ନୂଆଦିଲ୍ଲୀ,୧୧ା୯: ଚାଇନାର ଆର୍ଥତ୍କ ଆକ୍ରମଣ ଭାରତୀୟ କର୍ତ୍ତୃପକ୍ଷଙ୍କୁ ବିବ୍ରତ କରିଛି। ଆର୍ଥତ୍କ ଗୋଇନ୍ଦା ସଂସ୍ଥା (ଏଫ୍ଆଇୟୁ) ଆଖିରେ ଧୂଳି ଦେଇ ଚାଇନା ନାଗରିକ ବେଆଇନ ଭାବେ ଅନେକ ଭାରତୀୟ କମ୍ପାନୀ ଖୋଲି ହଜାର ହଜାର କୋଟି ଟଙ୍କା ସେମାନଙ୍କ ଦେଶକୁ ନେଇଯାଇଥିବା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ତଦନ୍ତରୁ ଜାଣିବାକୁ ପାଇଛି। ସେମାନେ ପ୍ରଥମେ ଚାର୍ଟର୍ଡ ଆକାଉଣ୍ଟାଣ୍ଟମାନଙ୍କ ସହାୟତାରେ ଡମି ଭାରତୀୟ ନିର୍ଦ୍ଦେଶକ ବ୍ୟବହାର କରି କମ୍ପାନୀଗୁଡ଼ିକୁ ଇନ୍କର୍ପୋରେଟ କରୁଥିଲେ। ଏହାର କିଛିଦିନ ପରେ ସେମାନେ ଭାରତ ଆସି ଉକ୍ତ କମ୍ପାନୀର ନିର୍ଦ୍ଦେଶକ ହେଉଥିଲେ ବୋଲି ଇଡି ସୂତ୍ରରୁ ଜଣାପଡ଼ିଛି। ଭାରତରେ ଚାଲିଥିବା ଶତାଧିକ ଚାଇନା ନିୟନ୍ତ୍ରିତ ମୋବାଇଲ ଲୋନ୍ ଆପ୍ ଉପରେ ଚଢ଼ାଉ ସମୟରେ ଉପରୋକ୍ତ ଘଟଣା ପଦାକୁ ଆସିଛି। ଲୋନ୍ ଆପ୍ ବ୍ୟତୀତ ବେଟିଂ ଓ ଡେଟିଂ ଆପ୍ ମଧ୍ୟ ଚାଇନା ଦ୍ୱାରା ନିୟନ୍ତ୍ରିତ ହେଉଛି। କେବଳ ବେଟିଂ ଆପ୍ରୁ ସେମାନେ ୧,୩୦୦ କୋଟି ଟଙ୍କା ସଂଗ୍ରହ କରିଥିବା ଇଡି ତଦନ୍ତରୁ ଜଣାପଡ଼ିଛି।
ଚାଇନାକୁ ବେଆଇନ ଭାବେ ଅର୍ଥ ପଠାଯାଉଥିବା ଘଟଣାର ତଦନ୍ତ ବେଳେ ବେଟିଂ ଓ ଡେଟିଂ ଆପ୍ର ଏଚ୍ଏସ୍ବିସି ବ୍ୟାଙ୍କରେ ଥିବା ୪୭ କୋଟି ଟଙ୍କାକୁ ଦୁଇବର୍ଷ ପୂର୍ବେ ଇଡି ବାଜ୍ୟାପ୍ତ କରିଥିଲା। ଏହା ପରେ ଇଡି ପେଟିଏମ୍, କ୍ୟାଶଫ୍ରି ଏବଂ ରାଜୋରପେ୍ ଆଦି ପେମେଣ୍ଟ ଗେଟ୍ଓ୍ବେ ଉପରେ ନଜର ପକାଇଥିଲା। ଗତ ସପ୍ତାହରେ ଏହିସବୁ ସଂସ୍ଥା ଉପରେ ଚଢ଼ାଉ ବେଳେ ଚାଇନା ଲୋନ୍ ଆପ୍ଗୁଡ଼ିକର ମାଲିକଙ୍କଠାରୁ ୧୭ କୋଟି ଟଙ୍କା ଜବତ ହୋଇଥିଲା। ଲୋନ୍ ଆପ୍ ଜରିଆରେ ଋଣଗ୍ରହୀତାମାନଙ୍କଠାରୁ ଅତ୍ୟଧିକ ସୁଧ ଓ ପ୍ରୋସେସିଂ ଦେୟ ନେଇ ସେମାନଙ୍କୁ ଶୋଷଣ କରାଯିବା ସହ ହଇରାଣ କରାଯାଉଥିବା ଜଣାପଡ଼ିଥିଲା। ଅନ୍ଲାଇନ ବେଟିଂ ବ୍ୟତୀତ ଏହି କମ୍ପାନୀଗୁଡ଼ିକର ନେଟ୍ଓ୍ବର୍କ ହାଓ୍ବଲା କାରବାରରେ ମଧ୍ୟ ସମ୍ପୃକ୍ତ ଥିବା ଇଡି କହିଛି। ଉକ୍ତ ପେମେଣ୍ଟ ଗେଟ୍ଓ୍ବେଗୁଡ଼ିକ ଉପରେ କାର୍ଯ୍ୟାନୁଷ୍ଠାନ ଲାଗି ବ୍ୟାଙ୍କ ଓ ଅନ୍ୟ କର୍ତ୍ତୃପକ୍ଷମାନଙ୍କ ସହ ସମନ୍ବୟ ରଖି ଇଡି କାର୍ଯ୍ୟ କରୁଛି।
