ଦାରିଙ୍ଗବାଡ଼ି,୮ା୮(ଅରୁଣ ସାହୁ): ବ୍ରାହ୍ମଣୀଗାଁଠାରେ ଛାତ୍ରୀ ଓ ମହିଳା ନିର୍ଯାତନାକୁ ରୋକିବା ପାଇଁ ରାଜ୍ୟ ସରକାରଙ୍କ ଅହେତୁକ ବିଳମ୍ବ ଓ ଆଇନଶୃଙ୍ଖଳା ପରିସ୍ଥିତି ବିପର୍ଯ୍ୟୟ ପ୍ରତିବାଦରେ ଯୁବ ଓ ଛାତ୍ର ବିଜେଡି ପକ୍ଷରୁ ବୁଧବାର ଏକ ସଭା ଓ ଶୋଭାଯାତ୍ରା ଅନୁଷ୍ଠିତ ହୋଇଥିଲା। କଲେଜ ନିକଟରୁ ଏହି ଶୋଭାଯାତ୍ରା ବାହାରି ଥାନାରେ ପହଞ୍ଚିଥିଲା ଏବଂ ସେଠାରେ ପୋଲିସ ମହାନିର୍ଦ୍ଦେଶକଙ୍କ ଉଦ୍ଦେଶ୍ୟରେ ଆଇଆଇସିଙ୍କୁ ସ୍ମାରକପତ୍ର ପ୍ରଦାନ କରାଯାଇଥିଲା। ତେବେ ଏକ ନିର୍ଦ୍ଦିଷ୍ଟ ରାଜନୈତିକ ଦଳରେ କଲେଜ ଛାତ୍ରୀଛାତ୍ରଙ୍କୁ ସାମିଲ କରାଇବା ଏବଂ ବିରୋଧୀ ଦଳର ନେତାଙ୍କ ପୋଷ୍ଟର ପ୍ଲାକାର୍ଡ ଧରି ରାଜ୍ୟର ମୁଖ୍ୟମନ୍ତ୍ରୀ, ଆଇନମନ୍ତ୍ରୀ, ଉଚ୍ଚ ଶିକ୍ଷାମନ୍ତ୍ରୀଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏହାକୁ ଭାଜପା ନିନ୍ଦା କରିବା ସହ ଋଷିମାଳ ଉଚ୍ଚ ମାଧ୍ୟମିକ ବିଦ୍ୟାଳୟ ଏବଂ ମହାବିଦ୍ୟାଳୟର ଅଧ୍ୟକ୍ଷଙ୍କ ନାମରେ ଥାନାରେ ଅଭିଯୋଗ କରିଥିଲେ। ଏଥିରେ ଋଷିମାଳ ମହାବିଦ୍ୟାଳୟର ଅଧ୍ୟକ୍ଷ ଡଃ ଭାସ୍କର ନାୟକ ମୁହଁ ଖୋଲି ଏକ ପ୍ରେସ୍ ଇସ୍ତାହାରରେ ପ୍ରକାଶ କରିଛନ୍ତି। ସେ ସେଥିରେ ଉଲ୍ଲେଖ କରିଛନ୍ତି ଯେ, ଏକ ରାଜନୈତିକ ରାଲିରେ ଋଷିମାଳ ଡିଗ୍ରୀ ମହାବିଦ୍ୟାଳୟର ଛାତ୍ରୀଛାତ୍ରଙ୍କ ଉପସ୍ଥିତି ସମ୍ପର୍କରେ ମିଥ୍ୟା ପ୍ରଚାର କରାଯାଉଥିବା ଜଣାଇଛନ୍ତି। ଚଳିତ ବୁଧବାର ଏକ ନିର୍ଦ୍ଦିଷ୍ଟ ରାଜନୈତିକ ଦଳ ଦ୍ବାରା ଆୟୋଜିତ ଏକ ରାଜନୈତିକ ରାଲିରେ ଋଷିମାଳ ଡିଗ୍ରୀ ମହାବିଦ୍ୟାଳୟ, ବ୍ରାହ୍ମଣୀ ଗାଁର ଛାତ୍ରୀଛାତ୍ର ଅଂଶଗ୍ରହଣ କରିଥିବା ବିଷୟ ଏବଂ ସେଥିରେ ମୋର ସମ୍ପୃକ୍ତି ଥିବା ବିଷୟ କୁହାଯାଉଥିବା ଜାଣି ମାନସିକ ଭାବେ ଅତ୍ୟନ୍ତ ମର୍ମାହତ ଅନୁଭବ କରିଥିବା ସେ ଇସ୍ତାହାରରେ ଉଲ୍ଲେଖ କରିଛନ୍ତି।
