ଅହମଦାବାଦ,୮ ।୧୨: ଗୁଜରାଟ ବିଧାନସଭା ନିର୍ବାଚନର ଫଳାଫଳ ଗୁରୁବାର ଅର୍ଥାତ୍ ୮ ଡିସେମ୍ବରରେ ଆସିବ । ଏଥିପାଇଁ ଗୁରୁବାର ସକାଳ ୮ଟାରୁ ଭୋଟ ଗଣତି ଆରମ୍ଭ ହୋଇଛି । ପ୍ରଥମେ ପୋଷ୍ଟାଲ ବାଲଟରୁ ଗଣତି ଆରମ୍ଭ ହେବା ସହ ଏହାପରେ ଇଭିଏମ ଖୋଲିଛି । ଏଥର ଗୁଜରାଟରେ ଆମ ଆଦମୀ ପାର୍ଟି(ଏଏପି)ର ଏଣ୍ଟ୍ରି ପରେ ମୁକାବିଲା ତ୍ରୀକୋଣୀୟ ହୋଇଛି ।
ତେବେ ଫଳାଫଳ ଆସିବା ପୂର୍ବରୁ ବିଧାୟକ ଜିଗ୍ନେଶ ମେୱାନି କହିଛନ୍ତି ଏଥର କଂଗ୍ରେସ ଗୁଜରାଟରେ ସାଇଲେଣ୍ଟ ଲହର ଆଣିବ । ସେ କହିଛନ୍ତି ଏହି ନିର୍ବାଚନ ଗୁଜରାଟ ଓ ଦେଶକୁ ଏକ ନୂଆ ଦିଗ ଦେବ, ରାଜ୍ୟରେ ପରିବର୍ତ୍ତନ ଜରୁରୀ । ସେ କହିଛନ୍ତି ଏହି ନିର୍ବାଚନ ନିରଙ୍କୁଶତା, ବେକାରୀ ସମସ୍ୟା ଓ ଦରଦାମ ବୃଦ୍ଧି ବିରୋଧରେ ହେବାକୁ ଯାଉଛି । ଜିଗ୍ନେଶ ଦାବି କରିଛନ୍ତି, ଏଥର ଫେଲ ମାରିବ ଏକଜିଟ ପୋଲ, କଂଗ୍ରେସକୁ ୧୨୦ ଆସନ ମିଳିବାକୁ ଯାଉଛି ।
ସୂଚନାଯୋଗ୍ୟ, ରାଜ୍ୟରେ ଗତ ୨୭ ବର୍ଷ ହେବ ଭାରତୀୟ ଜନତା ପାର୍ଟି(ଭାଜପା) ସରକାର ଚାଲି ଆସିଥିବା ବେଳେ ଏଥର ବି ଭାଜପା ସରକାର ଗଢିବ ବୋଲି ଆଶ୍ୱସ୍ତ ନଜର ଆସିଛି । ଏପଟେ ସମସ୍ତ ଏକଜିଟ ପୋଲର ଆକଳନ ବି କହୁଛି ଏଥର ଗୁଜରାଟରେ ଭାଜପା ଶାସନ କରିବ । ହେଲେ କଂଗ୍ରେସ ଦାବି କରୁଛି ଯେତେବେଳେ ଫଳାଫଳ ସାମ୍ନାକୁ ଆସିବ ସେତେବେଳେ ସବୁ ଏକଜିଟ ପୋଲ ଫେଲ ମାରିବ । କଂଗ୍ରେସ ବିଧାୟକ ଜିଗ୍ନେଶ ମେୱାନି ଦାବି କରିଛନ୍ତି ଏଥର ଗୁଜରାଟରେ କଂଗ୍ରେସ ସରକାର ଗଠନ କରିବ ।
