ନୂଆଦିଲ୍ଲୀ,୧୧।୧: ଟିମ୍ ଇଣ୍ଡିଆର କୋଚ୍ ଭାବେ ଦାୟିତ୍ୱ ସମ୍ପାଦନ କରୁଛନ୍ତି ରାହୁଲ ଦ୍ରାବିଡ। ହେଲେ କ’ଣ ଆପଣ ଦ୍ରାବିଡଙ୍କ କୋଚ୍ଙ୍କୁ ଜାଣନ୍ତି, ଯିଏ କି ତାଙ୍କୁ ଭାରତୀୟ ଟିମ୍ ଲାଗି ଖେଳିବା ଲାଗି ସଠିକ୍ ମାର୍ଗଦର୍ଶନ ଦେଇଥିଲେ। ହୁଏତ ନା। କହିରଖିବୁ, ସେ ହେଉଛନ୍ତି କେକି ତାରାପୋର। ତେବେ ଦ୍ରାବିଡ ତାଙ୍କର ଏକମାତ୍ର ଶିଷ୍ୟ ନୁହନ୍ତି। ବି.ଏସ ଚନ୍ଦ୍ରଶେଖର, ଇଏସ ପ୍ରସନ୍ନ, ବିଶ୍ୱନାଥ, ସୟଦ କିର୍ମାନି, ସଦାନନ୍ଦ ବିଶ୍ୱନାଥ ଏବଂ ଅନିଲ କୁମ୍ବଲେଙ୍କ ଭଳି ଖେଳାଳିଙ୍କ ବିକାଶ ତଥା ଗ୍ରୁମିଂରେ ତାରାପୋର ଏକ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଥିଲେ।
ଯେଉଁଭଳି ଭାବେ ଭାରତୀୟ କ୍ରିକେଟରେ ଦ୍ରାବିଡ ଅନେକ ଭୂମିକାରେ ନଜର ଆସିଛନ୍ତି, ସେହିଭଳି ତାଙ୍କ କୋଚ୍ କେକି ତାରାପୋର ଜଣେ ଖେଳାଳି ବ୍ୟତୀତ ଅନ୍ୟ ଭୂମିକାରେ ମଧ୍ୟ ଯୋଗଦାନ ଦେଇଥିଲେ। କ୍ରିକେଟରୁ ଅବସର ନେବା ପରେ ସେ ଜଣେ ପ୍ରଶାସକ ତଥା ପରିଚାଳକ ଭାବରେ ଭାରତୀୟ କ୍ରିକେଟ ସହିତ ଜଡିତ ରହିଲେ। ସେ ୧୯୬୭ ମସିହାରେ ଇଂଲଣ୍ଡରେ ଏବଂ ୧୯୭୧ରେ ୱେଷ୍ଟଇଣ୍ଡିଜରେ ପ୍ରଥମ ଥର ପାଇଁ ଟେଷ୍ଟ ସିରିଜ ଜିତିଥିବା ଟିମ ଇଣ୍ଡିଆର ମ୍ୟାନେଜର ଥିଲେ।
ଜଣେ ଖେଳାଳି ଭାବରେ କେକି ତାରାପୋର ଭାରତ ପାଇଁ କେବଳ ଗୋଟିଏ ଟେଷ୍ଟ ମ୍ୟାଚ ଖେଳିପାରିଥିଲେ। ସେ ୧୯୪୮ ମସିହାରେ ଦିଲ୍ଲୀ ଗ୍ରାଉଣ୍ଡରେ ୱେଷ୍ଟଇଣ୍ଡିଜ ବିପକ୍ଷରେ ଡେବ୍ୟୁ କରିଥିଲେ। ସେହି ମ୍ୟାଚରେ ସେ ମାତ୍ର ୨ ରନ ସ୍କୋର କରିଥିଲେ ଏବଂ କୌଣସି ଉଇକେଟ ନେଇ ନ ଥିଲେ। ସେ ପ୍ରଥମ ଶ୍ରେଣୀ କ୍ରିକେଟରେ ୪୦ ମ୍ୟାଚ ଖେଳିଥିଲେ, ଯେଉଁଠାରେ ୪୪୧ ରନ ସ୍କୋର କରିବା ବ୍ୟତୀତ ୧୪୮ ଉଇକେଟ ନେଇଥିଲେ। ଗୋଟିଏ ଇନିଂସରେ ୯୧ ରନ ସ୍କୋରରେ ୮ ବ୍ୟାଟ୍ସମ୍ୟାନ୍ଙ୍କୁ ଆଉଟ୍ କରିବା ତାଙ୍କ ଶ୍ରେଷ୍ଠ ପ୍ରଦର୍ଶନ ଥିଲା।
ଦ୍ରାବିଡଙ୍କୁ ମାତ୍ର ୧୧ ବର୍ଷ ହୋଇଥିବା ବେଳେ ସେ ତାରାପୋରଙ୍କୁ ପ୍ରଥମ ଥର ପାଇଁ ଭେଟିଥିଲେ। ସେ ଚିନ୍ନାସ୍ବାମୀ ଷ୍ଟାଡିୟମରେ କର୍ନାଟକ କ୍ରିକେଟ ଆସୋସିଏଶନ ପକ୍ଷରୁ ଏକ କୋଚିଂ କ୍ୟାମ୍ପ ପରିଚାଳନା କରୁଥିଲେ। ସେହି ଶିବିରରେ ତାଙ୍କର ଧ୍ୟାନ ଦ୍ରାବିଡଙ୍କ ବ୍ୟାଟିଂ କୌଶଳ ଉପରେ ପଡିଥିଲା। ସେ କ୍ରିକେଟ ଶିଖିବାକୁ ଦ୍ରାବିଡଙ୍କ ଆଗ୍ରହକୁ ଅନୁଭବ କରିଥିଲେ। ତାଙ୍କ କଠିନ ପରିଶ୍ରମ ଏବଂ ନିଷ୍ଠା ଦ୍ୱାରା ସେ ପ୍ରଭାବିତ ହୋଇଥିବା ଏକ ସାକ୍ଷାତକାରରେ ତାରାପୋର କହିଥିଲେ। ସେବେଠାରୁ ଦ୍ରାବିଡ ଟିମ ଇଣ୍ଡିଆ ପାଇଁ ଖେଳିବେ ବୋଲି ଭାବିଥିଲେ ଯାହାକି ସତ ହୋଇଛି ବୋଲି ସେ ମଧ୍ୟ କହିଥିଲେ।
ଅନ୍ତର୍ଜାତୀୟ କ୍ରିକେଟରେ ସର୍ବାଧିକ ରନ ସ୍କୋର କରୁଥିବା ଖେଳାଳିଙ୍କ ମଧ୍ୟରେ ରାହୁଲ ଦ୍ରାବିଡଙ୍କୁ ଗଣନା କରାଯାଏ। ଟେଷ୍ଟ, ଦିନିକିଆ କିମ୍ବା ଟି-୨୦ ଫର୍ମାଟ ହେଉ, ଦ୍ରାବିଡ ପ୍ରତ୍ୟେକରେ ଭାରତର ପ୍ରତିନିଧିତ୍ୱ କରିଥିଲେ। କେବଳ ଗୋଟିଏ ମ୍ୟାଚ ଖେଳିଥିବା କୋଚ ତାରାପୋରଙ୍କ ଶିଷ୍ୟ ଦ୍ରାବିଡ ତାଙ୍କ ଅନ୍ତର୍ଜାତୀୟ କ୍ୟାରିୟରରେ ଭାରତ ପାଇଁ ୫୦୦ରୁ ଅଧିକ ମ୍ୟାଚ ଖେଳି ୪୮ ଶତକ ସହ ୨୪,୨୦୮ ରନ ସ୍କୋର କରିଥିଲେ। ଦ୍ରାବିଡ ନିଜର ସଫଳତା ଯୋଗୁ କୋଚ୍ଙ୍କୁ ନିଶ୍ଚିତ ଭାବେ ଗୌରବ ଅନୁଭବ କରାଇଥିବେ ।
