ନୂଆଦିଲ୍ଲୀ, ୨୧।୨: ୨୦୧୪ ସାଧାରଣ ନିର୍ବାଚନରେ କଂଗ୍ରେସର ନୈରାଶ୍ୟଜନକ ପ୍ରଦର୍ଶନ ପରେ ଏହି ଦଳରେ ଆର୍ଥିକ ସମସ୍ୟା ଦେଖାଦେଇଥିଲା। ଏବେ ଦେଶର ଏହି ସର୍ବପୁରାତନ ଦଳ ଗୁରୁତର ଆର୍ଥତ୍କ ସଙ୍କଟର ସମ୍ମୁଖୀନ ହୋଇଛି। ସଙ୍କଟରୁ ମୁକୁଳିବା ଲାଗି ଭଲ ଦଳୀୟ ସ୍ଥିତି ଥିବା ରାଜ୍ୟଗୁଡ଼ିକୁ ଏସ୍ଓଏସ୍ ବାର୍ତ୍ତା ପଠାଯାଉଛି। ଏଆଇସିସି ବୈଠକରେ ଆର୍ଥିକ ସହାୟତା ସମ୍ପର୍କରେ ମୁଖ୍ୟତଃ ଆଲୋଚନା ହୋଇଥିଲା। ଏଥିରେ ନିର୍ଦ୍ଦିଷ୍ଟ କେତେକ ରାଜ୍ୟର କଂଗ୍ରେସ ସଭାପତି ଯୋଗଦେଇଥିଲେ। କଂଗ୍ରେସର ପ୍ରମୁଖ ପରିଚାଳକମାନେ ଗତ ମାସରେ ମହାରାଷ୍ଟ୍ର, ଝାଡ଼ଖଣ୍ଡ, ପଞ୍ଜାବର ମନ୍ତ୍ରୀ ଓ ବରିଷ୍ଠ ନେତୃବୃନ୍ଦଙ୍କୁ ଅଲଗା ଅଲଗା ଭେଟିଥିଲେ।
ଦଳୀୟ ବୈଠକରେ ଆର୍ଥତ୍କ ପ୍ରସଙ୍ଗ ଆଲୋଚନାର ମୁଖ୍ୟ ବିଷୟ ହେଉଥିବା ଜଣାପଡ଼ିଛି। ନେତୃବୃନ୍ଦଙ୍କୁ ଆର୍ଥିକ ସ୍ଥିତି ସମ୍ପର୍କରେ ଅବଗତ କରାଯିବା ସହ ସେମାନଙ୍କୁ ପାଣ୍ଠି ଯୋଗାଡ଼ କରିବାର ଦାୟିତ୍ୱ ନେବାକୁ କୁହାଯାଉଛି। ଆଗକୁ ପଶ୍ଚିମବଙ୍ଗ, ତାମିଲନାଡୁ, କେରଳ, ଆସାମ ଓ ପୁଡୁଚେରୀରେ ବିଧାନସଭା ନିର୍ବାଚନ ଥିବାବେଳେ କଂଗ୍ରେସକୁ ଅର୍ଥଚିନ୍ତା ଘାରିଛି।
ସେପଟେ ରାଜଧାନୀ ଦିଲ୍ଲୀରେ ଦଳର ନୂଆ ମୁଖ୍ୟାଳୟ ନିର୍ମାଣ ଚାଲିଥିବାରୁ ଏହା ମଧ୍ୟ ଚିନ୍ତା ବଢ଼ାଇଛି। ଉପା ସରକାର କ୍ଷମତାରୁ ଯିବା ପରେ ପାଣ୍ଠି ସଂଗ୍ରହ ବାଧାପ୍ରାପ୍ତ ହୋଇଥିଲା। ଜାତୀୟ ସ୍ତର ସମେତ ବିଭିନ୍ନ ରାଜ୍ୟରେ କଂଗ୍ରେସ ଦୁର୍ବଳ ହେବାରେ ଲାଗିଛି। ଏବେ ଏହି ଦଳ କେବଳ ପଞ୍ଜାବ, ରାଜସ୍ଥାନ ଓ ଛତିଶଗଡ଼ରେ ସରକାରରେ ରହିଛି। ନିର୍ବାଚନ ହେବାକୁ ଥିବା ପୁଡ଼ୁଚେରୀରେ ମଧ୍ୟ ଦଳର ସ୍ଥିତି ଭଲ ନାହିଁ। ମହାରାଷ୍ଟ୍ର ଓ ଝାଡ଼ଖଣ୍ଡରେ ଏହି ଦଳ ମେଣ୍ଟ ସରକାରରେ ସାମିଲ ଅଛି। କଂଗ୍ରେସ ଏହାର ନିର୍ବାଚିତ ଜନପ୍ରତିନିଧିମାନଙ୍କୁ ସହାୟତା ଦେବା ଲାଗି କହିବ ବୋଲି ଯୋଜନା କରୁଛି।
