ପାଟଣା,୧୩।୧(ବୀର କିଶୋର ଦାଶ): ମଙ୍ଗଳ ବାର ପବିତ୍ର ମକର ସଂକ୍ରାନ୍ତି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କେନ୍ଦୁଝର ଜିଲା ପାଟଣା ବ୍ଲକ୍ ମୁଖ୍ୟାଳୟ ଦେଇ ପ୍ରବାହିତ ପୁଣ୍ୟତୋୟା ବୈତରଣୀ ନଦୀରେ ମକର ବୁଡ଼ ପକାଇବେ। ଏହାପରେ ପ୍ରଥମେ ପାଟଣା ବୈତରଣୀ ନଦୀ ସନ୍ନିକଟ ପରମେଶ୍ୱର ମହାଦେବଙ୍କ ଦର୍ଶନ ପରେ ପୁରାତନ ଆନନ୍ଦେଶ୍ୱର ମହାଦେବ ଦର୍ଶନ କାର୍ଯ୍ୟକ୍ରମ ରହିଛି।
ଏହାପରେ ମୁଖ୍ୟମନ୍ତ୍ରୀ ଏହି ବ୍ଲକ୍ ଚାକୁଣ୍ଡା ପାଳ ପଞ୍ଚାୟତ ଶ୍ୟାମ ସୁନ୍ଦରପୁର ଗ୍ରାମର ବରିଷ୍ଠ ଭାଜପା ନେତା ତଥା କେନ୍ଦୁଝର ଏମ ପି ଅନନ୍ତ ନାୟକଙ୍କ ଜିଲାପାଳ ପ୍ରତିନିଧି ହରି ମହାନ୍ତଙ୍କ ଘରେ ଜଳଖିଆ କରି କେନ୍ଦୁଝରକୁ ସଡକ ପଥରେ ଗସ୍ତ କାର୍ଯ୍ୟକ୍ରମ ରହିଛି।
ସୂଚନା ଯେ ବର୍ତ୍ତମାନର ମୁଖ୍ୟମନ୍ତ୍ରୀ ୨୦୨୨ମସିହା ରେ ସଦର ବିଧାୟକ ଥିବା ବେଳେ ପାଟଣା ମୁଖ୍ୟାଳୟ ବୈତରଣୀ ନଦୀର ଅନୁସୟା ଘାଟରେ ବୁଡ ପକାଇଥିଲେ। ପ୍ରତିବର୍ଷ ସେ ମକର ସଂକ୍ରାନ୍ତିରେ ଦ୍ଵିତୀୟ ଗଙ୍ଗା ପାଟଣା ବୈତରଣୀ ନଦୀରେ ବୁଡ ପକାନ୍ତି। ଚଳିତ ବର୍ଷ ସେ ମୁଖ୍ୟମନ୍ତ୍ରୀ ହେବା ପରେ ବି ନିଜ ସଂସ୍କୃତିକୁ ନ ଭୂଲି ବୈତରଣୀରେ ବୁଡ ପକାଇବା ନିଷ୍ପତିକୁ ପାଟଣା ଅଞ୍ଚଳର ବୁଦ୍ଧିଜିଵୀ ମାନେ ସ୍ୱାଗତ କରିଛନ୍ତି। ମୁଖ୍ୟମନ୍ତ୍ରୀଙ୍କ ଆଗମନକୁ ନେଇ ଅଞ୍ଚଳରେ ଆନନ୍ଦ ଖେଳି ଯାଇଛି। ଏନେଇ ପାଟଣା ବିଧାୟକ ଅଖିଳ ଚନ୍ଦ୍ର ନାଏକ ତାଙ୍କ ପ୍ରତିକ୍ରିୟା ରେ ମୁଖ୍ୟ ମନ୍ତ୍ରୀ ହେବା ପରେ ପାଟଣାକୁ ଏହା ତାଙ୍କର ପ୍ରଥମ ଗସ୍ତ।
ତାଙ୍କୁ ପାଟଣା ମାଟିରେ ଭବ୍ୟ ସ୍ଵାଗତ କରାଯିବ। ସ୍ଥାନୀୟ ସାମାଜିକ କର୍ମୀ ଯୁଗୋଳ କିଶୋର ଦାଶ କହିଛନ୍ତି ଏଭଳି ତ ସଦର ବିଧାୟକ ଥିବା ବେଳେ ପ୍ରତିବର୍ଷ ମକର ରେ ସେ ବୁଡ ପକାଇବାକୁ ସେ ପାଟଣା ବୈତରଣୀ ନଦୀକୁ ଆସନ୍ତି। ଏଥର ତଫାତ କେବଳ ହେଉଛି ସେ ମୁଖ୍ୟମନ୍ତ୍ରୀ ହେବା ପରେ ବି ପରମ୍ପରା ସଂସ୍କୃତିକୁ ଭୁଲି ନାହାଁନ୍ତି । ଏଥର ବି ଚିରାଚରିତ ଭାବେ ସବୁବର୍ଷ ଭଳି ମକର ବୁଡ ବୈତରଣୀରେ ସେ ପକାଉଛନ୍ତି।
ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ସରିଛି। କେନ୍ଦୁଝର ଆରକ୍ଷୀ ଅଧିକ୍ଷକ ନୀତିନ କୁଶଲ କର ଦାଗୁଡୁ, ଉପଜିଲା ପାଳ ଉମାଶଙ୍କର ଦଳେଇ,ପାଟଣା ତହସିଲ ଦାର ଲୀଳାବତୀ ନାୟକ, ଅତିରିକ୍ତ ତହସିଲ ଦାର ଶରଣ କୁମାର ଜେନା, ଘଟଗାଁ ଏସ ଡି ପି ଓ ପ୍ରଭାତ କୁମାର ତ୍ରିପାଠୀ, ପାଟଣା ଥାନା ଅଧିକାରୀ ମାନସ କୁମାର ମହାକୁଡ଼ ପ୍ରମୁଖ ବୈତରଣୀ ନଦୀ ଅନୁସୟା ଘାଟ ଓ ୨ଶିବ ମନ୍ଦିର ପରିଦର୍ଶନ କରି ଛନ୍ତି।ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଏଠାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବୁଡ଼ ପକାଇବାକୁ ନେଇ ପ୍ରଶାସନ ପକ୍ଷରୁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ସୁରକ୍ଷା ପାଇଁ ବ୍ୟାରିକେଡ୍ ପ୍ରସ୍ତୁତ କରାଯାଉଛି। ପାଟଣା ବିଧାୟକ ଅଖିଳ ଚନ୍ଦ୍ର ନାଏକ ବୈତରଣୀ ନଦୀକୂଳରେ ପହଞ୍ଚି ସମସ୍ତ ବ୍ୟବସ୍ଥାର ନିଜେ ତଦାରଖ କରିଛନ୍ତି।
