ନୂଆଦିଲ୍ଲୀ,୧୪।୨ : ଆଦାନୀ ପ୍ରସଙ୍ଗରେ ଭାଜପା ସରକାରଙ୍କ ବିରୋଧରେ ବିରୋଧୀଦଳଙ୍କ ପକ୍ଷରୁ ବହୁ ଅଭିଯୋଗ କରାଯାଉଛି। ଏହି ପ୍ରସଙ୍ଗରେ ଦେଶର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ପ୍ରଥମ ଥର ପାଇଁ ଏକ ସାକ୍ଷାତକାରରେ ଦଳର ଆଭିମୁଖ୍ୟ ସ୍ପଷ୍ଟ କରିଛନ୍ତି। ସେ କହିଛନ୍ତି ଯେ ଏହା ଉପରେ କୌଣସି ବିବୃତ୍ତି ଦେବା ଠିକ ହେବ ନାହିଁ, କାରଣ ଏହି ମାମଲା ସୁପ୍ରିମକୋର୍ଟରେ ବିଚାରାଧୀନ ଅଛି। କିନ୍ତୁ ମୁଁ ନିଶ୍ଚୟ କହିବି ଯେ ଏଥିରେ ଭାଜପା ପାଇଁ ଲୁଚାଇବାକୁ କିଛି ନାହିଁ। କିମ୍ବା ଦଳକୁ ଭୟ କରିବାର ଆବଶ୍ୟକତା ନାହିଁ।
ଉଲ୍ଲେଖନୀୟ ଯେ, ପ୍ରଥମ ଥର ପାଇଁ ଅମିତ ଶାହା ହିଣ୍ଡନବର୍ଗ-ଆଦାନୀ ବିବାଦ ସମ୍ପର୍କରେ ଏଭଳି ବିବୃତ୍ତି ଦେଇଛନ୍ତି। ମଙ୍ଗଳବାର ଏକ ନ୍ୟୁଜ ଏଜେନ୍ସିକୁ ଦେଇଥିବା ଏକ ସାକ୍ଷାତକାରରେ ସେ ଏହା କହିଛନ୍ତି ।
ହିଣ୍ଡନବର୍ଗ ରିପୋର୍ଟ ଆସିବା ପରେ ବିରୋଧୀ ଦଳ ଭାଜପାକୁ ଟାର୍ଗେଟ କରିଥିଲେ। ସେମାନେ ଭାଜପା ଆଦାନୀଙ୍କ ସୁରକ୍ଷା ପାଇଁ କାମ କରୁଥିବା ଅଭିଯୋଗ କରିଛନ୍ତି। ଏ ବାବଦରେ ବିରୋଧୀ ଦଳ କର୍ମୀମାନେ ସଂସଦରୁ ରାସ୍ତା ପର୍ଯ୍ୟନ୍ତ ସବୁଠାରେ ପ୍ରଦର୍ଶନ କରିବାରେ ବ୍ୟସ୍ତ ଅଛନ୍ତି।
କେନ୍ଦ୍ର ସରକାରଙ୍କ ଦ୍ୱାରା ଅନୁସନ୍ଧାନକାରୀ ସଂସ୍ଥାର ଅପବ୍ୟବହାର କରାଯାଉଛି ବୋଲି ହୋଇଥିବା ବିରୋଧୀଙ୍କ ଅଭିଯୋଗ ସମ୍ପର୍କରେ ଅମିତ ଶାହା କହିଛନ୍ତି ବିରୋଧୀ କାହିଁକି କୋର୍ଟକୁ କାହିଁ ଯାଉ ନାହାନ୍ତି? ଯେତେବେଳେ ପେଗାସସ ମାମଲା ସାମ୍ନାକୁ ଆସିଲା, ମୁଁ ସେମାନଙ୍କୁ ପ୍ରମାଣ ସହିତ କୋର୍ଟକୁ ଯିବାକୁ କହିଲି, କିନ୍ତୁ ସେମାନେ କିଛି କଲେ ନାହିଁ। ୨୦୦୨ ପରଠାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଛରେ ବିରୋଧୀ ଦଳ ପଡ଼ିଛନ୍ତି। ବିଭିନ୍ନ ଆରୋପ ଲଗାଉଛନ୍ତି। ଷଡଯନ୍ତ୍ର ପରେ ଶେଷରେ ସତ୍ୟ ପଦାକୁ ଆସୁଛି। ପ୍ରତ୍ୟେକ ଥର ମୋଦି ଅଧିକ ଶକ୍ତିଶାଳୀ ହୋଇଛନ୍ତି।
ଶାହା କହିଛନ୍ତି, ୨୦୨୪ ରେ ହେବାକୁ ଥିବା ଲୋକସଭା ନିର୍ବାଚନରେ ଭାରତୀୟ ଜନତା ପାର୍ଟି ପାଇଁ କୌଣସି ପ୍ରତିଯୋଗିତା ନାହିଁ। ମୋଦି ଜନସାଧାରଣଙ୍କ ସମ୍ପୂର୍ଣ୍ଣ ସମର୍ଥନ ହାସଲ କରିଛନ୍ତି। ଦେଶ ଦ୍ରୁତ ଗତିରେ ଆଗକୁ ବଢୂଛି। ବର୍ତ୍ତମାନ ପର୍ଯ୍ୟନ୍ତ ଲୋକସଭାରେ ଜନସାଧାରଣଙ୍କ ସମ୍ମୁଖରେ ମୁଖ୍ୟ ବିରୋଧୀ ଦଳ ସମ୍ପର୍କରେ କିଛି ନିଷ୍ପତ୍ତି ହୋଇନାହିଁ।
