ଜଳାତଙ୍କରେ ପ୍ରତିବର୍ଷ ବହୁ ଲୋକ ଆକ୍ରାନ୍ତ ହୋଇଥାନ୍ତି। ପୋଷା କୁକୁରଠାରୁ ଆରମ୍ଭ କରି ବୁଲା କୁକୁର କାମୁଡ଼ା ଯୋଗୁ ଲୋକେ ଜଳାତଙ୍କରେ ଆକ୍ରାନ୍ତ ହୋଇଥାନ୍ତି। ପୃଥିବୀରେ ବର୍ଷକୁ ୫୯,୦୦୦ ଲୋକଙ୍କର ଜଳାତଙ୍କରେ ମୃତ୍ୟୁ ଘଟିଥାଏ। ତେବେ ସଚେତନତା ଦ୍ୱାରା ଏହାର ନିରାକଣର ସମ୍ଭବ। ବିକଶିତ ଦେଶରେ ପ୍ରତିବର୍ଷ ଜଳାତଙ୍କରେ ଅଧିକ ଲୋକଙ୍କ ମୃତ୍ୟୁ ଘଟିଥାଏ। କାରଣ ସେଠକାର ଅଧିକାଂଶ ବାସିନ୍ଦା କୁକୁର ବିଲେଇ ଆଦି ପୋଷାପ୍ରାଣୀ ରଖିଥାନ୍ତି। ଏସିଆରେ ମଧ୍ୟ ବହୁ ଲୋକ ଏହି ମାରାତ୍ମକ ରୋଗରେ ଆକ୍ରାନ୍ତ ହୋଇଥାନ୍ତି। ଏହାକୁ ଦୃଷ୍ଟିରେ ରଖି ୨୦୦୭ ସେପ୍ଟେମ୍ବର ୨୮ରେ ବିଶ୍ୱ ଜଳାତଙ୍କ ଦିବସ ପାଳନ ପାଇଁ ନିଷ୍ପତ୍ତି ଗ୍ରହଣ କରାଯାଇଥିଲା। ଏହି ଦିନ ପୃଥିବୀର ବିଭିନ୍ନ ଦେଶରେ ଜଳାତଙ୍କ ସମ୍ପର୍କରେ ସଚେତନତା ସୃଷ୍ଟି କରାଯାଇଥାଏ। ପ୍ରଥମ ବିଶ୍ୱ ଜଳାତଙ୍କ ଦିବସ ଅଭିଯାନ ୨୦୦୭ ସେପ୍ଟେମ୍ବର ୮ ରେ ଆମେରିକାର ଆଲାଏନ୍ସ ଫର ରେବିସ କଣ୍ଟ୍ରୋଲ ଏବଂ ରୋଗ ନିୟନ୍ତ୍ରଣ, ଆଟଲାଣ୍ଟିକାର ରୋଗ ପ୍ରତିରୋଧକ କେନ୍ଦ୍ର, ବିଶ୍ୱସ୍ବାସ୍ଥ୍ୟ ସଂଗଠନ, ବିଶ୍ୱ ପ୍ରାଣୀ ସଂଗଠନର ସହଯୋଗରେ ଆରମ୍ଭ ହୋଇଥିଲା। ଏହି ଅବସରରେ ୧୦୦ରୁ ଅଧିକ ଦେଶରେ ଜଳାତଙ୍କ ପ୍ରତିରୋଧ ଏବଂ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ସାରା ବିଶ୍ୱରେ ପ୍ରାୟ ୧୦୦ ନିୟୁତ ଲୋକଙ୍କୁ ଜଳାତଙ୍କ ବିଷୟରେ ଶିକ୍ଷା ଦିଆଯାଇଥିଲା ଏବଂ ପ୍ରାୟ ୩ ନିୟୁତ କୁକୁରଙ୍କୁ ଟିକାକରଣ କରାଯାଇଥିଲା। ଅନ୍ତର୍ଜାତୀୟ ସରକାରୀ ଏଜେନ୍ସି, ଏକାଡେମିକ୍ସ, ଏନ୍ଜିଓ ଏବଂ ଟିକା ଉତ୍ପାଦନକାରୀ ସଂସ୍ଥାଙ୍କ ଏକ ନେଟ୍ୱାର୍କ ଦ୍ୱାରା ୨୦୧୧ରେ ବିଶ୍ୱସ୍ତରରେ କିଭଳି ଜଳାତଙ୍କ ସଂକ୍ରମଣକୁ କିଭଳି ରୋକା ଯାଇ ପାରିବ ତାହାର ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ୨୦୧୩ରେ ଜାତିସଂଘର ଖାଦ୍ୟ ଏବଂ କୃଷି ସଂଗଠନ, ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ବିଶ୍ୱସ୍ତରରେ ସଂଗଠନ ସର୍ବପ୍ରଥମେ ବିଶ୍ୱବ୍ୟାପୀ ଜଳାତଙ୍କ ହଟାଇବା ଲାଗି ଆହ୍ବାନ ଦିଆଯାଇଥିଲା। ସେହିପରି ୨୦୧୫ରେ ପ୍ରଥମ ଆଫ୍ରିକୀୟ ରାବିଜ କଣ୍ଟ୍ରୋଲ ନେଟୱାର୍କ ବୈଠକରେ ପ୍ରତିନିଧିତ୍ୱ କରିଥିବା ୩୩ଟି ଆଫ୍ରିକୀୟ ଦେଶ ବିଶ୍ୱ ଜଳାତଙ୍କ ଦିବସରେ ସଚେତନତା ସୃଷ୍ଟି ଉପରେ ଗୁରୁତ୍ୱାରୋପ କରିଥିଲେ। ଏହି ମାରାତ୍ମକ ରୋଗକୁ ନିୟନ୍ତ୍ରଣ କରିବା ପାଇଁ ପ୍ରୟାସ ଏପର୍ଯ୍ୟନ୍ତ ଶେଷ ହୋଇନାହିଁ। ତେଣୁ ଆମେରିକାର ରୋଗ ନିୟନ୍ତ୍ରଣ ଏବଂ ନିରାକରଣ କେନ୍ଦ୍ର, ଆମେରିକାର କୃଷି ବିଭାଗ, ବିଶ୍ୱ ସ୍ବାସ୍ଥ୍ୟ ସଂଗଠନ, ୱାଲର୍ଡ ଅର୍ଗାନାଇଜେଶନ ଫର ପ୍ରାଣୀ ସ୍ବାସ୍ଥ୍ୟ, ଜାତିସଂଘର ଖାଦ୍ୟ ଏବଂ କୃଷି ସଂଗଠନ ଆଦି ବିଶ୍ୱସ୍ତରୀୟ ସଂସ୍ଥା ପକ୍ଷରୁ ୨୦୩୦ ସୁଦ୍ଧା ଜଳାତଙ୍କରୁ ମାନବ ମୃତ୍ୟୁକୁ ଦୂର କରିବା ପାଇଁ ମିଳିତ ଭାବେ କାର୍ଯ୍ୟ ଜାରି ରହିଛି। ଚଳିତ ବର୍ଷ ଏହି ଦିବସର ଶୀର୍ଷକ ରହିଛି ଜଳାତଙ୍କ: ସତ୍ୟ, ଭୟ କରିବା ନୁହେଁ ଜରୁରୀ( ରାବିଜ୍: ଫାକ୍ଟ, ନଟ୍ ଫିଅର)। ଅର୍ଥାତ୍ ଜଳାତଙ୍କର ଆତଙ୍କରେ ଆତଙ୍କିତ ନ ହୋଇ ସଚେତନତା ଦ୍ୱାରା ଏହାର ମୁକାବିଲା କରିବା ଦ୍ୱାରା ମାନବ ସମାଜରୁ ଏହା ଦୂର ହୋଇପାରିବ।
