ଲଣ୍ଡନ, ୨୫ା୬ (ପି.ଟି.): ଇଂଲଣ୍ଡର ମେରିଲବୋନ କ୍ରିକେଟ କ୍ଲବ(ଏମସିସି)ର ଦୀର୍ଘ ୨୩୩ ବର୍ଷର ଇତିହାସରେ ପୂର୍ବତନ ଅଧିନାୟିକା କ୍ଲେୟାର କନ୍ନର ଏହାର ପ୍ରଥମ ମହିଳା ସଭାପତି ଭାବେ ନିଯୁକ୍ତି ପାଇବେ। ବର୍ତ୍ତମାନ ଶ୍ରୀଲଙ୍କାର କୁମାର ସଙ୍ଗକାରା ଏମ୍ସିସିର ମୁଖ୍ୟ ଅଛନ୍ତି। ଆସନ୍ତା ବର୍ଷ ତାଙ୍କ କାର୍ଯ୍ୟକାଳ ଶେଷ ହେବ। ବୁଧବାର କ୍ଲବର ବାର୍ଷିକ ସାଧାରଣ ବୈଠକରେ ବର୍ତ୍ତମାନ ଇସିବି ମହିଳା କ୍ରିକେଟର ପରିଚାଳନା ନିର୍ଦ୍ଦେଶିକା ଥିବା କନ୍ନରଙ୍କୁ ତାଙ୍କ ଉତ୍ତରଧିକାରୀ ଭାବେ ମନୋନୀତ କରାଯାଇଛି। ତାଙ୍କ ନାମକୁ ସଙ୍ଗକାରା ନିଜେ ସୁପାରିସ କରିଥିଲେ। କନ୍ନର ଆସନ୍ତାବର୍ଷ ଅକ୍ଟୋବର ୧ରୁ ଦାୟିତ୍ୱ ଗ୍ରହଣ କରିବେ। ସଙ୍ଗକାରାଙ୍କ କାର୍ଯ୍ୟକାଳ ଚଳିତବର୍ଷ ଶେଷ ହେବା କଥା ମାତ୍ର କୋଭିଡ୍-୧୯ ଯୋଗୁ ତାଙ୍କ କାର୍ଯ୍ୟକାଳ ମିଆଦକୁ ଆହୁରି ଏକ ବର୍ଷ ବୃଦ୍ଧି କରାଯାଇଥିଲା। କନ୍ନରଙ୍କୁ ୨୦୦୯ରେ ଏମ୍ସିସିର ଅବୈତନିକ ଆଜୀବନ ସଦସ୍ୟା କରାଯାଇଛି। ଏମ୍ସିସିର ପରବର୍ତ୍ତୀ ସଭାପତି ଭାବେ ମନୋନୟନ କରାଯାଇଥିବାରୁ ମୁଁ ନିଜକୁ ଗୌରବାନ୍ବିତ ମନେ କରୁଛି ବୋଲି ସେ କହିଛନ୍ତି।
