ନୂଆଦିଲ୍ଲୀ, ୧।୩: ୨୦୦୫ରେ ବିଏସ୍ପି ବିଧାୟକ ରାଜୁ ପାଲ୍ ହତ୍ୟା ମାମଲାର ମୁଖ୍ୟ ସାକ୍ଷୀ ଥିବା ଉମେଶ ପାଲ୍ଙ୍କୁ ହତ୍ୟା କରିବା ପାଇଁ ଉତ୍ତରପ୍ରଦେଶର ବରେଲି ଜେଲରୁ ଯୋଜନା ପ୍ରସ୍ତୁତ ହୋଇଥିଲା। ମୁଖ୍ୟ ଷଡ଼ଯନ୍ତ୍ରକାରୀ ସଦାକତ୍ ଖାନ୍ଙ୍କ ହଷ୍ଟେଲରେ ଆକ୍ରମଣକାରୀମାନେ ଏକାଠି ହୋଇଥିଲେ ବୋଲି ଏକ ସୂତ୍ରରୁ ଜଣାପଡ଼ିଛି। କୁଖ୍ୟାତ ଗ୍ୟାଙ୍ଗଷ୍ଟର ଆତିକ୍ ଅହମଦଙ୍କ ଭାଇ ଅଶ୍ରଫଙ୍କୁ ଆକ୍ରମଣକାରୀମାନେ ବରେଲି ଜେଲ୍ରେ ଭେଟିଥିଲେ। ଉମେଶ ପାଲ୍ଙ୍କୁ ହତ୍ୟା କରିବା ପାଇଁ ସାବରମତି ଜେଲ୍ରୁ ଆତିକ୍ ନିର୍ଦ୍ଦେଶ ଦେଇଥିଲେ ବୋଲି ପୋଲିସ କମିଶନର କହିଛନ୍ତି। ୟୁପି ପୋଲିସର ସ୍ବତନ୍ତ୍ର ଟାସ୍କଫୋର୍ସ (ଏସ୍ଟିଏଫ୍) ସଦାକତ୍ଙ୍କୁ ପୂର୍ବରୁ ଗିରଫ କରିଥିଲା।
ସୂଚନାଯୋଗ୍ୟ, ପୂର୍ବତନ ବିଏସ୍ପି ବିଧାୟକ ରାଜୁ ପାଲ୍ ହତ୍ୟା ମାମଲାର ମୁଖ୍ୟ ସାକ୍ଷୀ ଉମେଶଙ୍କୁ ଗତ ସପ୍ତାହରେ ତାଙ୍କ ପ୍ରୟାଗରାଜ ବାସଭବନ ନିକଟରେ ଗୁଳିକରି ହତ୍ୟା କରାଯାଇଥିଲା। ସୋମବାର ପୋଲିସ ଏନ୍କାଉଣ୍ଟରରେ ଉମେଶ ହତ୍ୟା ମାମଲାର ଅନ୍ୟତମ ଅଭିଯୁକ୍ତ ନିହତ ହୋଇଥିଲେ। ରାଜୁ ଅହମଦାବାଦ(ପଶ୍ଚିମ) ଆସନରେ ଆତିକ୍ ଅହମଦଙ୍କ ସାନଭାଇ ଖଲିଦ ଆଜିମ୍ଙ୍କୁ ପରାସ୍ତ କରି ବିଧାନସଭାକୁ ନିର୍ବାଚିତ ହେବାର କିଛିଦିନ ପରେ ତାଙ୍କୁ ହତ୍ୟା କରାଯାଇଥିଲା।
