ନୂଆଦିଲ୍ଲୀ, ୩ା୭- ଭାରତ ସହ ଫ୍ରାନ୍ସର ୫୯ ହଜାର କୋଟି ଟଙ୍କାର ରାଫେଲ ଫାଇଟର ଜେଟ୍ ଚୁକ୍ତିରେ ଦୁର୍ନୀତି ଓ ପକ୍ଷପାତିତା ଅଭିଯୋଗର ତଦନ୍ତ ଆରମ୍ଭ ହୋଇଛି। ଏହାର ତଦନ୍ତ ପାଇଁ ଜଣେ ଫ୍ରେଞ୍ଚ ଜଜ୍ଙ୍କୁ ନିଯୁକ୍ତ କରାଯାଇଛି। ଏ ନେଇ ଫ୍ରାନ୍ସର ତଦନ୍ତକାରୀ ଓ୍ବେବସାଇଟ୍ ମିଡିଆପାର୍ଟରେ ପ୍ରକାଶ ପାଇଛି ଏକ ରିପୋର୍ଟ।
ଏହାପରେ କଂଗ୍ରେସ ଓ ଭାଜପା ମଧ୍ୟରେ ଆରମ୍ଭ ହୋଇଯାଇଛି ବାକ୍ଯୁଦ୍ଧ। କଂଗ୍ରେସ ମୁଖ୍ୟ ପ୍ରବକ୍ତା ରଣଦୀପ ସୁରଜଓ୍ବୋଲା କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଗେଇ ଆସି ରାଫେଲ ଚୁକ୍ତି ଉପରେ ଯୁଗ୍ମ ସଂସଦୀୟ କମିଟି (ଜେପିସି) ତଦନ୍ତ ନିର୍ଦ୍ଦେଶ ଦିଅନ୍ତୁ। ୫୯ ହଜାର କୋଟି ଟଙ୍କାର ଚୁକ୍ତିରେ ଦୁର୍ନୀତି ହୋଇଥିବା ସ୍ପଷ୍ଟ ହୋଇଛି। ଫ୍ରେଞ୍ଚ ସରକାର ତଦନ୍ତ ନିର୍ଦ୍ଦେଶ ଦେବା ପରେ ପ୍ରମାଣିତ ହୋଇଛି କଂଗ୍ରେସ ଓ ରାହୁଲ ଗାନ୍ଧୀଙ୍କ ଦାବିରେ ସତ୍ୟତା ଥିଲା।
କଂଗ୍ରେସର ଦାବି ପରେ ପାଲଟା ଜବାବ ଦେଇଛି ଭାଜପା। ”ମିଛ କହିବା କଂଗ୍ରେସର ପୁରୁଣା ଅଭ୍ୟାସ। ଏବେ ରାଫେଲ ଚୁକ୍ତି ସମ୍ପର୍କରେ ମିଛ କହୁଛି କଂଗ୍ରେସ। ଫ୍ରାନ୍ସର ଏକ ଏନ୍ଜିଓ (ଶେରପା) ଅଭିଯୋଗ ଆଣିବା ପରେ ଏହାର ଆର୍ଥିକ ପ୍ରସିକ୍ୟୁଶନ ବିଭାଗ ତଦନ୍ତ ନିର୍ଦ୍ଦେଶ ଦେଇଛି। ଏହାକୁ ଦୁର୍ନୀତି କୁହାଯିବା ଉଚିତ୍ ନୁହେଁ“ ବୋଲି ଭାଜପା ନେତା ସମ୍ବିତ ପାତ୍ର କହିଛନ୍ତି। ରାଫେଲ ଚୁକ୍ତିରେ ସରକାରଙ୍କ ଉପରେ ଅଭିଯୋଗ କରିବା ପାଇଁ ଗାନ୍ଧୀ ପରିବାରକୁ କମିଶନ ମିଳିଥିବା ସେ ଅଭିଯୋଗ କରିଛନ୍ତି।
ଦୁଇ ଦେଶର ସରକାରଙ୍କ ମଧ୍ୟରେ ୨୦୧୬ରେ ହୋଇଥିବା ଚୁକ୍ତିରେ ତଦନ୍ତ ପ୍ରକ୍ରିୟା ଜୁନ ୧୪ରୁ ଆରମ୍ଭ ହୋଇଛି। ୨୦୧୬ରେ ଡାସଲ୍ଟ ଦ୍ୱାରା ନର୍ମିତ ୩୬ ରାଫେଲ ଫାଇଟର ଜେଟ୍ ଭାରତକୁ ଯୋଗାଇବା ପାଇଁ ଫ୍ରାନ୍ସ ସହ ୭.୮ ବିଲିୟନ ୟୁରୋର ଚୁକ୍ତି କରିଥିଲା। ଏଥିରେ ଦୁର୍ନୀତି ସନ୍ଦେହରେ ତଦନ୍ତ ଆରମ୍ଭ ହୋଇଥିବା ମିଡିଆପାର୍ଟରେ ଉଲ୍ଲେଖ ରହିଛି।
