାର୍ଯ୍ୟର ଅବଧି ସରିବାକୁ ୪ମାସ ବାକି ଥିବା ବେଳେ ଏହା ଭିତରେ କାର୍ଯ୍ୟ ସମ୍ପୂର୍ଣ୍ଣ ହେବାକୁ ନେଇ ସନ୍ଦେହ ସୃଷ୍ଟି ହୋଇଛି। କାର୍ଯ୍ୟରେ ଅହେତୁକ ବିଳମ୍ବ ହେଉଥିବାରୁ ସେତୁ ପାଇଁ ଆର୍ଥିକ ମଞ୍ଜୁରୀ ଦେଇଥିବା ବିଶ୍ୱବ୍ୟାଙ୍କ କର୍ତ୍ତୃୃପକ୍ଷ ମଧ୍ୟ ଗଭୀର ଚିନ୍ତା ପ୍ରକଟ କରିଛନ୍ତି। ରାଜନୈତିକ ଏବଂ ପ୍ରଶାସନିକ ତାଗିଦ ସତ୍ତ୍ୱେ ସେତୁ ନିର୍ମାଣକାରୀ ସଂସ୍ଥା କୁମ୍ଭକର୍ଣ୍ଣ ନିଦ୍ରାରେ ଶୋଇଛନ୍ତି। କୁଆଁସ- ଭଦ୍ରକ ସହରକୁ ସଂଯୋଗ କରିବା ପାଇଁ ସାଳନ୍ଦୀ ନଦୀ ଉପରେ ଗତ ପ୍ରାୟ ୧୫ ବର୍ଷ ତଳେ ତତ୍କାଳୀନ କେନ୍ଦ୍ର ଜଳସମ୍ପଦ ମନ୍ତ୍ରୀ ସ୍ବର୍ଗତ ଅର୍ଜୁନ ଚରଣ ସେଠୀଙ୍କ ସହଯୋଗ ଏବଂ ଆର୍ଥିକ ସହାୟତାରେ ଏଠାରେ ଅର୍ଜୁନ ସେତୁ ନାମରେ ଏକ କଂକ୍ରିଟ ସେତୁ ନିର୍ମାଣ କରାଯାଇଥିଲା। ଏହି ସେତୁ ନିର୍ମାଣ ପରେ କୁଅଁାସ ମୌଜା ସହିତ ସହରର ପୂର୍ବ ପାର୍ଶ୍ୱରେ ରହୁଥିବା ଲକ୍ଷାଧିକ ଲୋକ ସହରକୁ ଆସିବା ପାଇଁ ଉପକୃତ ହୋଇଥିଲେ। ୨୦୨୧ରେ ସେତୁ ପ୍ରଶସ୍ତୀକରଣ ନାମରେ କାର୍ଯ୍ୟକ୍ଷମ ଥିବା ସେତୁକୁ ଭାଙ୍ଗି ଦେଇ ନୂତନ ସେତୁର ଶିଳାନ୍ୟାସ କରାଯାଇଥିଲା। ସେତୁର ସମ୍ପୂର୍ଣ୍ଣୀକରଣ ପାଇଁ ବିଶ୍ୱବ୍ୟାଙ୍କ ଅନୁଦାନ ୬ କୋଟି ୭୬ ଲକ୍ଷ ଟଙ୍କା ବ୍ୟୟ ଅଟକଳରେ ଏହି ସେତୁର ଶିଳାନ୍ୟାସ କରାଯାଇଥିଲା। ସେତୁ ନାମକରଣକୁ ନେଇ ଦୁଇ ଗୋଷ୍ଠୀ ମଧ୍ୟରେ ମୁହଁାମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଗୋଟିଏ ଗୋଷ୍ଠୀ ନୂତନ ସେତୁକୁ ପୂର୍ବଭଳି ଅର୍ଜୁନ ସେତୁ ରଖିବାକୁ ଜିଦ୍ କରିଥିବା ବେଳେ ଅନ୍ୟ ଗୋଷ୍ଠୀ ଏହାକୁ କୁଆଁସ ଅଥବା କାନ୍ତକବି ଲକ୍ଷ୍ମୀକାନ୍ତ ମହାପାତ୍ରଙ୍କ ନାମରେ ନାମିତ କରିବାକୁ ଅଡ଼ି ବସିଥିଲେ। ପରିସ୍ଥିତି ଜଟିଳ ହେବାରୁ ଶେଷରେ ବିନା ନାମରେ ସେତୁ ଶିଳାନ୍ୟାସ କରା ଯାଇଥିଲା। ଯାହାକି ଅଦ୍ୟାବଧି ବିବାଦୀୟ ହୋଇ ରହିଛି। ସହରଠାରୁ ମାତ୍ର ୧୦୦ ମିଟର ଦୂରତାରେ ଥିବା କୁଅଁାସ ଅଞ୍ଚଳବାସୀଙ୍କୁ ସହରକୁ ଆସିବା ପାଇଁ ୨ କି.ମି.ରୁ ଊର୍ଦ୍ଧ୍ୱ ଦୂରତା ଅତିକ୍ରମ କରିବାକୁ ପଡୁଛି। ସ୍କୁଲ,କଲେଜକୁ ଆସୁଥିବା ଛାତ୍ରୀଛାତ୍ର, ଗୁରୁତର ରୋଗୀଙ୍କ ପାଇଁ ଯାତାୟାତରେ ସମସ୍ୟା ସୃଷ୍ଟି ହେଉଛି। ଏନେଇ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ପରମାନନ୍ଦ ବେହେରା କହିଛନ୍ତି, ନଦୀରେ ପାଣି ଅଧିକ ଥିବାରୁ ନିର୍ମାଣରେ ବିଳମ୍ବ ହେଉଥିବା ନିର୍ମାଣକାରୀ ସଂସ୍ଥା ଜଣାଇଛନ୍ତି। ପାଣି କମିବା ପରେ କାର୍ଯ୍ୟକୁ ତ୍ୱରାନ୍ନିତ କରାଯାଇ ଖୁବଶୀଘ୍ର ସମ୍ପୂର୍ଣ୍ଣ କରାଯିବାକୁ ଲକ୍ଷ୍ୟ ରଖାଯାଇଛି।