ସେହିଦିନ ପ୍ରାୟ ୧.୩୦ ଅପରାହ୍ନରେ କଲେଜ ପରିସରରୁ ରାଲି ଅନୁଷ୍ଠିତ ହୋଇଥିଲା ବୋଲି ଅଭିଯୋଗରେ ସେ କହିଛନ୍ତି ଯେ, ଏହିଭଳି କୌଣସି କାର୍ଯ୍ୟକ୍ରମ କଲେଜ ପରିସରରେ ଅନୁଷ୍ଠିତ ହୋଇନାହିଁ। ଉକ୍ତ ଦିନ ବ୍ରହ୍ମପୁର ବିଶ୍ବବିଦ୍ୟାଳୟ ଦ୍ବାରା ଦିଆଯାଇଥିବା କାର୍ଯ୍ୟସୂଚୀ ଅନୁଯାୟୀ ଋଷିମାଳ ଡିଗ୍ରୀ ମହାବିଦ୍ୟାଳୟରେ +୩ ଛାତ୍ରୀଛାତ୍ରଙ୍କ ପାଇଁ ପରୀକ୍ଷା ଅନୁଷ୍ଠିତ ହୋଇଥିଲା। ପରୀକ୍ଷା ପାଇଁ ପ୍ରାୟ ୨ ଘଣ୍ଟାର ଆବଶ୍ୟକୀୟ ପ୍ରସ୍ତୁତି ପରେ ଯାଞ୍ଚ ପ୍ରକ୍ରିୟା ଅନୁସରଣ କରି ଛାତ୍ରୀଛାତ୍ରଙ୍କୁ ପରୀକ୍ଷା ହଲ୍ ଭିତରକୁ ପ୍ରବେଶ କରିବାକୁ ଦିଆଯାଇଥିଲା। ଅପରାହ୍ନ ୨ଟାରୁ ପ୍ରାୟ ୫ଟା ପର୍ଯ୍ୟନ୍ତ ପରୀକ୍ଷା ଚାଲିଥିଲା। ବ୍ରହ୍ମପୁର ବିଶ୍ବବିଦ୍ୟାଳୟ ଦ୍ବାରା ପ୍ରେରିତ ସ୍କ୍ବାଡ୍ ଏହି ପରୀକ୍ଷା ସମୟରେ ଉପସ୍ଥିତ ଥିଲେ। ମୁଁ ଏବଂ କଲେଜର ସମସ୍ତ କର୍ମଚାରୀ ପରୀକ୍ଷା ପରିଚାଳନାରେ ସମ୍ପୂର୍ଣ୍ଣ ନିୟୋଜିତ ଥିଲୁ। ତେଣୁ ତାଙ୍କ ମହାବିଦ୍ୟାଳୟର କୌଣସି ଛାତ୍ରୀଛାତ୍ର ସେହି ରାଜନୈତିକ ଦଳରେ ସାମିଲ ହୋଇ ନ ଥିବା ମହାବିଦ୍ୟାଳୟର ଅଧ୍ୟକ୍ଷ ଡଃ ଭାସ୍କର ନାୟକ କହିଛନ୍ତି।
ସୂଚନାଯୋଗ୍ୟ, ଘଟଣାକୁ ନେଇ ବ୍ରାହ୍ମଣୀଗାଁ ଭାଜପା ପକ୍ଷରୁ ଅଧ୍ୟକ୍ଷଙ୍କ ନାମରେ ଥାନାରେ ଲିଖିତ ଅଭିଯୋଗ ହୋଇଛି। ଏହାର ନିରପେକ୍ଷ ତଦନ୍ତ ପାଇଁ ଭାଜପା ପକ୍ଷରୁ ପୋଲିସକୁ ନିବେଦନ କରାଯାଇଛି।
