ନୂଆଦିଲ୍ଲୀ,୧୬।୪: ଗୋଟିଏ ପଟେ ଦକ୍ଷିଣ ଆଫ୍ରିକା ଟିମ୍ ପାକିସ୍ତାନ ବିପକ୍ଷ ଟି୨୦ ସିରିଜରେ ପରାଜିତ ହୋଇଥିବା ବେଳେ ଅନ୍ୟପକ୍ଷେ ଦଳର କିଛି ଖେଳାଳି ଭାରତରେ ଚାଲିଥିବା ଆଇପିଏଲ୍ରେ ଦମ୍ଦାର ପ୍ରଦର୍ଶନ କରୁଛନ୍ତି। ସେହି ଖେଳାଳିମାନଙ୍କ ମଧ୍ୟରୁ ଜଣେ ହେଲେ ଆଇପିଏଲ୍ ୨୦୨୧ର ସବୁଠାରୁ ମହଙ୍ଗା ଖେଳାଳି କ୍ରିସ୍ ମୋରିସ। କ୍ରିସ୍ ନିଜର ନୂଆ ଟିମ୍ ରାଜସ୍ଥାନ ରୟାଲରୁ ଖେଳି ପୁରୁଣା ଟିମ୍ ଦିଲ୍ଲୀ କ୍ୟାପିଟାଲ୍ସ ଦଳର ବିଜୟରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। କେବଳ ତାଙ୍କ ପାଇଁ ଦିଲ୍ଲୀ ହାତରୁ ମ୍ୟାଚ୍ ରାଜସ୍ଥାନ ହାତକୁ ଚାଲିଯାଇଥିଲା।
ମ୍ୟାଚ୍ରେ ରାଜସ୍ଥାନ ରୟାଲ୍ସ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ଖେଳାଯାଉଥିବା ଏହି ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ୨୦ ଓଭରରେ ୮ ଉଇକେଟ ହରାଇ ୧୪୭ରନ୍ କରିଥିଲା। ୧୪୮ରନ୍ର ପିଛା କରିଥିବା ରାଜସ୍ଥାନ ଦଳ ୪୨ରନ୍ରେ ୫ ଉଇକେଟ ହରାଇ ସାଂଘାତିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଟପ୍ ଏବଂ ମିଡିଲ୍ ଅର୍ଡରର ଏହି ବ୍ୟାଟ୍ସମ୍ୟାନ୍ ଦୁଇଅଙ୍କ ଛୁଇଁପାରି ନ ଥିଲେ। ପରେ ଡେଭିଡ ମିଲର(୬୨) ଓ ରାହୁଲ ଟଓ୍ବୋଟିଆ(୧୯) ଇଂନିସ ସମ୍ଭାଳିଥିଲେ। ଫଳରେ ସ୍କୋର ୯୦ରେ ପହଞ୍ଚିଥିଲା। ଉଭୟ ଖେଳାଳି ଆଉଟ୍ ହେବା ପରେ ରାଜସ୍ଥାନର ଆଶା ମଉଳିଥିଲା। ହେଲେ କ୍ରିସ୍ ମୋରିସ ଧୌର୍ଯ୍ୟହରା ନ ହୋଇ ୧୮ ବଲ୍ରୁ ୪ ଛକା ସହ ୩୬ରନ୍ରେ ଅପରାଜିତ ରହି ଦଳକୁ ରୋମାଞ୍ଚକର ବିଜୟ ପ୍ରଦାନ କରିଥିଲେ।
୧୯ ଓଭରରେ ଦୁଇଟି ବଲ୍ରେ ଛକା ମାରି ୧୫ରନ୍ କରିଥିଲେ ମୋରିସ। ଶେଷ ଓଭରରେ ରାଜସ୍ଥାନ ରୟାଲ୍ସକୁ ୧୨ରନ୍ର ଆବଶ୍ୟକତା ରହିଥିଲା। ମୋରିସ ସମୟ ବରବାଦ ନ କରି ଅନ୍ତିମ ଓଭରର ପ୍ରଥମ ବଲ୍ରେ ୨ ରନ୍, ଦ୍ୱିତୀୟରେ ୬, ତୃତୀୟରେ ୦, ଚତୁର୍ଥରେ ୬ ମାରି ଦଳକୁ ଜିତାଇଥିଲେ। ସେ ୧୮ ବଲ୍ରେ ଅପରାଜିତ ୩୬ରନ୍ର ପାଳି ଖେଳିଥିଲେ। ଏହାଛଡ଼ା ସେ ବୋଲିଂ କରି ଲଲିତ ଯାଦବଙ୍କ ଉଇକେଟ ମଧ୍ୟ ନେଇଥିଲେ।
କହିରଖୁଛୁ ୨୦୧୩ରେ ମୋରିସ ଚେନ୍ନାଇ ସୁପରକିଙ୍ଗ୍ସ ପକ୍ଷରୁ ଖେଳିଥିଲେ। ୨୦୧୬ରେ ଦିଲ୍ଲୀ ଟିମ୍ ପକ୍ଷରୁ ଖେଳିଥିଲେ। ପରେ୨୦୧୮ ଆଇପିଏଲ୍ ନିଲାମୀରେ ତାଙ୍କୁ ପୁନର୍ବାର ଦିଲ୍ଲୀ ଟିମ୍ ୭.୧ କୋଟି ଟଙ୍କାରେ କିଣିଥିଲା। ହେଲେ ଦଳ ୨୦୨୧ ନିଲାମ ପୂର୍ବରୁ ଦଳ ତାଙ୍କୁ ଛାଡ଼ିଥିଲା। ତାଙ୍କୁ ରାଜସ୍ଥାନ ରୟାଲ୍ସ ୧୬ କୋଟି ଟଙ୍କାରେ କିଣିଛି।
