ବାଙ୍କୀ,୨ା୬(ସ୍ବ.ପ୍ର.): ବାଙ୍କୀ ଡମପଡ଼ା ବ୍ଲକ ଅନ୍ତର୍ଗତ ରଗଡ଼ି ପଞ୍ଚାୟତର ସିଟି ସ୍କୁଲଠାରୁ ମହିଳା କଲେଜ ପର୍ଯ୍ୟନ୍ତ ରାସ୍ତା ନିର୍ମାଣ କରାଯାଇଛି। ଏଥିରେ ଅନିୟମିତତା ହୋଇଥିବା ନେଇ ଅଭିଯୋଗ ହେବାପରେ ସୂଚନା ଫଳକ ଲଗାଯାଇଥିଲା। ମାତ୍ର ୨୪ ଘଣ୍ଟା ନ ପୂରୁଣୁ ସୂଚନା ଫଳକ ଭଙ୍ଗା ଯାଇଥିବା ଦେଖିବାକୁ ମିଳିଛି।
ରାସ୍ତାପାଇଁ ୭ ଲକ୍ଷରୁ ଊର୍ଦ୍ଧ୍ୱ ଟଙ୍କା ୨ଟି ଯୋଜନାରେ ବ୍ୟୟବରାଦ ହୋଇଛି। ମାତ୍ର କାମଟି ୮ ଇଞ୍ଚର ସ୍ଥାନରେ ୪ ଇଞ୍ଚର ହୋଇଥିବା ଅଭିଯୋଗ ଆସିଥିଲା। ଏଥିସହିତ ରାସ୍ତା ନିର୍ମାଣସ୍ଥଳରେ ୫ ଲକ୍ଷର ସୂଚନା ଫଳକ ଲଗାଯାଇଥିବା ଦେଖିବାକୁ ମିଳିଥିଲା। ଯାହାକୁ ନେଇ ଗତ ମାସ ୨୯ ତାରିଖରେ ଡମପଡ଼ା ବ୍ଲକ କାର୍ଯ୍ୟାଳୟରେ ଅନୁଷ୍ଠିତ ଜିଲାପାଳଙ୍କ ଜନଶୁଣାଣିରେ ଗ୍ରାମର ଆଶିଷ ମହାପାତ୍ରଙ୍କ ସହିତ ଅନ୍ୟକେତେଜଣ ଯୁବକ ଲିଖିତ ଅଭିଯୋଗ କରିଥିଲେ। ଅଭିଯୋଗରେ ବିଭାଗୀୟ ଯନ୍ତ୍ରୀ ନିମ୍ନମାନର କାର୍ଯ୍ୟକରି ଅର୍ଥ ହଡ଼ପ କରିଥିବା ଉଲ୍ଲେଖ ଥିଲା। ଏଥିସହିତ ୭ ଲକ୍ଷ ଟଙ୍କା ବଦଳରେ ୫ ଲକ୍ଷର ସୂଚନା ଫଳକ କେଉଁଥି ପାଇଁ ଲଗାଗଲା ବୋଲି ଦାବିପତ୍ରରେ ପ୍ରଶ୍ନ କରାଯାଇଥିଲା। ମାତ୍ର ଅଭିଯୋଗର ପରଦିନ ଅର୍ଥାତ ଗତ ମାସ ୩୦ ତାରିଖରେ ହଠାତ୍ ତରବରିଆ ଭାବେ ରାତିଅଧିଆ ଫଳକ ଲେଖାଯାଇଥିବା ଦେଖିବାକୁ ମିଳିଥିଲା। ଯେଉଁଥିରେ ଅଟକଳ ମୂଲ୍ୟ ୨, ୦୨, ୩୫୨ ଟଙ୍କା ବୋଲି ଉଲ୍ଲେଖ କରାଯିବା ସହ ବିଭାଗୀୟ ଅଧିକାରୀ କାର୍ଯ୍ୟ କରିଥିବା ଦର୍ଶାଯାଇଥିଲା। ଏ ସମ୍ପର୍କରେ ଖବର ପାଇ ଅଭିଯୋଗକାରୀ ଫଟୋ ଉତ୍ତୋଳନ କରିଥିଲେ। ଏହାପରେ ୩୧ ତାରିଖ ସକାଳୁ ସୂଚନା ଫଳକ ଭାଙ୍ଗି ପଡ଼ିଥିବା ଦେଖିବାକୁ ମିଳିଥିଲା, ଯାହାକୁ ନେଇ ନାନା ପ୍ରଶ୍ନବାଚୀ ସୃଷ୍ଟି ହୋଇଛି। ଦୁର୍ନୀତି ହୋଇଥିବାରୁ ଦୋଷ ଲୁଚାଇବା ପାଇଁ ତରବରିଆ ଭାବେ ସୂଚନା ଫଳକ ଲଗାଯାଇଥିଲା। ପରବର୍ତ୍ତୀ ସମୟରେ ତଦନ୍ତକୁ ବାଟବଣା କରିବା ପାଇଁ ଫଳକ ଭଙ୍ଗାଯାଇଛି ବୋଲି ଅଭିଯୋଗକାରୀ ଦର୍ଶାଇଛନ୍ତି। ତେଣୁ ଦୁର୍ନୀତିରେ ସମ୍ପୃକ୍ତ ବ୍ୟକ୍ତି ବିଶେଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଗ୍ରାମର ସଚେତନ ଯୁବକମାନେ ଦାବି କରିଛନ୍ତି।
