ବିଦର,୨୯।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କର୍ନାଟକରେ ଏକ ନିର୍ବାଚନ ରାଲିକୁ ସମ୍ବୋଧିତ କରିଛନ୍ତି। ବିଦରରେ ଅନୁଷ୍ଠିତ ଏକ ସଭାକୁ ମୋଦି ସମ୍ବୋଧନ କରି କହିଛନ୍ତି ଯେ, ସାଧାରଣ ଲୋକଙ୍କ ସମସ୍ୟାରେ ସ୍ବର ଉଠାଉଥିବା, ଭ୍ରଷ୍ଟାଚାରକୁ ବିରୋଧ କରୁଥିବା ଏବଂ ସ୍ବାର୍ଥପର ରାଜନୀତିକୁ ପ୍ରହାର କରୁଥିବା ବ୍ୟକ୍ତିଙ୍କୁ କଂଗ୍ରେସ ଘୃଣା କରେ। ଏହି ନିର୍ବାଚନରେ ମଧ୍ୟ କଂଗ୍ରେସ ମୋତେ ପୁନର୍ବାର ଦୁର୍ବ୍ୟବହାର କରିବା ଆରମ୍ଭ କରିଛିି। ବର୍ତ୍ତମାନ ପର୍ଯ୍ୟନ୍ତ କଂଗ୍ରେସ ଲୋକମାନେ ମୋତେ ୯୧ଥର ଦୁର୍ବ୍ୟବହାର କରିସାରିଛନ୍ତି। ଏହି ଅପବ୍ୟବହାରର ଅଭିଧାନରେ ସମୟ ନଷ୍ଟ କରିବା ପରିବର୍ତ୍ତେ ଯଦି କଂଗ୍ରେସ ସୁଶାସନରେ ପରିଶ୍ରମ କରିଥା’ନ୍ତା, ତା’ହେଲେ ଏପରି ତା’ର ଦୟନୀୟ ସ୍ଥିତି ହୋଇ ନ ଥାଆନ୍ତା ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି।
ଭାଜପା କୋଟି କୋଟି ମା’ ଓ ଭଉଣୀଙ୍କ ବ୍ୟାଙ୍କରେ ଖାତା ଖୋଲିଛି। ସରକାରୀ ସହାୟତା ଯେପରି ସିଧାସଳଖ ଲୋକଙ୍କ ପାଖରେ ପହଞ୍ଚିପାରିବ ସେ ବ୍ୟବସ୍ଥା ମଧ୍ୟ କରିଛି। ବିନା ଗ୍ୟାରେଣ୍ଟିରେ କିପରି ଋଣ ମିଳିପାରିବ ସେ ବ୍ୟବସ୍ଥା କରିବା ସହିତ ମାଗଣା ରାଶନ ଯୋଗାଇ ଦେଇଛି ବୋଲି ମୋଦି କହିଛନ୍ତି। ଭାଜପା ଦେଶସେବା କାର୍ଯ୍ୟ କରୁଥିବାବେଳେ କଂଗ୍ରେସ କେବଳ ସମାଜକୁ ଭାଗ ଭାଗ କରିଛି। ଜାତି, ଧର୍ମ, ମତ ଏବଂ ବିଶ୍ୱାସ ଆଧାରରେ ଦେଶକୁ ବିଭକ୍ତ କରିଛି। ଶାସନ ଆଳରେ କେବଳ ତୁଷ୍ଟୀକରଣକୁ କଂଗ୍ରେସ ପ୍ରୋତ୍ସାହନ ଦେଇଛି। ଯେ ପର୍ଯ୍ୟନ୍ତ କର୍ନାଟକରେ କଂଗ୍ରେସ ସରକାର ଥିଲା, ଗରିବଙ୍କୁ ଆବାସ ଯୋଜନାକୁ ମନ୍ଥର କରିଥିଲା। କିନ୍ତୁ ଭାଜପାର ପୁଣି ଡବଲ ଇଞ୍ଜିନ ସରକାର ଆସିଲେ କର୍ନାଟକର ଗରିବ ପରିବାରଙ୍କୁ ୯ଲକ୍ଷ ପକ୍କା ଘର ମିଳିବ। ଭାଜପା ବିଦରରେ ଗରିବଙ୍କୁ ପ୍ରାୟ ୩୦ ହଜାର ପକ୍କା ଘର ଦେଇଛି। ଅର୍ଥାତ୍ ଆମେ ବିଦରର ୩୦ ହଜାର ଗରିବଙ୍କୁ ଲକ୍ଷପତି କରିଛୁ ବୋଲି ମୋଦି କହିଛନ୍ତି।
ପ୍ରଧାନମନ୍ତ୍ରୀ ପୁଣି କହିଛନ୍ତି ଯେ, କଂଗ୍ରେସ କେବେ ଗରିବଙ୍କ ସମସ୍ୟାକୁ ବୁଝିପାରି ନାହିଁ। ସେମାନେ କେବେ ଦାରିଦ୍ର୍ୟ ଦେଖିନାହାନ୍ତି। ଛତିଶଗଡ଼ ଏବଂ ରାଜସ୍ଥାନର ଚାଷୀଙ୍କୁ ଦେଇଥିବା ପ୍ରତିଶ୍ରୁତି କଂଗ୍ରେସ ଏଯାଏଁ ପୂରଣ କରିନାହିଁ। ସେ ଅଞ୍ଚଳର ଆଖୁଚାଷୀ ଏବେ ଦୁର୍ଦ୍ଦିନରେ ବଞ୍ଚୁଛନ୍ତି। କିନ୍ତୁ ଭାଜପା ସେମାନଙ୍କ ସମସ୍ୟାକୁ ପ୍ରାଥମିକତା ଦେଇ ସମସ୍ୟାର ସମାଧାନ କରୁଛି ବୋଲି ମୋଦି କହିଛନ୍ତି।
ଭାଜପା ଯେତେବେଳେ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନା ଆରମ୍ଭ କରିଥିଲା, ହିତାଧିକାରୀ କୃଷକମାନଙ୍କ ଆକାଉଣ୍ଟକୁ ସିଧାସଳଖ ଟଙ୍କା ପଠାଉଥିଲା। ସେତେବେଳେ କର୍ନାଟକରେ କଂଗ୍ରେସ-ଜେଡିଏସ୍ ସରକାର ଥିଲା। ତେବେ ଏହି ସମୟରେ ହିତାଧିକାରୀଙ୍କ ତାଲିକା କେନ୍ଦ୍ର ସରକାରଙ୍କୁ କଂଗ୍ରେସ ପଠାଇ ନ ଥିଲା। ଏଥିରୁ କଂଗ୍ରେସର କୃଷକମାନଙ୍କ ପ୍ରତି ଘୃଣାକୁ ଜନସାଧାରଣ ଜାଣିପାରୁଥିବେ ବୋଲି ପ୍ରଧାନମନ୍ତ୍ରୀ କହିଥିଲେ।
