ଚେନ୍ନାଇ,୧୮।୨: ଆଇପିଏଲ୍ ୨୦୨୧ ପାଇଁ ଗୁରୁବାର ଅନୁଷ୍ଠିତ ଖେଳାଳି ନିଲାମ ପ୍ରକ୍ରିୟାରେ ନୂଆ ଇତିହାସ ଲେଖାଯାଇଛି। ଏହା ଛୋଟ ନିଲାମ ବୋଲି କୁହାଯାଉଥିଲେ ହେଁ ଦକ୍ଷିଣ ଆଫ୍ରିକା ଅଲରାଉଣ୍ଡର କ୍ରିସ୍ ମୋରିସଙ୍କୁ କିଣିବାରେ ରେକର୍ଡ ହୋଇଛି। ୨୦୧୫ରେ ଦିଲ୍ଲୀ ଟିମ୍ ଯୁବରାଜ ସିଂହଙ୍କୁ ୧୬ କୋଟିରେ କିଣିଥିଲା। ହେଲେ ମୋରିସ୍ ଯୁବରାଜଙ୍କ ରେକର୍ଡ ଭାଙ୍ଗି ୧୬ କୋଟି ୨୫ ଲକ୍ଷ ଟଙ୍କାରେ ବିକ୍ରି ହୋଇଛନ୍ତି। ରାଜସ୍ଥାନ ରୟାଲ୍ସ ଟିମ୍ ତାଙ୍କୁ ଦଳରେ ସାମିଲ କରିବାରେ ସଫଳ ହୋଇଛି।
ଆର୍ସିବିରୁ ଅଲଗା ହୋଇଥିବା ମୋରିସ୍ଙ୍କୁ କିଣିବା ପାଇଁ ଫ୍ରାଞ୍ଚାଇଜ୍ଗୁଡ଼ିକ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଥିଲା। ହେଲେ ଶେଷକୁ ବାଜି ମାରିଥିଲା ଆର୍ଆର୍। ଗତ ଥର ସେ ୧୦ କୋଟି ଟଙ୍କାରେ ବିକ୍ରି ହୋଇଥିଲେ। ହେଲେ ଚଳିତ ଥର ସେ ସବୁର ରେକର୍ଡ ଭାଙ୍ଗି ସବୁଠାରୁ ମହଙ୍ଗା ଖେଳାଳି ସାବ୍ୟସ୍ତ ହୋଇଛନ୍ତି।
