ନୂଆଦିଲ୍ଲୀ,୨୫ା୩: କଂଗ୍ରେସ ନେତା ରାହୁଲ ଗାନ୍ଧୀ ଆପରାଧିକ ମାନହାନି ମାମଲାରେ ଦୋଷୀ ସାବ୍ୟସ୍ତ ହୋଇ ୨ ବର୍ଷ ଜେଲ ଦଣ୍ଡାଦେଶ ପାଇବାର ଦିନକ ପରେ ଶୁକ୍ରବାର ଲୋକ ସଭା ସେକ୍ରେଟାରିଏଟ୍ ତାଙ୍କ ସଦସ୍ୟ ପଦ ରଦ୍ଦ କରିଛି। ଏହି ଦଣ୍ଡାଦେଶ ଉପରେ ଏକ ଉଚ୍ଚତର ଅଦାଲତ ସ୍ଥଗିତାଦେଶ ଜାରି ନ କଲେ ରାହୁଲ ଆଗାମୀ ୮ ବର୍ଷ ପର୍ଯ୍ୟନ୍ତ ଲୋକ ସଭା କିମ୍ବା ବିଧାନସଭା ନିର୍ବାଚନ ଲଢ଼ିପାରିବେ ନାହିଁ ବୋଲି ବିଶେଷଜ୍ଞମାନେ ମତ ଦେଇଛନ୍ତି। ଅନ୍ୟପକ୍ଷେ କଂଗ୍ରେସ ଏହାକୁ ‘ଗଣତନ୍ତ୍ରର କଣ୍ଠରୋଧ’ ଆଖ୍ୟା ଦେଇ ଦେଶବ୍ୟାପୀ ଜନଆନ୍ଦୋଳନ କରିବାକୁ ଅଣ୍ଟା ଭିଡ଼ିଛି। ମୋଦି ସରକାରଙ୍କୁ ଘେରିବା ପାଇଁ ସୋମବାର ଆରମ୍ଭ ହେବାକୁ ଥିବା ଏହି ଆନ୍ଦୋଳନରେ ବିଭିନ୍ନ ରାଜ୍ୟର ଦଳୀୟ ସଙ୍ଗଠନଗୁଡ଼ିକ ସାମିଲ ହେବେ ବୋଲି ଏଆଇସିସି ସାଧାରଣ ସମ୍ପାଦକ ଜୟରାମ ରମେଶ ସୂଚନା ଦେଇଛନ୍ତି।
ଲୋକ ପ୍ରତିନିଧି ଆଇନ ଧାରା ୮ର ଅବତାରଣା କରି ଜଣେ ବିଶେଷଜ୍ଞ କହିଛନ୍ତି, ରାହୁଲଙ୍କ ଅଯୋଗ୍ୟତା ୮ ବର୍ଷ ପର୍ଯ୍ୟନ୍ତ ବଳବତ୍ତର ରହିବ। କୋର୍ଟ ୨ ବର୍ଷ ଜେଲ ଦଣ୍ଡ ଦେଇଥିବାବେଳେ ଏହି ଅବଧି ଶେଷ ହେବା ପରେ ୬ ବର୍ଷ ପର୍ଯ୍ୟନ୍ତ ଏହା ଲାଗୁ ହେବ। ୨ କିମ୍ବା ତଦୂର୍ଦ୍ଧ୍ୱ ବର୍ଷ ଜେଲ ଦଣ୍ଡାଦେଶ ହେଲେ ସଦସ୍ୟତା ରଦ୍ଦ କରାଯିବା ନେଇ ଉକ୍ତ ଆଇନରେ ବ୍ୟବସ୍ଥା ରହିଛି। ଏକ ଉଚ୍ଚ ଅଦାଲତ ତାଙ୍କ ଦଣ୍ଡାଦେଶ ଉପରେ ସ୍ଥଗିତାଦେଶ ଜାରି ନ କରିବା ପର୍ଯ୍ୟନ୍ତ ରାହୁଲ ପାର୍ଲାମେଣ୍ଟକୁ ଯାଇପାରିବେ ନାହିଁ ବୋଲି ନିର୍ବାଚନ କମିଶନ ଅଫିସ୍ର ଜଣେ ପୂର୍ବତନ ଅଧିକାରୀ କହିଛନ୍ତି। କେବଳ ଏତିକି ନୁହେଁ, ନିର୍ବାଚନ କମିଶନ କେରଳର ଓ୍ବାୟନାଡ୍ ଲୋକ ସଭା ଆସନରେ ସାନି ନିର୍ବାଚନ କରାଇପାରିବେ। ଏହି ଆସନର ଅବଧି ଆସନ୍ତା ବର୍ଷ ଜୁନ୍ରେ ଶେଷ ହେବ। ଗୃହର ଅବଶିଷ୍ଟ ଅବଧି ବର୍ଷେରୁ କମ୍ ସମୟ ଥିଲେ ନିର୍ବାଚନ କରାଯାଇପାରିବ ନାହିଁ। ନିଜ ନାମ ଗୋପନ ସର୍ତ୍ତରେ ବିଶେଷଜ୍ଞ ଜଣକ ଆହୁରି କହିଛନ୍ତି, ରାହୁଲଙ୍କୁ ଅପିଲ ପାଇଁ କୋର୍ଟ ଦେଇଥିବା ଗ୍ରେସ୍ ପିରିୟଡ୍ (କୋହଳ ଅବଧି) ଶେଷ ହେବା ଯାଏ ୩୦ ଦିନ ନିର୍ବାଚନ କମିଶନ ଅପେକ୍ଷା କରିପାରନ୍ତି।
ମାସକ ମଧ୍ୟରେ ସରକାରୀ ବଙ୍ଗଳା ଛାଡ଼ିବେ
କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ପାର୍ଲାମେଣ୍ଟ ସଦସ୍ୟତା ହରାଇବା ପରେ ଏବେ ଲୁଟିଏନ୍ସ ଦିଲ୍ଲୀରେ ଥିବା ନିଜ ସରକାରୀ ବାସଭବନକୁ ୩୦ ଦିନ ମଧ୍ୟରେ ଖାଲି କରିବେ। ରାହୁଲ ୨୦୧୪ ନିର୍ବାଚନରେ ଅମେଠି ଆସନରୁ ବିଜୟୀ ହେବା ପରଠାରୁ ୧୨ ତୁଗ୍ଲକ୍ ଲେନ୍ରେ ଅବସ୍ଥିତ ଏହି ବଙ୍ଗଳାରେ ରହିଆସୁଛନ୍ତି।
