ଭଞ୍ଜନଗର,୧୭।୭(ବାବୁଲା ପ୍ରଧାନ):ବାଲେଶ୍ୱର ଛାତ୍ରୀ ସୌମ୍ୟାଶ୍ରୀ ବିଶିଙ୍କ ଆତ୍ମହତ୍ୟାକୁ ନେଇ ରାଜ୍ୟ ରାଜନୀତି ପଡୁଛିଉଠୁଛି। ଏହିଭଳି ପରିସ୍ଥିତିରେ ଗୁରୁବାର କଂଗ୍ରେସ ସମେତ ୮ଟି ରାଜନୈତିକ ଦଳ ପକ୍ଷରୁ ଓଡ଼ିଶା ବନ୍ଦ ଡାକରା ଦିଆଯାଇଥିଲା। ଏହାର ପ୍ରଭାବ ମଧ୍ୟ ଭଞ୍ଜନଗରରେ ଦେଖିବାକୁ ମିଳିଛି।
ଭଞ୍ଜନଗର ବନ୍ଦ ଶାନ୍ତିପୂର୍ଣ୍ଣ ଭାବେ ସଫଳ ହୋଇଛି। ସରକାରୀ କାର୍ଯ୍ୟାଳୟ, ଦୋକାନ, ବଜାର ବନ୍ଦ ଥିଲା। କିନ୍ତୁ କଂଗ୍ରେସଗର ଦୁଇଟିଗୋଷ୍ଠୀ ଅଲଗା ଅଲଗା ବନ୍ଦ ସଫଳ ପାଇଁ ଚେଷ୍ଟା କରିଥିଲେ। ନିକଟରେ ବିଜେଡ଼ି ଛାଡ଼ି କଂଗ୍ରେସରେ ମିଶିଥିବା ପୂର୍ବତନ ଭଞ୍ଜନଗର ବ୍ଲକ ଯୁବ ବିଜେଡ଼ି ସଭାପତି କୁଲୁ ଭୂୟାଁଙ୍କ ନେତୃତ୍ୱରେ ତାଙ୍କ ସମର୍ଥକମାନେ ବାଉଁଶଲୁଣ୍ଡି ବାଇପାସ ଛକରୁ ଏକ ରାଲିରେ ବାହାରି ଲୋକଙ୍କୁ ବନ୍ଦକୁ ସମର୍ଥନ କରିବା ପାଇଁ ସହଯୋଗ କାମନା କରିଥିଲେ। ଏଥିସହ କୁଲୁ ସମର୍ଥକ ବାଉଁଶ ଲୁଣ୍ଡି ବାଇପାସ ଛକରେ ଆଜି ଅପରାହ୍ନ ୩ଟା ପର୍ଯ୍ୟନ୍ତ ଆନ୍ଦୋଳନ ଚଳାଇଛନ୍ତି। ସେହିଭଳି ପ୍ରଶାନ୍ତ ବିଷୋୟୀଙ୍କ ନେତୃତ୍ୱରେ ଆଉ ଗୋଟିଏ ଗୋଷ୍ଠୀ ଅଲଗା ସହରରେ ବୁଲି ବିକ୍ଷୋଭ ପ୍ରଦର୍ଶନ କରିଥିଲେ। ଏଥିସହ ଲୋକଙ୍କୁ ବନ୍ଦକୁ ସମର୍ଥନ ଦେବାପାଇଁ ନିବେଦନ କରିଥିଲେ। ଦୀର୍ଘଦିନ ପରେ ଭଞ୍ଜନଗର କଂଗ୍ରେସ ଆନ୍ଦୋଳନରେ ଟିକେ ଅଧିକ ଭିଡ ଥିବା ଦେଖିବାକୁ ମିଳିଥିଲା। ଉଭୟ ଆନ୍ଦୋଳନରେ କୁଲୁ ଭୂୟାଁ, ପ୍ରଶାନ୍ତ ବିଷୋୟୀ, ବାମପନ୍ଥୀ ନେତା ସୋମନାଥ ନାୟକ, ଅଭିମନ୍ୟୁ ଗୌଡ଼ ପ୍ରମୁଖ ସାମିଲ ଥିଲେ।
୧୨ ଘଣ୍ଟିଆ ବନ୍ଦ ଶାନ୍ତିପୂର୍ଣ୍ଣ ଭାବେ ପାଳନ କରାଯାଇଛି। କୌଣସି ସ୍ଥାନରେ ହିଂସାକାଣ୍ଡ ଘଟି ନଥିବା ଜଣାପଡିଛି। କମ୍ୟୁନିଷ୍ଟ ପାର୍ଟି ନେତା ଏବଂ କଂଗ୍ରେସ କର୍ମୀମାନେ ଭଞ୍ଜନଗର ସହରର ସମସ୍ତ ପ୍ରବେଶ ପଥ ଯଥା ବେଲଗୁଣ୍ଠା ରୋଡ଼, ବ୍ଲକ ଛକ, ଚକରା ବିଷୋୟୀ ବାଇପାସ ରୋଡ଼, ବଡ଼ କୋଦଣ୍ଡା ଛକ ଗୁଡିକରେ ପିକେଟିଂ କରିବା ସହ ସମସ୍ତ ସରକାରୀ ଓ ବେସରକାରୀ କାର୍ଯ୍ୟାଳୟ,ବ୍ୟାଙ୍କ, ପୋଷ୍ଟ ଅଫିସ ଆଦି ବନ୍ଦ କରିଥିଲେ। ପ୍ରଗତିଶୀଳ ଗଣତାନ୍ତ୍ରିକ ସାମ୍ମୁଖ୍ୟର ଆବାହକ ଓ ବରିଷ୍ଠ ଆଇନଜୀବି ସୋମନାଥ ନାୟକ, କଂଗ୍ରେସ ବିଧାୟକ ପ୍ରାର୍ଥୀ ପ୍ରଶାନ୍ତ କୁମାର ବିଷୋୟୀ, ପିସିସି ସଭ୍ୟ ଦେବୀ ପ୍ରସାଦ ବିଷୋୟୀ,ସୁକାନ୍ତ କୁମାର ଦିଗାଲ,ବିଦ୍ୟାଧର ପ୍ରଧାନ,କୁଲୁ ଭୂୟାଁ, ଆଇନଜୀବୀ ଅଭିମନ୍ୟୁ ଗୌଡ଼,ସିପିଆଇ(ଏମ-ଏଲ)ର ଜିଲ୍ଲା ସମ୍ପାଦକ ନିରାକାର ନାୟକ ଓ ଅନ୍ୟମାନେ ବିଭିନ୍ନ ସ୍ଲୋଗାନ ଦେଇ ସହର ପରିକ୍ରମା କରିଥିଲେ।
