ବାସୁଦେବପୁର/ପଦ୍ମପୁର,୧୮।୭(ଡି.ଏନ.ଏ.): ଭଦ୍ରକ ଜିଲା ବାସୁଦେବପୁର ବ୍ଲକ ନାୟକାଣିଡିହୀ ଥାନା ଅଧୀନ କାଶୀପୁର ଗ୍ରାମରେ ଏକ ରାସ୍ତା ନିର୍ମାଣକୁ ନେଇ ରବିବାର ଗୋଷ୍ଠୀ ସଂଘର୍ଷ ଘଟିଛି। ଏଥିରେ ଉଭୟ ପକ୍ଷରୁ ୭ ଜଣ ଆହତ ହୋଇଛନ୍ତି। ସେମାନେ ହେଲେ ରଞ୍ଜନ ବେହେରା, ସମୀର ଜେନା, କରୁଣାକର ବେହେରା, ରତିକାନ୍ତ ଜେନା, ସୁରେଶ ମିଶ୍ର, ଶଙ୍କର୍ଷଣ ରାଉଳ ଓ ତନୁଶ୍ରୀ ରାଉଳ। ସମସ୍ତଙ୍କୁ ବାସୁଦେବପୁର ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ତେଣ୍ଟା ଓ ଭୁଜାଲି ମାଡ଼ରେ ୨ ଗୁରୁତର ରଞ୍ଜନ ଓ ସମୀରଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ପରେ ସେମାନଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ସମୀରଙ୍କ ଗୋଡ଼ରେ ତେଣ୍ଟା ଲାଖି ରହିଛି।
ପ୍ରକାଶ ଯେ, କାଶୀପୁର ରାସ୍ତା ସଂଲଗ୍ନ ବିଲରେ ଶଙ୍କର୍ଷଣଙ୍କ ଥିବା ପକ୍କାଘରକୁ ସ୍ଥାୟୀ ରାସ୍ତା ନାହିଁ। ଏଣୁ ସେ ଓ ତାଙ୍କ ପରିବାର ଲୋକେ ଶନିବାର ବିଳମ୍ବିତ ରାତିରେ ସୁରେଶଙ୍କ ଜମିକୁ ଲଗାଇ ଏକ ଅସ୍ଥାୟୀ ରାସ୍ତା ତିଆରି କରିଥିଲେ। ରବିବାର ସକାଳେ ସୁରେଶ ଜାଣିବା ପରେ ତାଙ୍କ ଜମିରେ କାହିଁକି ରାସ୍ତା ତିଆରି କଲେ ବୋଲି ଶଙ୍କର୍ଷଣଙ୍କ ପରିବାରକୁ ପଚାରିଥିଲେ। ଏହାକୁ କେନ୍ଦ୍ରକରି ଉତ୍ତେଜନା ଦେଖାଦେଇଥିଲା। ଶଙ୍କର୍ଷଣଙ୍କ ପରିବାର ଲୋକେ ମାରଣାସ୍ତ୍ରରେ ସୁରେଶଙ୍କୁ ଆକ୍ରମଣ କରିଥିଲେ। ସୁରେଶଙ୍କୁ ବଞ୍ଚାଇବାକୁ ଯାଇ ରଞ୍ଜନ, ସମୀର, କରୁଣାକର, ରତିକାନ୍ତ ଆକ୍ରମଣର ଶିକାର ହୋଇଥିଲେ। ସେହିପରି ପାଲଟା ଆକ୍ରମଣରେ ଶଙ୍କର୍ଷଣ ଓ ତାଙ୍କ ସ୍ତ୍ରୀ ତନୁଶ୍ରୀ ଆହତ ହୋଇଥିଲେ। ଖବର ପାଇ ନାୟକାଣିଡିହୀ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଦୁଇପକ୍ଷର ଅଭିଯୋଗକୁ ଭିତ୍ତିକରି ଥାନାରେ ୨ଟି ମାମଲା(ନଂ.୧୯୦/୨୧ ଓ ୧୯୧/୨୧) ରୁଜୁ ହୋଇଛି। ଅପରାହ୍ନରେ ଗୋଟିଏ ପକ୍ଷର ୪ ଜଣଙ୍କୁ ପୋଲିସ ଗିରଫ କରି ତଦନ୍ତ ଜାରି ରଖିଛି।
