ନୂଆଦିଲ୍ଲୀ,୧୬।୩: ଲଣ୍ଡନରେ କଂଗ୍ରେସ ଏମ୍ପି ରାହୁଲ ଗାନ୍ଧୀ ଦେଇଥିବା ମନ୍ତବ୍ୟକୁ ନେଇ ରାଜନୀତି ଥମିବାର ନାଁ ଧରୁନି। ସେ କ୍ଷମା ମାଗିବାକୁ ଭାଜପା ଜିଦ ଧରିଛି। ରାହୁଲଙ୍କ ବିବୃତ୍ତି ସମ୍ପର୍କରେ ସଂସଦର ଉଭୟ ଗୃହରେ ଉତ୍ତେଜନା ଦେଖାଦେଇଛି। ଗୁରୁବାର ରାହୁଲ ଗାନ୍ଧୀ ଏହି ବିଷୟରେ ଏକ ଖବରଦାତା ସମ୍ମିଳନୀ ଡକାଇଥିଲେ। ଏଠାରେ ରାହୁଲ କହିଛନ୍ତି ଯେ, ସକାଳେ ସଂସଦକୁ ଯାଇ ବାଚସ୍ପତି (ଲୋକ ସଭା)ଙ୍କୁ କହିଥିଲି, ଯାହା ମୁଁ କହିବାକୁ ଚାହେଁ। ଆଶା କରୁଛି ଆସନ୍ତାକାଲି ମୋତେ ସଂସଦରେ କହିବାକୁ ଅନୁମତି ଦିଆଯିବ। ମୁଁ ଜଣେ ଏମ୍ପି, ମୋର ସଂସଦରେ କହିବାର ଅଧିକାର ଅଛି। ତେଣୁ ସଂସଦରେ ଏସବୁ ପ୍ରଶ୍ନର ଜବାବ ଦେବି।
ସେ ଆହୁରି ମଧ୍ୟ କହିଛନ୍ତି ଯେ, ସରକାରଙ୍କ ଚାରିଜଣ ମନ୍ତ୍ରୀ ମୋ ବିରୋଧରେ ଅଭିଯୋଗ ଆଣିଛନ୍ତି। ତେଣୁ ମୋତେ ସଂସଦରେ ଏହି ବିଷୟରେ କହିବାକୁ ସୁଯୋଗ ଦିଆଯାଉ। ଆଜି ମୁଁ ସଂସଦରେ ପହଞ୍ଚିବାର ୧ ମିନିଟ ପରେ ଗୃହକୁ ସ୍ଥଗିତ ରଖାଯାଇଛି। କିଛି ଦିନ ପୂର୍ବେ ନରେନ୍ଦ୍ର ମୋଦି ଏବଂ ଆଦାନୀ ଜୀଙ୍କ ସମ୍ପର୍କକୁ ନେଇ ମୁଁ ଗୃହରେ ଦେଇଥିବା ବକ୍ତବ୍ୟ ଗୃହର ପ୍ରକ୍ରିୟାରୁ ହଟାଇ ଦିଆଯାଇଥିଲା। ସରକାର ଏବଂ ପ୍ରଧାନମନ୍ତ୍ରୀ ଆଦାନୀ ମାମଲାକୁ ନେଇ ଡରୁଛନ୍ତି, ତେଣୁ ସେମାନେ ଏହି ନାଟକବାଜୀ କରିଛନ୍ତି। ମୁଁ ଭାବୁଛି ମୋତେ ସଂସଦରେ କହିବାକୁ ଅନୁମତି ଦିଆଯିବ ନାହିଁ। ମୁଖ୍ୟ ପ୍ରଶ୍ନ ହେଉଛି ମୋଦିଜୀ ଏବଂ ଆଦାନୀଜୀଙ୍କ ମଧ୍ୟରେ ସମ୍ପର୍କ କ’ଣ?
ରାହୁଲ ବ୍ରିଟେନର କେମ୍ବ୍ରିଜ୍ ୟୁନିଭର୍ସିଟିରେ ଭାରତୀୟ ଗଣତନ୍ତ୍ର ଉପରେ ମନ୍ତବ୍ୟ ଦେଇଥିଲେ। ଲୋକ ସଭାରେ ବିରୋଧୀଙ୍କ ସ୍ବରକୁ ଦମନ କରାଯାଉଥିବା ଅଭିଯୋଗ କରି ଲଣ୍ଡନରେ ସେ କହିଥିଲେ, ବିରୋଧୀ ଦଳର ନେତାଙ୍କ ମାଇକ ବନ୍ଦ କରିଦିଆଯାଉଛି। ସୋମବାର ଠାରୁ ଆରମ୍ଭ ହୋଇଥିବା ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟରେ ସରକାର ସଂସଦର ଉଭୟ ଗୃହରେ କଂଗ୍ରେସ ବିରୋଧରେ ହଙ୍ଗାମା କରୁଥିବା ଦେଖାଯାଇଛି। ରାହୁଲ ଗାନ୍ଧୀ ନିଜ ମନ୍ତବ୍ୟ ପାଇଁ କ୍ଷମା ମାଗନ୍ତୁ ବୋଲି ସେମାନେ ଅଡି ବସିଛନ୍ତି।
ରାହୁଲ ଗାନ୍ଧୀ କ୍ଷମା ମାଗିବା ପ୍ରଶ୍ନରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେ କହିଛନ୍ତି, ରାହୁଲ କ୍ଷମା ମାଗିବାର କୌଣସି ପ୍ରଶ୍ନ ଉଠୁନାହିଁ। ସରକାର ଅଭିବ୍ୟକ୍ତିର ସ୍ବାଧୀନତାକୁ ଭାଙ୍ଗିବାକୁ ଚାହୁଁଛନ୍ତି। ଏଠାରେ ଗଣତନ୍ତ୍ର ଦୁର୍ବଳ ହେଉଛି। ଯେଉଁମାନେ ସତ୍ୟ କହୁଛନ୍ତି ସେମାନଙ୍କୁ ଜେଲରେ ରଖାଯାଉଛି।
