ପାରଳାଖେମୁଣ୍ଡି,୧୭।୭(ଗିରିଧାରୀ ପରିଛା): ବାଲେଶ୍ୱର ଫକୀର ମୋହନ ମହାବିଦ୍ୟାଳୟର ଛାତ୍ରୀ ସୌମ୍ୟାଶ୍ରୀ ବିଶି ଆତ୍ମହତ୍ୟା ଘଟଣା ଓ ପରିବାରକୁ ନ୍ୟାୟ ଦାବିରେ ଗୁରୁବାର ସାରା ରାଜ୍ୟରେ କଂଗ୍ରେସ ଦଳ ପକ୍ଷରୁ ୧୨ ଘଣ୍ଟିଆ ଓଡିଶା ବନ୍ଦ ଡାକରା ଦେଇଛି । ଏହି ବନ୍ଦ ଡାକରାରେ ଗଜପତି ଜିଲା କଂଗ୍ରେସ ସାମିଲ ହେବା ସହ ବନ୍ଦ ପାଳନକରିଛି। ଜିଲା ସଭାପତି ତଥା ମୋହନା ବିଧାୟକ ଦାସୀରଥୀ ଗମାଙ୍ଗଙ୍କ ନେତୃତ୍ୱରେ ଦଳର ଶହ ଶହ ସଂଖ୍ୟାରେ ନେତା ଓ କର୍ମୀମାନେ ଜିଲାର ମୁଖ୍ୟ ରାସ୍ତା ଉପରେ ସକାଳ ୬ଟାରୁ ପିକେଟିଙ୍ଗ ଆରମ୍ଭ କରିଛି । ରାଜ୍ୟ ରାଜପଥ ଓ ପାରଳାଖେମୁଣ୍ଡି ସହରର କଲେଜ ଛକ, ପୁରୁଣା ପାଟଣା ରୋଡ ଛକ, ଗାନ୍ଧୀ ଛକ, ବଜାର ଛକ ଠାରେ ଦଳର ନେତା ଓ କର୍ମୀ ବିଭିନ୍ନ ନାରା ଦେଇ ବନ୍ଦ ପାଳନ କରିଛନ୍ତି । ଏହା ସହ ଜିଲାରେ ପୁରାପୁରି ବସ ଚଳାଚଳ ଠପ ହୋଇପଡିଥିବାବେଳେ ଦୋକାନ ବଜାର, ସ୍କୁଲ, କଲେଜ, ସମସ୍ତ ବ୍ୟାଙ୍କ ଓ ସରକାରୀ କାର୍ଯ୍ୟାଳୟ ଗୁଡିକ ବନ୍ଦ କରାଯାଇଛି। ସେହିପରି ଜିଲାର ସମସ୍ତ ୭ଗୋଟି ବ୍ଳକର ଚାରିଛକ ଠାରେ ମଧ୍ୟ ଜାତୀୟ ରାଜପଥ ଉପରେ କଂଗ୍ରେସ କର୍ମୀମାନେ ବନ୍ଦ ପାଳନ କରିଛନ୍ତି।
