ନୂଆଦିଲ୍ଳୀ,୯।୧୨:ଆଜି ଭାରତୀୟ ରାଜନୀତିର ସଫଳ ବୋହୂ ସୋନିଆ ଗାନ୍ଧୀଙ୍କ ଜନ୍ମଦିନ। ସେ ତାଙ୍କ ଜୀବନର ୭୩ ବର୍ଷର ଯାତ୍ରା ସମାପ୍ତ କରିଛନ୍ତି। ପ୍ରାୟ ଦୁଇ ଦଶନ୍ଧି ଧରି ସୋନିଆ କଂଗ୍ରେସ ସଭାପତି ଦାୟିତ୍ୱ ତୁଲାଇ ଆସୁଛନ୍ତି। ଦୀର୍ଘ ସମୟ ଧରି କଂଗ୍ରେସ ସଭାପତି ରହିବାର ରେକର୍ଡ ସୋନିଆ ଗାନ୍ଧୀଙ୍କ ପାଖରେ ଅଛି। କଂଗ୍ରେସ ସଭାପତି ଭାବରେ ତାଙ୍କର ପ୍ରଥମ କାର୍ଯ୍ୟକାଳରେ ସୋନିଆ ୧୯ ବର୍ଷ ଧରି ଦଳର ଦାୟିତ୍ୱ ଗ୍ରହଣ କରିଥିଲେ। ଶାଶୁ ଇନ୍ଦିରା ଗାନ୍ଧୀ ଏବଂ ସ୍ବାମୀ ରାଜୀବ ଗାନ୍ଧୀଙ୍କ ମୃତ୍ୟୁ ପରେ ସୋନିଆ ଦଳକୁ ଏକ ମଜଭୁତ ସ୍ତରରେ ପହଞ୍ଚାଇ ଥିଲେ। ସେ କାର୍ଯ୍ୟଭାର ଗ୍ରହଣ କରିବା ସମୟରେ ଅଟଳ ବିହାରୀ ବାଜପେୟୀ-ଏଲ.କେ ଆଡଭାନୀ ଦେଶର ରାଜନୀତିରେ ଝଡ଼ ସୃଷ୍ଟି କରିଥିଲେ। ତୃତୀୟ ଫ୍ରଣ୍ଟର ରାଜନୀତି ମଧ୍ୟ ଜୋର ଧରିଥିଲା। ଏମାନଙ୍କ ସାମ୍ନାରେ କଂଗ୍ରେସ ଅସହାୟ ମନେ ହେଉଥିଲା। ଏଭଳି ପରିସ୍ଥିତିରେ ସୋନିଆ ଗାନ୍ଧୀ ଦଳର ନେତୃତ୍ୱ ନେଇଥିଲେ, କଂଗ୍ରେସକୁ ଏକ ନୂତନ ଜୀବନ ଦେଇଥିଲେ ଏବଂ ଦଳକୁ ରାଜନୀତିର ଶୀର୍ଷକୁ ଆଣିଥିଲେ।୧୯୯୮ ରୁ ୨୦୧୭ ପର୍ଯ୍ୟନ୍ତ ସୋନିଆ ଦଳର ସଭାପତି ଥିଲେ। ୨୦୦୪ରେ ସେ ଦଳର ନିର୍ବାଚନ ପ୍ରଚାରର ନେତୃତ୍ୱ ନେଇଥିଲେ। ଏଥିରେ ସେ ସଫଳ ହୋଇଥିଲେ। କଂଗ୍ରେସ ପ୍ରତ୍ୟାବର୍ତ୍ତନ କରି କେନ୍ଦ୍ରରେ ସରକାର ଗଠନ କଲା। ଏହା ପରେ ସୋନିଆ ନିଜେ ପ୍ରଧାନମନ୍ତ୍ରୀ ହେବାକୁ ମନା କରିଦେଇଥିଲେ ଏବଂ ମନମୋହନ ସିଂଙ୍କୁ ଏହି ପଦରେ ମୁକୁଟ ପିନ୍ଧାଇବାକୁ ନିଷ୍ପତ୍ତି