ଚେନ୍ନାଇ,୧।୩: ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ଜନ୍ମଦିନ ଅବସରରେ ବୁଧବାର ଚେନ୍ନାଇରେ ଡିଏମକେ ଏକ ବିଶାଳ ସମାବେଶ ଆୟୋଜନ କରିଛି। ଏଥିରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ, ଜମ୍ମୁ କଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲାଙ୍କ ସମେତ ବହୁ ବରିଷ୍ଠ ନେତା ଏଥିରେ ଅଂଶଗ୍ରହଣ କରିଥିଲେ। ଏହି ସମାବେଶକୁ ସମ୍ବୋଧିତ କରି ଖାର୍ଗେ ବିରୋଧୀ ଏକାଠି ଉପରେ ଦଳର ଆଭିମୁଖ୍ୟ ସ୍ପଷ୍ଟ କରିଛନ୍ତି।
ଖାର୍ଗେ କହିଛନ୍ତି ଯେ, ବିରୋଧୀ ଏକାଠି ହେଲେ ତାର କିଏ ନେତୃତ୍ୱ ନେବେ କିମ୍ବା କିଏ ପ୍ରଧାନମନ୍ତ୍ରୀ ହେବେ ତାହା ଆମେ କହୁ ନାହୁଁ, ତାହା ପ୍ରଶ୍ନ ନୁହେଁ। ଆମେ ଏକାଠି ଯୁଦ୍ଧ କରିବାକୁ ଚାହୁଁଛୁ। ୨୦୨୪ ନିର୍ବାଚନ ପୂର୍ବରୁ ଆମେ ଆମର ସହଯୋଗକୁ ମଜଭୁତ ଜାରି ରଖିବା ଉଚିତ୍। ତାମିଲନାଡୁରେ କଂଗ୍ରେସ-ଡିଏମକେ ମିଳିତ ମେଣ୍ଟ ୨୦୦୪, ୨୦୦୯ରେ ଲୋକ ସଭା, ୨୦୦୬ ଏବଂ ୨୦୨୧ରେ ବିଧାନସଭାରେ ବିଜୟ ହାସଲ କରିଛି। ତେଣୁ ଏହି ମେଣ୍ଟକୁ ଆହୁରି ମଜଭୁତ କରିବାକୁ ପଡିବ।
ସେ ଆହୁରି ମଧ୍ୟ କହିଛନ୍ତି, ଭାଜପା ସରକାରଙ୍କ ବିଫଳତା ହେତୁ୨୩ କୋଟିରୁ ଅଧିକ ଲୋକଙ୍କୁ ଦାରିଦ୍ର ସୀମାରେଖା ତଳେ ଠେଲି ଦିଆଯାଇଛି। ମୁଦ୍ରାସ୍ଫୀତି ଦ୍ୱାରା ସାଧାରଣ ଲୋକ ଅସୁବିଧାରେ ପଡ଼ିଛନ୍ତି, ଯୁବକମାନେ ବେକାରୀ ଦ୍ୱାରା ପ୍ରଭାବିତ ହୋଇଛନ୍ତି, କିନ୍ତୁ ନିର୍ବାଚନ ଜିତିବା ପାଇଁ ଭାଜପା ସମାଜକୁ ଧ୍ରୁବୀକରଣ କରିବାକୁ ଆଗ୍ରହୀ।
ଏହି ରାଲିରେ ତାମିଲନାଡୁର ମୁଖ୍ୟମନ୍ତ୍ରୀ ତଥା ଡିଏମକେ ସଭାପତି ଏମ.କେ ଷ୍ଟାଲିନ କହିଛନ୍ତି, ଏହା କେବଳ ମୋର ଜନ୍ମଦିନ ପାଳନ ପାଇଁ ଏକ ପ୍ଲାଟଫର୍ମ ନୁହେଁ, ଏହା ଭାରତରେ ଏକ ବିରାଟ ରାଜନୈତିକ ପ୍ଲାଟଫର୍ମର ଆରମ୍ଭ ମଧ୍ୟ। ଏକ ସାଧାରଣ ପ୍ଲାଟଫର୍ମ ସୃଷ୍ଟି କରି ମୋର ଜନ୍ମଦିନରେ ଏହି ଉପହାର ପାଇଁ ମୁଁ ମଲ୍ଲିକାର୍ଜୁନ ଖାର୍ଗେଙ୍କୁ ଧନ୍ୟବାଦ ଦେଉଛି। ଆଗାମୀ ଲୋକସଭା ନିର୍ବାଚନରେ ଭାଜପାକୁ ପରାସ୍ତ କରିବା ପାଇଁ ରାଜନୈତିକ ଦଳମାନେ ମତଭେଦଠାରୁ ଉର୍ଦ୍ଧ୍ୱରେ ଏକାଠି ହେବା ଉଚିତ୍।
