ହାଟଡିହୀ,୧୩ା୬(ଶୁଭକାନ୍ତ ନାୟକ): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ସୋସୋ ଥାନା ଅଞ୍ଚଳରେ ବାଣଫୁଟାକୁ ନେଇ ମହାଭାରତ ସୃଷ୍ଟି ହୋଇଛି। ବାଣଫୁଟାରେ ବାପ, ପୁଅଙ୍କ ସମେତ ୬ ଜଣ ଆହତ ହୋଇଛନ୍ତି। ଘଟଣାସ୍ଥଳରେ ଆନନ୍ଦପୁର ଡିଏସ୍ପି ପ୍ରଶାନ୍ତ ବେହେରା ଏବଂ ସୋସୋ ଥାନା ଅଧିକାରୀ ବିଜୟ ବିହାରୀ ପହଞ୍ଚି ତଦନ୍ତ ଚଳାଇଥିବା ବେଳେ ଜଣକୁ ଅଟକ ରଖାଯାଇଛି। କିନ୍ତୁ ଅଦ୍ୟାବଧି ଥାନାରେ କୌଣସି ଅଭିଯୋଗ ହୋଇନି।
ସୂଚନାନୁସାରେ, ଧନୁର୍ଜୟପୁରରେ କିଛି ହାତଗଣତି ଲୋକ ଭାଜପା ସରକାର ଗଢ଼ୁଥିବା ଖୁସିରେ ଗାଁରେ ବାଣ ଫୁଟାଇ ଖୁସି ମନାଉଥିଲେ। ଧନଜୀବନକୁ ଲକ୍ଷ୍ୟ ରଖି ଗ୍ରାମର ସୁଲେଇ ହୋ ତାଙ୍କ ଘର ପାଖରେ ରାତିରେ ବାଣ ଫୁଟାଇବାକୁ ବାରଣ କରିଥିଲେ। କିନ୍ତୁ ସୁଲେଇଙ୍କ ଘର ଆଗରେ ଜବରଦସ୍ତ ବାଣ ଫୁଟାଇଥିଲେ। ଫଳରେ ମହାଭାରତ ଘଟିଥିଲା। ସୁଲେଇ ଏବଂ ତାଙ୍କ ପୁଅ ସହ ବାଣ ଫୁଟାଉଥିବା ଲୋକଙ୍କ ଗଣ୍ଡଗୋଳ ଘଟିଥିଲା। ତୀରମାଡ଼ ସହ ହଣାକଟା ହେବାରୁ ସୁଲେଇ ହୋ ଏବଂ ତାଙ୍କ ପୁଅ, ଧନୁର୍ଜୟପୁର ପଞ୍ଚାୟତ ପୂର୍ବତନ ସରପଞ୍ଚ ନିରୁପମା ରାଉତଙ୍କ ସ୍ବାମୀ ବିଶ୍ୱଜିତ(ନଣ୍ଡା)ରାଉତ, ନାରାୟଣ ସାମଲ, ଅଶୋକ ଜେନା, ଗାଙ୍ଗୁଲି ବିରୁଆ ପ୍ରମୁଖ ଆହତ ହୋଇଥିବା ସୂଚନା ମିଳିଛି। ନାରାୟଣ ଜେନା କଟକ ସ୍ଥାନାନ୍ତର ହୋଇଥିବା ବେଳେ ଅନ୍ୟମାନେ ଆଗରପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଛନ୍ତି। ରାଜନୈତିକ ଦଳର ହସ୍ତକ୍ଷେପ ଯୋଗୁ ସ୍ଥାନୀୟ ଅଞ୍ଚଳରେ ଉତ୍ତେଜନା ଏବଂ ଅସନ୍ତୋଷ ବଢୁଥିବା ଖବର ମିଳିଛି। କୌଣସି ମୁହୂର୍ତ୍ତରେ ଭୟାନକ ଆଇନଶୃଙ୍ଖଳା ପରିସ୍ଥିତି ଉପୁଜିପାରେ। ତେଣୁ ଘଟଣାକୁ ଉସୁକାଉଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି ହୋଇଛି। ପୋଲିସ ମଧ୍ୟ ଘଟଣା ଉପରେ ତୀକ୍ଷ୍ଣ ନଜର ରଖିଛି।
ସରକାରୀ ନିୟମ ଏବଂ କଟକଣାକୁ ବେଖାତିର କରି ରାତିରେ ଗାଁ ଭିତରେ ବାଣ ଫୁଟାଇବା ବେଆଇନ ଏବଂ ବାଣ ଫୁଟାଇଥିବା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ ସହ ସେମାନଙ୍କୁ ଗିରଫ ଦାବି ହୋଇଛି। ରାତିରେ ଗାଁ ଭିତରେ ଏପରି ବାଣଫୁଟାକୁ ବିଭିନ୍ନ ମହଲରେ ତୀବ୍ର ନିନ୍ଦା କରାଯାଇଥିବା ବେଳେ ସୋସୋ ପଞ୍ଚାୟତର ପୂର୍ବତନ ସରପଞ୍ଚ ବୈଲୋଚନ ନାୟକ ଏବଂ ଆଇନଜୀବୀ ଭଗବାନ ମଲିକ ନିନ୍ଦା ପ୍ରକାଶ କରି ଆଇନଗତ କାର୍ଯ୍ୟାନୁଷ୍ଠାନ ମଧ୍ୟ ଦାବି କରିଛନ୍ତି।
ଏ ବାବଦରେ ଆନନ୍ଦପୁର ଡିଏସ୍ପି ପ୍ରଶାନ୍ତ ବେହେରା ଏବଂ ସୋସୋ ଥାନା ଅଧିକାରୀ ବିଜୟ ବିହାରୀଙ୍କୁ ପଚାରିବାରୁ ରାତିରେ ଗାଁଁ ଭିତରେ ବାଣଫୁଟାକୁ କେନ୍ଦ୍ର କରି ଗଣ୍ଡଗୋଳ ଘଟିଛି। ଆହତମାନେ ଚିକିତ୍ସିତ ହେଉଛନ୍ତି। ଅଦ୍ୟାବଧି କେହି ଲିଖିତ ଅଭିଯୋଗ କରିନାହାନ୍ତି। ଜଣଙ୍କୁ ଅଟକ ରଖାଯାଇଛି। ବିଭିନ୍ନ ଲୋକଙ୍କ ବୟାନ ରେକର୍ଡିଂ କରାଯାଇଛି। ଲିଖିତ ଅଭିଯୋଗ ହେଲେ ରାତିରେ ବାଣ ଫୁଟାଇଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
