ଉମରକୋଟ,୨୭ା୪(ସ୍ବ.ପ୍ର.): ନବରଙ୍ଗପୁର ଜିଲା ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସ୍ତ୍ରୀ ଓ ପ୍ରସୂତି ରୋଗ ବିଶେଷଜ୍ଞ ଡାକ୍ତର ସୁମନ୍ତ ରାଉଳଙ୍କ ବଦଳି ନେଇ ଭିନ୍ନ ପରିବେଶ ସୃଷ୍ଟି ହୋଇଥିଲା। କଂଗ୍ରେସ ତାଙ୍କ ବଦଳି ଚାହୁଁଥିବା ବେଳେ ଏହାକୁ ନାଗରିକ ମଞ୍ଚ ଓ ଆଶାକର୍ମୀମାନେ ବିରୋଧ କରିବା ସହ ସ୍ବାସ୍ଥ୍ୟକେନ୍ଦ୍ରକୁ ଆଉ ଜଣେ ସ୍ତ୍ରୀ ଓ ପ୍ରସୂତି ଡାକ୍ତର ଓ ଆନାସ୍ଥାସିଆ ଡାକ୍ତର ଯୋଗାଇ ଦେବାକୁ ଦାବି କରିଥିଲେ। ବୁଧବାର ନାଗରିକ ମଞ୍ଚ, ଆଶାକର୍ମୀ ଓ କଂଗ୍ରେସ କର୍ମକର୍ତ୍ତାମାନେ ଏହାକୁ ନେଇ ଧାରଣା ଦେବାରୁ ଅପ୍ରିତିକର ପରିସ୍ଥିତି ସୃଷ୍ଟି ହୋଇଥିଲା। ଧାରଣାସ୍ଥଳରେ ଅତିରିକ୍ତ ଜିଲା ମୁଖ୍ୟ ଚିକିତ୍ସା ଅଧିକାରୀ (ଏଡିଏମଓ) ମଳୟ କୁମାର ତ୍ରିପାଠୀ ପହଞ୍ଚି ଦୀର୍ଘ ସମୟ ପୃଥକ ଭାବେ ସେମାନଙ୍କ ସହ ଆଲୋଚନା କରି ଲିଖିତ ପ୍ରତିଶ୍ରୁତି ଦେବା ପରେ କଂଗ୍ରେସ, ଆଶାକର୍ମୀ ଓ ନାଗରିକ ମଞ୍ଚର ଧାରଣା ପ୍ରତ୍ୟାହୃତ ହୋଇଛି।
ଗତ ୧୫ ତାରିଖରେ ଜଣେ ଗର୍ଭବତୀ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହୋଇଥିଲେ। ତାଙ୍କର ରକ୍ତ ଅଭାବ ଥିବା ବେଳେ ଅସ୍ତ୍ରୋପଚାରର ଆବଶ୍ୟକତା ଥିଲା। ସ୍ବାସ୍ଥ୍ୟକେନ୍ଦ୍ର ରକ୍ତଭଣ୍ଡାରରେ ରକ୍ତ ଗଚ୍ଛିତ ନ ଥିବାରୁ ସମ୍ପୃକ୍ତା ଗର୍ଭବତୀଙ୍କୁ ସ୍ତ୍ରୀ ଓ ପ୍ରସୂତି ବିଶେଷଜ୍ଞ ଡାକ୍ତର ରାଉଳ ନବରଙ୍ଗପୁର ଜିଲା ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରିଥିଲେ। ପରବର୍ତ୍ତୀ ସମୟରେ ତାଙ୍କର ମୃତ୍ୟୁ ଘଟିବାରୁ ପରିବାର ଲୋକେ ଡାକ୍ତର ରାଉଳ ଚିକିତ୍ସା ନ କରି ନବରଙ୍ଗପୁର ପଠାଇଥିବା ଅଭିଯୋଗ କରିଥିଲେ। ଏହାକୁ ନେଇ କଂଗ୍ରେସ ଡାକ୍ତର ରାଉଳଙ୍କୁ ୨୫ ତାରିଖ ସୁଦ୍ଧା ବଦଳି ପାଇଁ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ ନିକଟରେ ଦାବି କରିଥିଲା। ମାତ୍ର ପ୍ରଶାସନ କୌଣସି ପଦକ୍ଷେପ ନ ନେବାରୁ ବୁଧବାର ଦଳ ଉମରକୋଟ ଗୋଷ୍ଠୀ ସାସ୍ଥ୍ୟ କେନ୍ଦ୍ର ସମ୍ମୁଖରେ ଧାରଣା ଦେଇଥିଲା। ଏଥିସହ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ରକ୍ତ ଭଣ୍ଡାର ପ୍ରତିଷ୍ଠା, ଡିଜିଟାଲ ଏକ୍ସ-ରେ ଓ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଉପଖଣ୍ଡ ହସ୍ପିଟାଲ ମାନ୍ୟତା ଦାବି କରିଥିଲା। ସନରାଜ ଗଣ୍ଡ, ପିସିସି ସଭ୍ୟ ଖେମରାଜ ବାଘ, ବାବୁଲା ପଟ୍ଟନାୟକ, ଟୁଲୁ ସାହୁ, ମୁନା ପାଢୀ, ସୁରେନ୍ଦ୍ର ନାୟକ, ଉସମାନ ଲାଠିଆ, ଶଙ୍କର ଦେ ଓ ଅମୂଲ୍ୟ ପଟ୍ଟନାୟକ ପ୍ରମୁଖ ଧାରଣାରେ ବସିଥିଲେ।
ଅନ୍ୟପକ୍ଷରେ ଉମରକୋଟ ପୌର ଉପାଧ୍ୟକ୍ଷ ସୁଧାଂଶୁ ଦାସଙ୍କ ନେତୃତ୍ୱରେ ଉମରକୋଟ ନାଗରିକ ମଞ୍ଚ କମିଟିର ଶତାଧିକ ଯୁବକ ଓ ମହିଳା ଡାକ୍ତରଙ୍କୁ ବାଦଳି ନ କରିବା ଦାବିକରି ଧାରଣାରେ ବସିଥିଲେ। ଉପାଧ୍ୟକ୍ଷ ଦାସ କହିଛନ୍ତି, ଗତ ୧୦ ତାରିଖରେ କଂଗ୍ରେସ ସ୍ବାସ୍ଥ୍ୟକେନ୍ଦ୍ରର ବିଭିନ୍ନ ସମସ୍ୟା ନେଇ ଏକ ଶୋଭାଯାତ୍ରା କରିଥିଲା। କଂଗ୍ରେସର କେତେଜଣ ବ୍ୟକ୍ତି ସମ୍ପୃକ୍ତ ଡାକ୍ତରଙ୍କୁ ଅର୍ଥ ମାଗିଥିଲେ। ସେ ନଦେବାରୁ ତାଙ୍କୁ ଆକ୍ରୋଶମୂଳକ ଭାବରେ ଏବେ ବଦଳି ପାଇଁ ଦାବି କରୁଛନ୍ତି ବୋଲି କହିଥିଲେ। ଯେଉଁମାନେ ଡାକ୍ତରଙ୍କୁ ଟଙ୍କା ମାଗିଥିଲେ ସେମାନଙ୍କୁ ଶୀଘ୍ର ଗିରଫ କରାଯାଉ ବୋଲି ମଞ୍ଚ ଦାବି କରଥିଲା। ୨ଶହରୁ ଉଦ୍ଧର୍ବ ବ୍ୟକ୍ତିଙ୍କ ଦସ୍ତଖତ ସମ୍ବଳିତ ଏକ ଦାବିପତ୍ର ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ ନିକଟକୁ ପଠାଯାଇଥିଲା। ଡାକ୍ତର ରାଉଳଙ୍କ ବଦଳି ନ କରିବା ଲାଗି ବ୍ଲକର ଆଶାକର୍ମୀ ମାନେ ଏକାଠି ହୋଇ ଧାରଣାରେ ବସିଥିଲେ। ଉମରକୋଟ ପରି ଉପାନ୍ତ ଅଞ୍ଚଳରେ ଜଣେ ମାତ୍ର ସ୍ତ୍ରୀ ଓ ପ୍ରସୂତି ବିଶେଷଜ୍ଞ ରହିଥିବା ବେଳେ ସେ ୪ଟି ବ୍ଲକ ଦାୟିତ୍ୱ ବୁଝୁଛନ୍ତି। ଯଦି ତାଙ୍କ ବଦଳି ହୁଏ ତେବେ ଉମରକୋଟ ବ୍ଲକର ସମସ୍ତ ଆଶାକର୍ମୀ ଚାକିରି ଛାଡିବେ ବୋଲି ସଂଘ ପକ୍ଷରୁ ଚେତାବନୀ ଦେଇଥିଲେ। ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ ଡାକ୍ତରଙ୍କ ବଦଳି ହେଲେ ଅନେକ ସମସ୍ୟା ଦେଖାଦେବ। ଏହାକୁ ନେଇ ରାଜନୀତି ନ କରିବା ପାଇଁ ପରାମର୍ଶ ଦେଇଥିଲେ। ଘଟଣାକୁ ନେଇ ଡାକ୍ତର ରାଉଳଙ୍କୁ ପଚାରିବାରୁ ତାଙ୍କ ବିରୋଧରେ ଷଡଯନ୍ତ୍ର କରାଯାଉଛି ବୋଲି କହିଛନ୍ତି। ଗତ ଏପ୍ରିଲ ୨୦୨୨ଠାରୁ ମାର୍ଚ୍ଚ ୨୦୨୩ ପର୍ଯ୍ୟନ୍ତ ୩୬୪୯ ଅଲ୍ଟ୍ରାସାଉଣ୍ଡ ,୪୫୭ ରୋଗୀଙ୍କୁ ଇ-ସଞ୍ଜିବନୀ ଯୋଜନାରେ ଅନ୍ଲାଇନରେ ଚିକିତ୍ସା ସେବା ଯୋଗାଇଛି। ୨୦୨୨-୨୩ରେ ଉମରକୋଟ ସ୍ବାସ୍ଥ୍ୟକେନ୍ଦ୍ରରେ ୪୬୫୬ ରୋଗୀ ପ୍ରସୂତି ହୋଇଛନ୍ତି। ସେଥିରୁ ୫୯୭ ମା’ଙ୍କ ଅସ୍ତ୍ରୋପଚାର କରାଯାଇଛି। ୪ଟି ବ୍ଲକରେ ୨୩୦୭ ଜଣଙ୍କୁ ଫାମିଲି ପ୍ଲାନିଂ ଅସ୍ତ୍ରୋପଚାର କରିଛି। ଉମରକୋଟରୁ ପ୍ରାୟ ୩୦୦ ରୋଗୀଙ୍କୁ ନବରଙ୍ଗପୁର ସ୍ଥାନାନ୍ତର କରାଯାଇଛି। ଏଥିରୁ ୨ ଜଣ ରୋଗୀଙ୍କ ମୃତ୍ୟୁ ହୋଇଛି ବୋଲି ଡାକ୍ତର ରାଉଳ କହିଥିଲେ। ଧାରଣାସ୍ଥଳରେ ଅତିରିକ୍ତ ଜିଲା ମୁଖ୍ୟ ଚିକିତ୍ସା ଅଧିକାରୀ (ଏଡିଏମଓ) ମଳୟ କୁମାର ତ୍ରିପାଠୀ ପହଞ୍ଚି ଦୀର୍ଘ ସମୟ ପୃଥକ ଭାବେ ସେମାନଙ୍କ ସହ ଆଲୋଚନା କରି ଲିଖିତ ପ୍ରତିଶ୍ରୁତି ଦେବା ପରେ କଂଗ୍ରେସ, ଆଶାକର୍ମୀ ଓ ନାଗରିକ ମଞ୍ଚର ଧାରଣା ପ୍ରତ୍ୟାହୃତ ହୋଇଛି।
ଦୀର୍ଘ ସମୟ ଧାରଣା ପରେ ଏଡିଏମଓ ତ୍ରିପାଠୀ ପହଞ୍ଚି କଂଗ୍ରେସ ନେତା ମାନଙ୍କ ସହ ଆଲୋଚନା କରିଥିଲେ। ସେମାନେ ତୁରନ୍ତ ଡାକ୍ତରଙ୍କ ବଦଳି ଦାବି କରିଥିଲେ। ଆସନ୍ତା ୨ ତାରିଖ ସୁଦ୍ଧା ଜିଲାପାଳ ଓ ଜିଲା ମୁଖ୍ୟ ଚିକିତ୍ସାଧିକାରୀଙ୍କ ସହ ଆଲାଚନା କରି ନିଷ୍ପତ୍ତିି ନିଆଯିବ ବୋଲି ଲିଖିତ ପ୍ରତିଶ୍ରୁତି ଦେବା ପରେ କଂଗେସ ଧାରଣାରୁ ଓହରିଥିଲା। ପରେ ଏଡିଏମଓ ଧାରଣାରତ ଆଶାକର୍ମୀମାନଙ୍କ ପାଖରେ ପହଞ୍ଚି ଲିଖିତ ଦାବି ଦିଅନ୍ତୁ ବୋଲି କହିଥିଲେ। ସେହିପରି ଉମରକୋଟ ନାଗରିକ ମଞ୍ଚ ଡକ୍ଟର ରାଉଳଙ୍କୁ ବଦଳି ନକରିବା ପାଇଁ ଦେଇଥିବା ଦାବୀପତ୍ର ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ପ୍ରଦାନ କରି ଆସନ୍ତା ୭ ଦିନ ମଧ୍ୟରେ ବିହିତ ପଦକ୍ଷେପ ନିଆଯିବ ବୋଲି ଏଡିଏମଓ ଲିଖିତ ପ୍ରତିଶ୍ରୁତି ଦେବା ପରେ ନାଗରିକ ମଞ୍ଚ ଧାରଣାରୁ ଓହରିଛି। ଉମରକୋଟ ପୋଲିସ ଉପଖଣ୍ଡ ଅଧିକାରୀ ଶୁଭେନ୍ଦୁ ଶବର, ଆଇଆଇସି ଗୋବିନ୍ଦଚନ୍ଦ୍ର ବୁରୁଦା ଉମରକୋଟ ଅତିରିକ୍ତ ତହସିଲଦାର ଉମେଶ ପୁଜାରୀ ଓ ଫୋର୍ସ ଘଟଣା ସ୍ଥଳରେ ଉପସ୍ଥିତ ଥିଲେ।
