କୋରାପୁଟ,୩୦।୧୨(ଅମିତାଭ ବେହେରା ): କୋରାପୁଟ ଜିଲାର ଜୟପୁର ବ୍ଲକର ଟାଙ୍କୁଆ ପଞ୍ଚାୟତରେ ସମ୍ପୂର୍ଣ ମଦ ବନ୍ଦ କରିବା ପାଇଁ ଅଣ୍ଟା ଭିଡିଛନ୍ତି ମହିଳା। ସୋମବାର ଜିଲାସ୍ତରୀୟ ଅଭିଯୋଗ ଶୁଣାଣିକୁ ଆସିଥିବା ସ୍ବୟଂ ସହାୟକ ଦଳର ମହିଳାମାନେ ଆରକ୍ଷୀ ଅଧିକ୍ଷକଙ୍କୁ ଘେରି ନିବେଦନ କରିଛନ୍ତି। ଜିଲାସ୍ତରୀୟ ଅଭିଯୋଗ ଶୁଣାଣି ସ୍ଥାନୀୟ ଦକ୍ଷତା ବୃଦ୍ଧି ତାଲିମ କେନ୍ଦ୍ରଠାରେ ଚାଲିଥିବା ବେଳେ କୋରାପୁଟ ଜିଲା ଜୟପୁର ବ୍ଲକର ଟାଙ୍କୁଆ ପଞ୍ଚାୟତର ମା ତାରିଣୀ , ମା ମଙ୍ଗଳା , ନଡ଼ିଆ ରାଣୀ ଆଦି ବହୁ ସ୍ବୟଂ ସହାୟକ ଦଳର ମହିଳା ଅଭିଯୋଗ ଶୁଣାଣିରେ ପହଞ୍ଚି ଥିଲେ। ଏହି ସମୟରେ ଆରକ୍ଷୀ ଅଧିକ୍ଷକ ରୋହିତ ବର୍ମା କୌଣସି କାର୍ଯ୍ୟରେ ଚାଲିଯାଉଥିବା ବେଳେ ମହିଳାମାନେ ତାଙ୍କୁ ଘେରାଉ କରିବା ସହ ପଞ୍ଚାୟତରେ ଅବାଧରେ ଏବଂ ବେଆଇନ ଭାବେ ଦେଶୀ ଓ ବିଦେଶୀ ମଦକୁ ବନ୍ଦ କରିବାକୁ କହିଥିଲେ।
ବର୍ଷ ବର୍ଷ ଧରି ମଦ ବିକ୍ରି ଚାଲିଥିବାରୁ ଯୁବକମାନେ ଅଧ୍ୟୟନ ଛାଡି ମଦ୍ୟପାନ କରି ସେମାନଙ୍କ ଭବିଷ୍ୟତ ଅନ୍ଧାର ଆଡକୁ ଯାଉଛି। ଏପରିକି ମଦ ପିଇ ଅନେକ ମୃତ୍ୟୁ ବରଣ ମଧ୍ୟ କରୁଛନ୍ତି। ସେହିଭଳି ଘରୋଇ ହିଂସା ବୃଦ୍ଧିପାଇବା, ଏମିତିକି ଗତ ବର୍ଷକ ମଧ୍ୟରେ ମଦ ପିଇ ୭ ଜଣଙ୍କର ମୃତ୍ୟୁ ହୋଇଥିବା ଆଦି ଅଭିଯୋଗ ପତ୍ରରେ ଦର୍ଶାଇଛନ୍ତି। ତୁରନ୍ତ ଏହାକୁ ବନ୍ଦକରିବା ପାଇଁ ନିବେଦନ କରି, ତେବେ ଯଦି ବନ୍ଦ କରାନଯାଏ ତେବେ ବାଧ୍ୟହୋଇ ଆଇନକୁ ହାତକୁ ନେବା ସହ ଯାହା ଅଘଟଣ ଘଟିବ ସେଥିପାଇଁ ପ୍ରଶାସନ ଦାୟୀ ରହିବ ବୋଲି କହିଛନ୍ତି। ଏଣୁ ଏ ଦିଗରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ଚଢ଼ାଉ କରାଯାଇ ବେଆଇନ ମଦ ବିକ୍ରିକୁ ବନ୍ଦ କରିବାକୁ ଅଧିକ୍ଷକ ବର୍ମା ପ୍ରତିଶ୍ରୁତି ଦେଇଛନ୍ତି। ଅଭିଯୋଗପତ୍ର ପ୍ରଦାନ ବେଳେ ବିମଳା ଗୌଡ଼ , ରାଜଶ୍ରୀ ପାଣିଗ୍ରାହୀ , ଗୌରୀ ପାଲମା , ସବିତା ଗୋଲରି , ଯମୁନା ମାଝୀ , ସୁନାମଣୀ ଭୂମିଆ, ହସବତୀ ଗୌଡ଼ , ଜୟନ୍ତୀ ଗୌଡ଼, ପୂର୍ଣିମା ସାହୁ ନବୀନା ଗୌଡ଼, ରାଧା ଫାଲମାଙ୍କ ସହ ବହୁ ମହିଳା ଉପସ୍ଥିତ ଥିଲେ।
