ନୂଆଦିଲ୍ଲୀ,୨୦।୬: କଂଗ୍ରେସ ନେତା ରାହୁଲ ଗାନ୍ଧୀ ମଙ୍ଗଳବାର ସାରେ ତାଙ୍କ ବିଦେଶ ଗସ୍ତରୁ ଭାରତ ଫେରିବାକୁ ଯାଉଛନ୍ତି। ଏନେଇ କଂଗ୍ରେସ ପାର୍ଟି ସୂତ୍ରରୁ ସୂଚନା ଜାରି ହୋଇଛି। ରାହୁଲଙ୍କ ଦୀର୍ଘ ବିଦେଶ ଗସ୍ତ ଉପରେ ଭାଜପା ପ୍ରଶ୍ନ ଉଠାଇଛି। ଗତ ମାସରେ ରାହୁଲ ଗାନ୍ଧୀ ୬ ଦିନିଆ ଆମେରିକୀୟ ଗସ୍ତରେ ଯାଇଥିଲେ କିନ୍ତୁ ଏଥର ପ୍ରାୟ ୨୧ ଦିନ ବିଦେଶ ଗସ୍ତରେ ରହିବା ପରେ ଆଜି ଭାରତ ଫେରିବେ ବୋଲି ଜଣାପଡିଛି।
ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ୨୩ ଜୁନରେ ପାଟନାରେ ବିରୋଧୀ ଦଳର ବୈଠକ ଡାକିଛନ୍ତି। ରାହୁଲ ଗାନ୍ଧୀ ଏହା ପୂର୍ବରୁ ଭାରତ ଫେରୁଛନ୍ତି। ରାହୁଲଙ୍କ ଲମ୍ବା ବିଦେଶ ଯାତ୍ରାକୁ ନେଇ ମଙ୍ଗଳବାର ଭାଜପା ଆଇସି ସେଲ ମୁଖ୍ୟ ଅମିତ ମାଲବିୟ ମଙ୍ଗଳବାର ଟୁଇଟ କରି ପ୍ରଶ୍ନ କରିଛନ୍ତି। ଟୁଇଟରେ କହିଛନ୍ତି, ରାହୁଲ ଗାନ୍ଧୀ କାହିଁକି ବିଦେଶରେ ଏତେ ସମୟ ବିତାଉଛନ୍ତି, ବିଶେଷ କରି ତାଙ୍କ ଭ୍ରମଣର ଏକ ବଡ଼ ଅଂଶ ରହସ୍ୟମୟ। ବିଦେଶୀ ଏଜେନ୍ସି ଏବଂ ଗୋଷ୍ଠୀ ସହିତ ତାଙ୍କର ଗୁପ୍ତ ବୈଠକର ଏକାଧିକ ରିପୋର୍ଟ ଭାରତର ସ୍ବାର୍ଥ ବିରୋଧରେ ଏହି ଗସ୍ତର ଉଦ୍ଦେଶ୍ୟ ବିଷୟରେ ପ୍ରଶ୍ନ ଉଠୁଛି।
