ନୂଆଦିଲ୍ଲୀ,୧୪ା୧୨: କଂଗ୍ରେସ ସବୁବେଳେ ସମ୍ବିଧାନ ଅପେକ୍ଷା କ୍ଷମତାକୁ ବାଛିଆସିଛି। ଏପରି କି ସାମ୍ବିଧାନିକ ସଂସ୍ଥାଗୁଡ଼ିକର ସ୍ବାୟତ୍ତତାକୁ ମଧ୍ୟ ବିରୋଧୀ ଦଳ ବରଦାସ୍ତ ନ କରି ସିଦ୍ଧାନ୍ତଗୁଡ଼ିକୁ ଧ୍ୱଂସ କରିବାକୁ ଉଦ୍ୟମ ଚଳାଇଆସିଛି ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଶୁକ୍ରବାର ସମାଲୋଚନା କରିଛନ୍ତି। ସମ୍ବିଧାନର ୭୫ ବର୍ଷ ଯାତ୍ରା ସମ୍ପର୍କରେ ଲୋକ ସଭାରେ ୨ ଦିନିଆ ବିତର୍କର ଆରମ୍ଭକରି ବରିଷ୍ଠ ଭାଜପା ସଦସ୍ୟ ରାଜନାଥ କହିଛନ୍ତି, କଂଗ୍ରେସ ସମ୍ବିଧାନକୁ ନିଜ ଅବଦାନ ବୋଲି ଦର୍ଶାଇବା ସହ ଏହାର ପ୍ରଣୟନରେ ଅନ୍ୟ ଅନେକ ନେତାଙ୍କ ଭୂମିକାକୁ ଅସ୍ବୀକାର କରିଛି। ଅନେକ ବିରୋଧୀ ନେତା ସମ୍ବିଧାନକୁ ପକେଟରେ ପୂରାଇ ଏହାର ସୁରକ୍ଷା ଉପରେ ଭାଷଣ ଦେଉଛନ୍ତି। ବାସ୍ତବରେ ସେମାନେ ସମ୍ବିଧାନକୁ ପକେଟରେ ପୂରାଇବା ପିଲାବେଳୁ ନିଜ ପରିବାରରୁ ଶିଖିଛନ୍ତି ବୋଲି ଲୋକ ସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଉଦ୍ଦେଶ୍ୟରେ ରାଜନାଥ ତେରଛା ବାଣ ଛାଡ଼ିଛନ୍ତି। ଏହାର ଜବାବରେ ଓ୍ବାୟନାଡ୍ର କଂଗ୍ରେସ ଏମ୍ପି ପ୍ରିୟଙ୍କା ଗାନ୍ଧୀ ଭଦ୍ରା କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତୀୟ ସମ୍ବିଧାନକୁ ବୁଝିପାରି ନାହାନ୍ତି। ସେ ସଂଘର ସମ୍ବିଧାନକୁ ମାନନ୍ତି। ନିର୍ବାଚିତ ହେବା ପରେ ନିଜ ଆଦ୍ୟ ଭାଷଣରେ ପ୍ରିୟଙ୍କା ଆହୁରି କହିଛନ୍ତି, ଲୋକ ସଭା ନିର୍ବାଚନର ଫଳ ଝଟ୍କା ଦେଇ ନ ଥିଲେ ଶାସକ ଦଳ ସମ୍ବିଧାନକୁ ବଦଳାଇବା ଆରମ୍ଭ କରିସାରନ୍ତାଣି। ଗତ ୧୦ ବର୍ଷ ମଧ୍ୟରେ ଭାଜପା ନେତୃତ୍ୱାଧୀନ ଏହି ସରକାର ନ୍ୟାୟ, ଏକତା ଓ ଅଭିବ୍ୟକ୍ତି ସ୍ବାଧୀନତାର ‘ସୁରକ୍ଷା କବଚ’କୁ ଭାଙ୍ଗିଦେବା ପାଇଁ ସବୁ ପ୍ରକାର ଉଦ୍ୟମ କରିଛି। ପ୍ରିୟଙ୍କା ନିଜ ୩୨ ମିନିଟର ଭାଷଣରେ ଆଦାନୀ, ମଣିପୁର, ସମ୍ଭଲ ଓ ଜାତିଗତ ଜନଗଣନା ପ୍ରସଙ୍ଗ ଉଠାଇ କେନ୍ଦ୍ରକୁ ଘେରିଛନ୍ତି। ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କହିଛନ୍ତି, ଦେଶରେ ସଂଖ୍ୟାଲଘୁ ମୁସଲିମ୍ଙ୍କୁ ଦ୍ୱିତୀୟ ଶ୍ରେଣୀ ନାଗରିକ ଭାବେ ବ୍ୟବହାର କରାଯାଉଛି। ସେମାନଙ୍କ ଅଧିକାର ଓ ସମ୍ପତ୍ତିକୁ ବ୍ୟବସ୍ଥିତ ରୂପେ ଛଡ଼ାଇ ନିଆଯାଉଛି। ଏଭଳି ସ୍ଥିତିରେ ଆମ ସମ୍ବିଧାନକୁ ପଛୁଆ, ଦଳିତ ଓ ଅଳ୍ପସଂଖ୍ୟକ(ପିଡିଏ)ଙ୍କ ଉନ୍ନତି ପରିବର୍ତ୍ତେ ସେମାନଙ୍କୁ କ୍ଷତି ପହଞ୍ଚାଇବା ପାଇଁ ବ୍ୟବହାର କରାଯାଉଥିବା ଅଖିଳେଶ ସମାଲୋଚନା କରିଛନ୍ତି।
