ନୂଆଦିଲ୍ଲୀ, ୧୦।୯(ଆଇଏଏନ୍ଏସ୍): ଚାଇନା ଗତ କିଛିବର୍ଷ ମଧ୍ୟରେ ଅନେକ ଭାରତୀୟ ସେକ୍ଟରରେ ନିଜର ପ୍ରଭାବ ବିସ୍ତାର କରିଥିବା ଜଣାପଡ଼ିଛି। କେବଳ ଆମୋଦପ୍ରମୋଦ କ୍ଷେତ୍ର ନୁହେଁ, ଶିକ୍ଷା କ୍ଷେତ୍ରଠାରୁ ଆରମ୍ଭ କରି ଭାରତୀୟ ଥିଙ୍କ୍ ଟ୍ୟାଙ୍କ ଏବଂ ସିଭିଲ୍ ସୋସାଇଟିକୁ ନିୟନ୍ତ୍ରଣ କରିବାକୁ ବହୁ ବର୍ଷ ହେଲା ଚାଇନା ଉଦ୍ୟମ ଚଳାଇଆସୁଛି। ଏପରି କରି ବେଜିଂ ଭାରତର ବୈଦ୍ଧିକ ସ୍ଥାନରେ ପ୍ରବେଶ କରିବାରେ କେତେକାଂଶରେ ସଫଳ ହୋଇଛି। ଏଥିପାଇଁ ଚାଇନା ସିଧାସଳଖ କିମ୍ବା ପ୍ରତିନିଧି ଜରିଆରେ ବିପୁଳ ଅର୍ଥ ଦେଉଛି। ଲ’ ଆଣ୍ଡ ସୋସାଇଟି ଆଲିଆନ୍ସ ବିଭିନ୍ନ ଗବେଷଣା ଓ ତଥ୍ୟ ସଂଗ୍ରହ କରି ଏହା ଜାଣିବାକୁ ପାଇଥିବା ରିପୋର୍ଟରେ ପ୍ରକାଶ କରିଛି। କେବଳ ଭାରତ ନୁହେଁ ପଡୋଶୀ ଦେଶ ଓ ସାରା ବିଶ୍ୱରେ ନିଜର ପ୍ରଭାବ ବିସ୍ତାର କରିବା ଓ ନିଜ ସପକ୍ଷରେ ପ୍ରଚାର କରିବା ପାଇଁ ବେଜିଂ ସୂକ୍ଷ୍ମ ରଣନୀତି ଆପଣାଇଛି। ଆମେରିକା, କାନାଡ଼ା, ଅଷ୍ଟ୍ରେଲିଆ ଭଳି ବିଶ୍ୱ ଶକ୍ତି ଏହା ଜାଣିପାରି ବେଜିଂର ପ୍ରଭାବକୁ କମାଇବା ପାଇଁ ଦୃଢ଼ ପଦକ୍ଷେପମାନ ନେଉଛନ୍ତି।
ଚାଇନା ନିୟମିତ ଭାବେ ଥିଙ୍କ୍ଟ୍ୟାଙ୍କ ଏବଂ ବିଶ୍ୱବିଦ୍ୟାଳୟ ଛାତ୍ରୀଛାତ୍ରଙ୍କ ମଧ୍ୟରେ ଶିକ୍ଷା ବିନିମୟ କାର୍ଯ୍ୟକ୍ରମ କରାଉଛି। ଏଥିପାଇଁ ଚାଇନା ସରକାରଙ୍କ ଅର୍ଥରେ ଭାରତୀୟ ଛାତ୍ରୀଛାତ୍ର ସେଠାକୁ ଯାଉଛନ୍ତି ଓ ଅଜାଣତରେ ବେଜିଂ କଥାରେ ପରିଚାଳିତ ହେଉଛନ୍ତି। ଶିକ୍ଷାବିତ୍ ଓ ବିଦ୍ୱାନମାନଙ୍କୁ ଚାଇନା ନିଜ ଉଦ୍ଦେଶ୍ୟ ସାଧନରେ ବ୍ୟବହାର କରୁଛି। ଚାଇନା ଅନୁଷ୍ଠାନଗୁଡ଼ିକ ବହୁସଂଖ୍ୟାରେ ମାଡ଼ିଆସି ଭାରତୀୟ ଶିକ୍ଷାନୁଷ୍ଠାନରେ ନିଜକୁ ପ୍ରତିଷ୍ଠିତ କଲେଣି। ସେମାନେ ଉକ୍ତ ଶିକ୍ଷାନୁଷ୍ଠାନକୁ ଚାଇନା ଚିନ୍ତାଧାରାରେ ଚାଲିବାକୁ ବାଧ୍ୟ କରିବା ସହ ଭାରତୀୟ ଛାତ୍ରୀଛାତ୍ରଙ୍କ ଉପରେ ପ୍ରଭାବ ବିସ୍ତାର କରୁଛନ୍ତି। ଭାରତୀୟ ଶିକ୍ଷାନୁଷ୍ଠାନଗୁଡ଼ିକ ଉପରେ ଚାଇନା ଅନୁପ୍ରବେଶର ଉଦାହରଣ ଉତ୍ତରପୂର୍ବ ଭାରତର ଏକ ପ୍ରମୁଖ ପବ୍ଲିକ୍ ମ୍ୟାନେଜମେଣ୍ଟ ବିଶ୍ୱବିଦ୍ୟାଳୟରେ ଦେଖିବାକୁ ମିଳିଛି। ସେଠାରେ ଛାତ୍ରୀଛାତ୍ରଙ୍କୁ ଭାରତ ଓ ଚାଇନାରେ ମ୍ୟାନେଜିଂ ବିଜନେସ୍ ଉପରେ ସ୍ନାତକୋତ୍ତର ଶିକ୍ଷା ଦିଆଯାଉଛି। ଏଥିପାଇଁ ପିଲାମାନଙ୍କୁ ଚାଇନା ୟୁନିଭର୍ସିଟିକୁ ପଠାଯାଉଛି। ଚାଇନା ସରକାରଙ୍କ ସହାୟତାରେ ଚାଲିଥିବା କନ୍ଫୁସିଅସ୍ ଇନ୍ଷ୍ଟିଚୁ୍ୟୁଟ୍ ନାମକ ସୋସିଆଲ ଫାଉଣ୍ଡେଶନ ଜରିଆରେ ଭାରତୀୟ ଶିକ୍ଷାନୁଷ୍ଠାନଗୁଡ଼ିକ ଉପରେ ପ୍ରଭାବ ବିସ୍ତାର କରାଯାଉଛି।
ସେହିପରି ଭାରତୀୟ ଗଣମାଧ୍ୟମ ଓ ଏଥିସହିତ ଜଡିତ ବିଶିଷ୍ଟ ବ୍ୟକ୍ତିମାନଙ୍କୁ ବ୍ୟବହାର କରି ବେଜିଂ ଭାରତର ସୋସିଆଲ ମିଡିଆକୁ ପ୍ରଭାବିତ କରୁଛି। ଖବରଦାତା ରାଜୀବ ଶର୍ମା ଏହାର ଉଦାହରଣ। ସେ ଚାଇନା ପାଇଁ ଗୁପ୍ତଚରଗିରିରେ ସମ୍ପୃକ୍ତ ଥାଇ ଗିରଫ ହୋଇଥିଲେ। ଭାରତୀୟ ଯବୁପିଢ଼ି ଦୈନନ୍ଦିନ ଆବଶ୍ୟକତା ପାଇଁ ମୋବାଇଲ୍ ଆପ୍ ଉପରେ ନିର୍ଭରଶୀଳ ହୋଇପଡ଼ିଥିବାବେଳେ ଚାଇନା ଉକ୍ତ ସେକ୍ଟର ବିଶେଷ କରି ନ୍ୟୁଜ୍ ଆପ୍ଗୁଡ଼ିକୁ ନିୟନ୍ତ୍ରଣ କରିବାକୁ ଉଦ୍ୟମ ଚଳାଇଛି। ଭାରତରେ ସର୍ବାଧିକ ବ୍ୟବହାର ହେଉଥିବା ନ୍ୟୁଜ୍ ଆପ୍ ଡେଲିହଣ୍ଟ, ନ୍ୟୁଜ୍ଡଗ୍ ଏବଂ ୟୁସି ନ୍ୟୁଜ୍ରେ ଚାଇନା କମ୍ପାନୀ ବିପୁଳ ଅର୍ଥ ବିନିଯୋଗ କରିଛନ୍ତି।