ଜଳବାୟୁ ପରିବର୍ତ୍ତନ ଏବେ ସାରା ବିଶ୍ୱ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି। ଅପରିଣାମଦର୍ଶୀ ମଣିଷ ଏହାର ଭୟାବହତାକୁ ତଥାପି ବୁଝିବାକୁ ନାରାଜ। ପୃଥିବୀର ସମ୍ବଳଗୁଡ଼ିକର ଅପବ୍ୟବହାର କରି ଜଙ୍ଗଲ, ଖଣି, ନଦୀ, ହ୍ରଦ ସବୁକୁ ମଣିଷ ନଷ୍ଟ କରିଚାଲିଛି। ତାପମାତ୍ରା ବଢ଼ିବାରୁ ମେରୁ ଅଞ୍ଚଳରେ ତୁଷାର ବା ବରଫ ଖଣ୍ଡମାନ ତରଳିବାରୁ ସାରା ପୃଥିବୀରେ ସମୁଦ୍ର ପତ୍ତନ ବୃଦ୍ଧି ପାଇବାରେ ଲାଗିଛି। ଭାରତରେ ମଧ୍ୟ ଅନୁରୂପ ଭାବରେ ହିମାଳୟର ଗ୍ଲାସିୟର ତରଳିବା ଦ୍ୱାରା ନଦୀଗୁଡ଼ିକରେ ବନ୍ୟା ପରିସ୍ଥିତି ନିୟନ୍ତ୍ରଣରେ ରହି ପାରୁନାହିଁ। ପ୍ରାୟ ପ୍ରତିବର୍ଷ ବଡ଼ ବଡ଼ ବାତ୍ୟା ଖାଲି ଭାରତ କାହିଁକିି ଅନେକ ଦେଶରେ ମୁଣ୍ଡ ବିନ୍ଧାର କାରଣ ପାଲଟିଲାଣିି। ଏହି ସମସ୍ୟାରୁ ମୁକୁଳି ପାରିନି ଓଡ଼ିଶା। ଓଡ଼ିଶାରେ ମଧ୍ୟ ଜଳବାୟୁ ପରିବର୍ତ୍ତନର ପ୍ରଭାବ ଦୀର୍ଘ ବର୍ଷ ହେଲାଣି ଦେଖିବାକୁ ମିଳିଛି। କେନ୍ଦ୍ରାପଡ଼ା ଜିଲାରେ ୧୯୯୩ ମସିହାରୁ ସାତଭାୟା ଅଞ୍ଚଳରେ ଏକ ଗାଁ ସମୁଦ୍ର ଗର୍ଭରେ ଲୀନ ହୋଇସାରିଛି। ଅସ୍ତରଙ୍ଗରେ ଏବେ କିଛି ଗାଁକୁ ସମୁଦ୍ର ଗିଳିଦେବା ଭୟ ଲୋକଙ୍କୁ ଘାରିଲାଣି। ଖାଲି ସେତିକି ନୁହେଁ, ବର୍ଷକୁ ଏକାଧିକ ଘୂର୍ଣ୍ଣିବଳୟ ସହିତ ମରୁଡ଼ି, ବନ୍ୟା, ଜଙ୍ଗଲରେ ଅଗ୍ନିକାଣ୍ଡ ଏବଂ ବଜ୍ରପାତ ଓଡ଼ିଶାକୁ କ୍ଷତି ପହଞ୍ଚାଇଛି। ରାଜ୍ୟରେ ଅଧିକାଂଶ ଲୋକ ଜଳବାୟୁ ପରିବର୍ତ୍ତନର ଶିକାର ହୋଇଛନ୍ତି। ତେଣୁ ଏବେଠାରୁ ଉପଯୁକ୍ତ ପଦକ୍ଷେପ ଏବଂ ନିର୍ଦ୍ଦିଷ୍ଟ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଗଲେ ସମୟ ସହିତ ସ୍ଥିତି ଆହୁରି ବିଗିଡ଼ିଯିବ। ଏହି ପରିପ୍ରେକ୍ଷୀରେ ଜଳବାୟୁ ପରିବର୍ତ୍ତନର ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ ‘ଧରିତ୍ରୀ’ ରାଜ୍ୟର ଯୁବବର୍ଗଙ୍କ ମଧ୍ୟରେ ଏକ ସଚେତନତା ସୃଷ୍ଟି କରିବାକୁ ପଦକ୍ଷେପ ନେଇଛି। ଆସନ୍ତା ୨୪ ତାରିଖରେ ‘ଧରିତ୍ରୀ’ ତା’ର ୪୮ ତମ ଜନ୍ମ ବାର୍ଷିକୀ ପାଳନ ଅବସରରେ ଏକ ‘ଯୁବ ସମ୍ମିଳନୀ’ ବା ‘ୟୁଥ୍ କନ୍କ୍ଲେଭ୍’ ଆୟୋଜନ କରିିବ। ଏହାର ବିଷୟବସ୍ତୁ ରହିଛି ‘କ୍ଲାଇମେଟ୍ ଚେଞ୍ଜ୍: ଫୋକସ୍ ଓଡ଼ିଶା’। ଏଥିରେ ରାଜ୍ୟର ବହୁ ବଡ଼ ବଡ଼ ଉଚ୍ଚଶିକ୍ଷାନୁଷ୍ଠାନର ଯୁବ ବକ୍ତାମାନେ ଯୋଗଦେବେ। ଏଥିସହିତ ଏହି କ୍ଷେତ୍ରରେ ଅଭିଜ୍ଞତା ଥିବା ବିଶେଷଜ୍ଞମାନେ ମଧ୍ୟ ଯୋଗଦେଇ ରାଜ୍ୟରେ ଜଳବାୟୁ ପରିବର୍ତ୍ତନ ଉପରେ ସେମାନଙ୍କର ସୁଚିନ୍ତିତ ମତାମତ ଏବଂ ସମାଧାନର ବାଟ ଉପସ୍ଥାପନ କରିବେ। ଏଠାରେ ଉଲ୍ଲେଖଯୋଗ୍ୟ, ଯୁବବର୍ଗଙ୍କ ମଧ୍ୟରେ ସଚେତନତା ସୃଷ୍ଟି କରିବା, ସମାନ କାରଣ ପାଇଁ କାର୍ଯ୍ୟ କରୁଥିବା ଲୋକଙ୍କୁ ଏକତ୍ରିତ କରିବା ଏବଂ ପରସ୍ପର ମଧ୍ୟରେ ଏକ ସାମୂହିକ ଭବିଷ୍ୟତ ପାଇଁ କାର୍ଯ୍ୟ କରିବାକୁ ପ୍ରେରଣା ଦେବା ହେଉଛି ଏହି କନ୍କ୍ଲେଭ୍ର ମୂଳ ଉଦ୍ଦେଶ୍ୟ।
