ନୂଆଦିଲ୍ଲୀ,୧୯।୪: କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ସୋମବାର ଦଳର ଏକ ନିର୍ଦ୍ଦିଷ୍ଟ ଗ୍ରୁପ୍ର ବରିଷ୍ଠ ନେତାମାନଙ୍କୁ ଭେଟି ୨୦୨୪ ସାଧାରଣ ନିର୍ବାଚନ ଲାଗି ରଣନୀତିକାର ପ୍ରଶାନ୍ତ କିଶୋର (ପିକେ) ଦେଇଥିବା ପ୍ରସ୍ତାବ ସମ୍ପର୍କରେ ଆଲୋଚନା କରିଛନ୍ତି। ଦୁଇଦିନ ପୂର୍ବରୁ ପ୍ରଶାନ୍ତ କିଶୋର କଂଗ୍ରେସ ଅଧ୍ୟକ୍ଷାଙ୍କୁ ଭେଟି ସାଧାରଣ ନିର୍ବାଚନ ପାଇଁ ଏକ କାର୍ଯ୍ୟଯୋଜନା ପ୍ରଦାନ କରିଥିଲେ। ଏଥିରେ ସର୍ବପୁରାତନ ଦଳକୁ ୩୭୦ଟି ନିର୍ବାଚନ ମଣ୍ଡଳୀ ଉପରେ ମନୋନିବେଶ କରିବାକୁ ପ୍ରସ୍ତାବ ଦିଆଯାଇଥିଲା। ଏହା ବ୍ୟତୀତ ନିର୍ଦ୍ଦିଷ୍ଟ ରାଜ୍ୟରେ ସମଭାବାପନ୍ନ ଦଳ ସହ ମେଣ୍ଟ କରିବା ଲାଗି ପ୍ରଶାନ୍ତ ପରାମର୍ଶ ଦେଇଛନ୍ତି। ଉତ୍ତରପ୍ରଦେଶ, ବିହାର, ଓଡ଼ିଶାରେ ଦଳ ଏକାକୀ ନିର୍ବାଚନ ଲଢ଼ିବାକୁ ସେ ପ୍ରସ୍ତାବ ଦେଇଥିବାବେଳେ ତାମିଲନାଡୁ, ପଶ୍ଚିମବଙ୍ଗ ଏବଂ ମହାରାଷ୍ଟ୍ରରେ ମେଣ୍ଟ କରିବା ପାଇଁ କହିଛନ୍ତି। ପିକେଙ୍କ ପ୍ରସ୍ତାବରେ କଂଗ୍ରେସ ନେତା ରାହୁଲ ଗାନ୍ଧୀ ସହମତ ଥିବା ଏକ ସୂତ୍ରରୁ ଜଣାପଡ଼ିଛି। ସୋନିଆଙ୍କ ୧୦ ଜନପଥ ରୋଡ୍ ବାସଭବନରେ ଅନୁଷ୍ଠିତ ବୈଠକରେ ଦଳର ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା, ବରିଷ୍ଠ ନେତା ମୁକୁଲ ଓ୍ବାସ୍ନିକ, ରଣଦୀପ୍ ସୁର୍ଜଓ୍ବୋଲା, କେ.ସି. ବେଣୁଗୋପାଳ ଏବଂ ଅମ୍ବିକା ସୋନି ଯୋଗ ଦେଇଥିଲେ। ପ୍ରଶାନ୍ତ କିଶୋରଙ୍କୁ କଂଗ୍ରେସରେ ସାମିଲ କରିବା ଓ ତାଙ୍କ ପ୍ରସ୍ତାବକୁ ନେଇ ଦଳରେ ମତଭେଦ ଥିବା ଜଣାପଡ଼ିଛି। କାରଣ ବିଭିନ୍ନ ରାଜ୍ୟରେ କଂଗ୍ରେସର ପ୍ରତିଦ୍ୱନ୍ଦ୍ୱୀ ଦଳର ନେତାଙ୍କ ସହ ତାଙ୍କର ଘନିଷ୍ଠ ସମ୍ପର୍କ ରହିଛି। ସେମାନଙ୍କ ମଧ୍ୟରୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡୀ ଏବଂ ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ଅନ୍ୟତମ। ପୂର୍ବରୁ ପିକେଙ୍କ ଟିମ୍ ଆଇପିଏସି ମମତା ଏବଂ ଜଗନମୋହନଙ୍କ ପାଇଁ କାର୍ଯ୍ୟ କରିଛି। ପିକେ କଂଗ୍ରେସରେ ଯୋଗଦେବା ନେଇ ଗତବର୍ଷ ଠାରୁ ଚର୍ଚ୍ଚା ହୋଇଆସୁଛି। ଦଳରେ ପରିବର୍ତ୍ତନ ଲାଗି ସେ ଦେଇଥିବା ପ୍ରସ୍ତାବକୁ ରାହୁଲ ଗ୍ରହଣ କରିଥିବା ଏକ ସୂତ୍ରରୁ ଜଣାପଡ଼ିଛି। ପ୍ରଶାନ୍ତ ବଡ଼ ପରିବର୍ତ୍ତନ ସପକ୍ଷରେ ଥିବାବେଳେ ଗାନ୍ଧୀ ପରିବାର ବରିଷ୍ଠ ନେତାମାନଙ୍କୁ ଛାଡ଼ିବାକୁ ରାଜି ନ ଥିବା ଜଣାପଡ଼ିଛି।
