ନୂଆଦିଲ୍ଲୀ,୧୫।୨: ବିଶିଷ୍ଟ ଶିଳ୍ପପତି ଗୌତମ ଆଦାନୀଙ୍କ କମ୍ପାନୀଗୁଡ଼ିକ ବିରୋଧରେ ଜାନୁୟାରୀ ୨୪ରେ ଆମେରିକୀୟ ଶର୍ଟ ସେଲର ହିଣ୍ଡେନ୍ବର୍ଗ ପକ୍ଷରୁ କରାଯାଇଥିତ୍ବା ପ୍ରଘଟକୁ ନେଇ ଜାତୀୟ ରାଜନୀତି ସରଗରମ ହୋଇଛି। ଏହି ପ୍ରସଙ୍ଗରେ କଂଗ୍ରେସ ସଦସ୍ୟମାନେ ହୋହଲ୍ଲା କରିବାରୁ ପାର୍ଲାମେଣ୍ଟର ବଜେଟ ଅଧିବେଶନ ପ୍ରଥମ ପର୍ଯ୍ୟାୟରେ ଗୃହକାର୍ଯ୍ୟ ହୋଇପାରି ନ ଥିଲା। ଆଦାନୀ ଗ୍ରୁପ୍ର ଷ୍ଟକ୍ସ ଓ ଆକାଉଣ୍ଟ୍ସ ଜାଲିଆତି ସମ୍ପର୍କିତ ରିପୋର୍ଟକୁ ନେଇ ଶାସକ-ବିରୋଧୀ ମୁହଁାମୁହଁି ଅବସ୍ଥାରେ ଥିବାବେଳେ ମଙ୍ଗଳବାର ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ପ୍ରଥମ ଥର ପାଇଁ ମୁହଁ ଖୋଲିଛନ୍ତି। ଆଦାନୀ ପ୍ରସଙ୍ଗରେ ଭାଜପା କିଛି ଲୁଚାଇବାର କିମ୍ବା ଭୟଭୀତ ହେବାର ନାହିଁ ବୋଲି ଶାହା ଏକ ନ୍ୟୁଜ୍ ଏଜେନ୍ସିକୁ ସାକ୍ଷାତ୍କାର ଦେବାବେଳେ କହିଛନ୍ତି। ଯଦି କିଛି ଲୁଚାଇବାର ନାହିଁ ତେବେ କେନ୍ଦ୍ର ସରକାର ଯୁଗ୍ମ ସଂସଦୀୟ କମିଟି (ଜେପିସି) ଦ୍ୱାରା ଏହାର ତଦନ୍ତ କରାଇବାକୁ କାହିଁକି ଭୟ କରୁଛନ୍ତି ବୋଲି କଂଗ୍ରେସ ପ୍ରଶ୍ନ କରିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ଭାଜପା ସରକାର ଆଦାନୀ ସମୂହକୁ ଅହେତୁକ ଅନୁକମ୍ପା ଦେଖାଇ ଲାଭାନ୍ବିତ କରାଇଥିବା କଂଗ୍ରେସ ଏମ୍ପି ରାହୁଲ ଗାନ୍ଧୀ ଅଭିଯୋଗ ଆଣିବା ପରେ ସଂସଦ ଅଚଳ ହୋଇଯାଇଥିଲା। ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ନେଇ ଆଲୋଚନା ବେଳେ ଓ୍ବାୟନାଡ୍ ଏମ୍ପି ରାହୁଲ ପ୍ରଧାନମନ୍ତ୍ରୀଙ୍କୁ ଅନେକ ପ୍ରଶ୍ନ କରିଥିଲେ। ଆଦାନୀଙ୍କ ଧନ ବୃଦ୍ଧି ପଛରେ ମୋଦିଙ୍କ ହାତ ଥିବା କହି ସେ କେନ୍ଦ୍ର ସରକାରଙ୍କୁ ପ୍ରଶ୍ନ ଓ ସନ୍ଦେହର କାଠଗଡ଼ାରେ ଛିଡ଼ା କରାଇଥିଲେ। ରାହୁଲଙ୍କ ପ୍ରଶ୍ନବାଣ ଓ ସମାଲୋଚନା ଏତେ ଶାଣିତ ଥିଲା ଯେ, ସେସବୁକୁ ପାର୍ଲାମେଣ୍ଟ ରେକର୍ଡରୁ ବାଦ୍ ଦିଆଯାଇଛି। କେବଳ କଂଗ୍ରେସ ନୁହେଁ, ଅନ୍ୟ ବିରୋଧୀ ଦଳଗୁଡ଼ିକ ମଧ୍ୟ ଜେପିସି ତଦନ୍ତ ଦାବିରେ ଅଟଳ ଅଛନ୍ତି। ପ୍ରଧାନମନ୍ତ୍ରୀ ଉଭୟ ଗୃହରେ ବିବୃତି ରଖୁଥିବାବେଳେ ବିରୋଧୀ ସଦସ୍ୟ ‘ଆଦାନୀ-ମୋଦି ଭାଇ ଭାଇ’ ସ୍ଲୋଗାନ ଦେଇଥିଲେ। ଫଳରେ ପ୍ରଧାନମନ୍ତ୍ରୀଙ୍କୁ ଅଭିଭାଷଣ ମଝିରେ ଅନେକ ଥର ଅଟକିବାକୁ ପଡ଼ିଥିଲା। ବିରୋଧୀଙ୍କ ଅଭିଯୋଗକୁ ଭିତ୍ତିହୀନ ଦର୍ଶାଇ ପ୍ରଧାନମନ୍ତ୍ରୀ କହିଥିଲେ, ୧୪୦ କୋଟି ଭାରତୀୟଙ୍କ ଆଶୀର୍ବାଦ ଥିବା ଯାଏ କିଛି ହେବ ନାହିଁ। ସଂସଦୀୟ ବ୍ୟାପାର ମନ୍ତ୍ରୀ
ପ୍ରହ୍ଲାଦ ଜୋଷୀ ଏବଂ ଭାଜପା ଏମ୍ପି ନିଶିକାନ୍ତ ଦୁବେ ରାହୁଲଙ୍କ ବିରୋଧରେ ସ୍ବାଧିକାର ଭଙ୍ଗ ପ୍ରସ୍ତାବ ଆଣିବା ପାଇଁ ନୋଟିସ ଦେଇଛନ୍ତି। ରାହୁଲଙ୍କୁ ବୁଧବାର ସୁଦ୍ଧା ଏହାର ଉତ୍ତର ରଖିବାକୁ ଲୋକ ସଭା ସେକ୍ରେଟାରିଏଟ୍ କହିଛି। ଇତିମଧ୍ୟରେ ଆଦାନୀ ନିଜ କମ୍ପାନୀଗୁଡ଼ିକର ନିରପେକ୍ଷ ଅଡିଟ୍ ପାଇଁ ଗ୍ରୁପ୍ ଆମେରିକୀୟ ଆକାଉଣ୍ଟାନ୍ସି ଫାର୍ମ ଗ୍ରାଣ୍ଟ ଥ୍ରୋଣ୍ଟନକୁ ଦାୟିତ୍ୱ ଦେଇଛି।
ଶାହାଙ୍କ ‘କିଛି ଲୁଚାଇବାର ନାହିଁ’ ମନ୍ତବ୍ୟ ଉପରେ ଏଆଇସିସି ମୁଖ୍ୟାଳୟରେ କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ନିଜ ପ୍ରତିକ୍ରିୟା ରଖିଛନ୍ତି। ଜୟରାମ କହିଛନ୍ତି, ଆଦାନୀ ଗ୍ରୁପ୍ ବିରୋଧରେ ଆସିଥିବା ଅଭିଯୋଗୁଡ଼ିକର ନିରପେକ୍ଷ ତଦନ୍ତ ପାଇଁ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ଗଭର୍ନର ଶକ୍ତିକାନ୍ତ ଦାସ ଏବଂ ଭାରତୀୟ ପ୍ରତିଭୂତି ଓ ବିନିମୟ ବୋର୍ଡ (ସେବି) ମୁଖ୍ୟ ମାଧବୀ ପୁରୀଙ୍କୁ ପତ୍ର ଲେଖାଯିବ। ସେମାନେ ଯଦି କିଛି ଲୁଚାଉନାହାନ୍ତି ତେବେ ଜେପିସି ତଦନ୍ତ କରାଇ ଦେଉନାହାନ୍ତି କାହିଁକି। ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଜେପିସି ତଦନ୍ତ ଦାବି କରିଥିବାବେଳେ ତାଙ୍କ ମନ୍ତବ୍ୟକୁ ରେକର୍ଡରୁ କାହିଁକି ବାଦ୍ ଦିଆଗଲା ବୋଲି ଜୟରାମ ପ୍ରଶ୍ନ କରିଛନ୍ତି।