ନେଇଥିଲେ, ଯାହାକି ଅନେକ ରାଜନୈତିକ ମହଲରେ ମାଷ୍ଟରଷ୍ଟ୍ରୋକ ଦ୍ୱାରା ବିବେଚନା କରାଯାଏ। ସୋନିଆ ଦଳର ସଭାପତି ହେବା ପରେ ଦିଲ୍ଲୀ, ହରିୟାଣା, ରାଜସ୍ଥାନ, ମହାରାଷ୍ଟ୍ର, ଆନ୍ଧ୍ରପ୍ରଦେଶ ଏବଂ କେରଳରେ କଂଗ୍ରେସ କ୍ଷମତାକୁ ଆସିବାରେ ସଫଳ ହୋଇଥିଲା। ସଭାପତି ଭାବରେ ସୋନିଆ ଗାନ୍ଧୀ କେବଳ କଂଗ୍ରେସକୁ କ୍ଷମତାର ନିକଟତର କରିନାହାଁନ୍ତି, ଦଳକୁ ସାଂଗଠନିକ ଶକ୍ତି ଦେବା ପାଇଁ ମଧ୍ୟ କାର୍ଯ୍ୟ କରିଛନ୍ତି ଏବଂ ରାଜ୍ୟରେ ଦୃଢ ନେତୃତ୍ୱ ସୃଷ୍ଟି କରିଛନ୍ତି। ଦିଲ୍ଲୀର ଶିଲା ଦୀକ୍ଷିତ, ହରିୟାଣାର ଭୁପେନ୍ଦ୍ର ସିଂ ହୁଡା, ରାଜସ୍ଥାନର ଅଶୋକ ଗେହଲୋଟ ଏବଂ ଆନ୍ଧ୍ରପ୍ରଦେଶର ରାଜାଶେଖର ରେଡ୍ଡୀ ଏହାର ଉଦାହରଣ।
୧୯୯୧ ରେ ରାଜୀବ ଗାନ୍ଧୀଙ୍କ ହତ୍ୟା ପରେ ସୋନିଆ ଗାନ୍ଧୀ ରାଜନୀତିରେ ପ୍ରବେଶ କରିବାକୁ ପ୍ରସ୍ତୁତ ନ ଥିଲେ। ଦଳକୁ ବଞ୍ଚାଇବା ପାଇଁ ରାଜନୀତିରେ ତାଙ୍କର ଅଂଶଗ୍ରହଣ ଧୀରେ ଧୀରେ ଆରମ୍ଭ ହୋଇଥିଲା। ପୂର୍ବତନ ରାଷ୍ଟ୍ରପତି ତଥା ବରିଷ୍ଠ କଂଗ୍ରେସ ନେତା ପ୍ରଣବ ମୁଖାର୍ଜୀ କହିଥିଲେ ସୋନିଆଙ୍କୁ କଂଗ୍ରେସ ରାଜନୀତିରେ ସକ୍ରିୟ ହେବାକୁ ମନାଇବାରେ ବହୁ ଦଳର ନେତା ଜଡିତ ଥିଲେ। ତାଙ୍କୁ ମନରେ ବିଶ୍ୱାସ ଜନ୍ମାଇବାକୁ ଚେଷ୍ଟା କରାଯାଉଥିଲା ଯେ ତାଙ୍କ ବିନା କଂଗ୍ରେସ ଶିବିର ବିଭକ୍ତ ହେବ ଏବଂ ଭାରତୀୟ ଜନତା ପାର୍ଟି ବିସ୍ତାର ହେବ। ପରେ ସେ ରାଜନୀତିକୁ ଆସିବାକୁ ରାଜି ହୋଇଥିଲେ। ବିଦେଶୀ ହେଲେ ମଧ୍ୟ ସୋନିଆ ଜଣେ ଭଲ ବୋହୂ, ସ୍ତ୍ରୀ, ମା’ ଏବଂ ନେତ୍ରୀ ହେବାରେ ସଫଳ ହୋଇଛନ୍ତି।
