ନୂଆଦିଲ୍ଲୀ, ୧୫।୪: ଜଳବାୟୁ ପରିବର୍ତ୍ତନ ଫଳରେ ଜଙ୍ଗଲରେ ନିଆଁ ଲାଗିବା ସାଙ୍ଗକୁ ବନସ୍ପତି ମାତ୍ରା କମିବାରେ ଲାଗିଛି। ଏହାର ନକାରାତ୍ମକ ପ୍ରଭାବ ଜଙ୍ଗଲରେ ବାସ କରୁଥିବା ଜୀବଙ୍କ ଉପରେ ପଡ଼ିଛି। ଜଙ୍ଗଲ କ୍ଷୟ ଯୋଗୁ ପଶୁ ଖାଦ୍ୟ ଓ ବାସ ଅନ୍ବେଷଣରେ ଗାଁ ଓ ସହର ମୁହାଁ ହେବାରେ ଲାଗିଛନ୍ତି। ଏହାଫଳରେ ମାନବ ଓ ଜୀବଙ୍କ ମଧ୍ୟରେ ସଂଘର୍ଷ ଦେଖାଯିବ ବୋଲି ପ୍ରକୃତି ସଂରକ୍ଷକମାନେ ମତ ପ୍ରକାଶ କରିଛନ୍ତି।
ଜଳବାୟୁ ପ୍ରଭାବରେ ଧୀରେ ଧୀରେ ଜଙ୍ଗଲ କ୍ଷୟ ହେବାକୁ ବସିଛି। ଖାଦ୍ୟାଭାବରୁ ପ୍ରାଣୀଙ୍କ ମୃତ୍ୟୁ ଘଟିବାରେ ଲାଗିଛି। ଁ ସୁନ୍ଦରବନର ବ୍ୟାଘଙ୍କ ଉପରେ ଜଳବାୟୁ ପରିବର୍ତ୍ତନର ପ୍ରଭାବ ପଡ଼ିବା ସକାଶେ ଓ୍ବେଷ୍ଟର୍ନ ଘାଟରେ ଏହା ଏକ ବଡ଼ ଚ୍ୟାଲେଞ୍ଜ ସାବ୍ୟସ୍ତ ହୋଇଛି। ୨୦୧୮ ସୁନ୍ଦରବନରେ ମୋଟ ୯୮୧ ବାଘ ଗଣାନା କରାଯାଇଥିଲା। ୨୦୨୨ରେ ଏହି ସଂଖ୍ୟା କମି ୮୨୪ରେ ପହଞ୍ଚତ୍ଛି। ଜଳବାୟୁ ପରିବର୍ତ୍ତନ କାରଣରୁ ତରୁଲତା କୀଟ ପତଙ୍ଗ ଦ୍ୱାରା ବହୁ ରୋଗର ଶିକାର ହେଉଛନ୍ତି, ଯାହା ଜଙ୍ଗଲରେ ବାସ କରୁଥିବା ଜୀବଜନ୍ତୁଙ୍କଠାରେ ଖାଦ୍ୟର ଘୋର ଅଭାବ ଦେଖାଯାଉଥିବା ଜାତୀୟ ବ୍ୟାଘ୍ର ସୁରକ୍ଷା ସଂସ୍ଥା (ଏନ୍ଟିସିଏ)ର ଏଆଇଜି ମହମ୍ମଦ ସାଜିଦ୍ ସୁଲ୍ତାନ କହିଛନ୍ତି। ପୂର୍ବ ଦିନଗୁଡ଼ିକ ତୁଳନାରେ ବର୍ତ୍ତମାନ ବର୍ଷା ମଧ୍ୟ କମିଛି। ଠିକ୍ ସମୟରେ ଆବଶ୍ୟକ ପରିମାଣର ବର୍ଷା ନ ହେବା କାରଣରୁ ଜଙ୍ଗଲ ଶୁଖିଲା ପଡ଼ୁଛି ଏବଂ ତାପମାତ୍ରା ବୃଦ୍ଧି ଯୋଗୁ ସେଠାରେ ନିଆଁ ଲାଗିଯାଉଛି। ଜଳବାୟୁ ପରିବର୍ତ୍ତନ ପ୍ରଜନନ ଚକ୍ରକୁ ପ୍ରଭାବିତ କରିଛି। ଅନ୍ୟପକ୍ଷେ ବିଭିନ୍ନ ରୋଗ ଫସଲକୁ ଆକ୍ରମଣ କରିବା ଦ୍ୱାରା ଫସଲ ନଷ୍ଟ ହେବାରେ ଲାଗିଛି। ଫସଲ ଉଜୁଡ଼ିବା ଯୋଗୁ କ୍ଷୁଦ୍ରଚାଷୀ ଏବେ ଜଙ୍ଗଲ ଉପରେ ଅଧିକ ନିର୍ଭରଶୀଳ ହେବାକୁ ବସିଲେଣି। ଜଙ୍ଗଲ ଉପରେ ଉଭୟ ପଶୁ ଓ ମଣିଷ ନିର୍ଭର କରିବା ଦ୍ୱାରା ଉଭୟଙ୍କ ମଧ୍ୟରେ ସଂଘର୍ଷ ଦେଖାଯିବ ବୋଲି ପ୍ରକୃତି ସଂରକ୍ଷକମାନେ ଚେତାଇଛନ୍ତି।
