ଯାଜପୁର ଅଫିସ,୧୧ା୧୦: ଯାଜପୁର ଜିଲା ଦେଇ ପ୍ରବାହିତ ଛିଣ୍ଡା ଖରସ୍ରୋତାକୁ ପୁନରୁଦ୍ଧାର କରିବାକୁ ଜଳ ସମ୍ପଦ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି। ଏହି ମର୍ମରେ ଜଳ ସମ୍ପଦ ବିଭାଗର ଅଧସ୍ଥନ ସଚିବ ଭାଗିରଥି ପାଢୀ ପ୍ରକଳ୍ପ ନିର୍ମାଣ ଓ ଅନୁଦାନ ମଞ୍ଜୁର ସମ୍ପର୍କରେ ପ୍ରସ୍ତାବ ଦେବା ସହ ଆବଶ୍ୟକ ପରୀକ୍ଷାନିରୀକ୍ଷା କରି ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଭାଗୀୟ ସର୍ବୋଚ୍ଚ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏହାପରେ ଦୀର୍ଘଦିନର ଦାବି ସଫଳ ହେବା ଆଶା ଉଦ୍ଜୀବିତ ହୋଇଛି। ଏଥି ସହିତ ଛିଣ୍ଡା ଖରସ୍ରୋତା ପୁଣି ଥରେ ଚିରସ୍ରୋତା ହେବ ବୋଲି ବୋଲି ମତ ପ୍ରକାଶ ପାଇଛି ା
ଯାଜପୁର ଜିଲା ମାର୍ଥାପୁର ନିକଟରେ ବ୍ରାହ୍ମଣୀ ନଦୀରୁ ଖରସ୍ରୋତା ଉପତ୍ତ୍ତି ହୋଇଛି। ଏହି ନଦୀ ଜିଲାର ରସୁଲପୁର, କୋରେଇ, ଯାଜପୁର, ବରୀ, ଦଶରଥପୁର, ବିଞ୍ଝାରପୁର ବ୍ଲକ ଓ କେନ୍ଦ୍ରାପଡ଼ା ଜିଲା ଦେଇ ବଙ୍ଗୋପସାଗରରେ ମିଶିଛି। ଏହି ନଦୀ ସଂପୃକ୍ତ ଅଞ୍ଚଳର ଜୀବନ ରେଖା ଭାବେ ପିରିଚିତ। ତେଣୁ ଏହି ନଦୀକୁ ଚିରସ୍ରୋତା କରିବାକୁ ଦୀର୍ଘବର୍ଷ ହେଲା ଦାବି ହୋଇ ଆସୁଛି। ତେବେ ଏନେଇ ଗତ ୨୭ ତାରିଖରେ ପରିବେଶବିତ୍ ଗୋପୀନାଥ ପତି ଏବଂ ଗ୍ରାମବାସୀ ରାଜ୍ୟ ସରକାରଙ୍କ ମୁଖ୍ୟ ଶାସନ ସଚିବଙ୍କୁ ଖରସ୍ରୋତା ନଦୀର ପୁନରୁଦ୍ଧାର ପାଇଁ ଅନୁରୋଧ କରିଥିଲେ। ଉକ୍ତ ଦାବି ଅନୁସାରେ ବିଭିନ୍ନ ଫସଲ ଅମଳ , ପାନୀୟ ଜଳ ତଥା ଅନ୍ୟାନ୍ୟ କାର୍ଯ୍ୟ ପାଇଁ ଏହାର ପାଣି ବ୍ୟବହାର ହୋଇଥାଏ। ଛିଣ୍ଡା ଖରାସ୍ରୋତା ନଦୀ ମୁହାଣ ବନ୍ଦ ହେବା ପରେ ଏହା ପ୍ରାୟତଃ ମୃତ ଅବସ୍ଥାରେ ରହିଛି। ଏହାବାଦ୍ କେତେଜଣ ଲୋକ ନଦୀ କୂଳରୁ ଗଛ କାଟିବା ଏବଂ ବାଲି ଉତ୍ତୋଳନ ଯୋଗୁ ନଦୀଶଯ୍ୟା ବହୁଳ ଭାବେ କ୍ଷତିଗ୍ରସ୍ତ ହେଉଛି, ଯାହା କୃଷିକୁ ପ୍ରଭାବିତ କରୁଛି। ନଦୀର କେତେକ ଅଂଶରେ ଛୋଟ ଗର୍ତ୍ତ, ପୋଖରୀ ଏବଂ କୃତ୍ରିମ ହ୍ରଦ ମଧ୍ୟ ସୃଷ୍ଟି ହୋଇଛି । ଏଠାରେ ବିଭିନ୍ନ କୀଟ, ମଶା ଆଦି ଜନ୍ମ ନେଇ ନଦୀ ଜଳ ପ୍ରଦୂଷିତ ହେଉଛି। ଫଳରେ ନଦୀତଟବର୍ତ୍ତୀ ଅଞ୍ଚଳବାସୀ ପେଟ, କିଡ୍ନୀ, ଜଣ୍ଡିସ ଆଦି ରୋଗରେ ପୀଡ଼ିତ ହେଉଛନ୍ତି। ଏହାବାଦ୍ ବିଭିନ୍ନ ବର୍ଜ୍ୟବସ୍ତୁକୁ ସମୟ ସମୟରେ ନଦୀରେ ଫୋପାଡ଼ି ଦିଆଯାଏ। ଏହା ପରିବେଶକୁ ବିଷାକ୍ତ କରିଥାଏ। ୧୯୭୪ରେ ରେଙ୍ଗାଲି ବହୁମୁଖୀ ପ୍ରକଳ୍ପ ନିର୍ମାଣ ପରେ ଯାଜପୁର ଜିଲାରେ ବନ୍ୟା ପରିସ୍ଥିତିକୁ କେତେକାଂଶରେ ନିୟନ୍ତ୍ରଣ କରିବା ସମ୍ଭବ ହୋଇଛି । କିନ୍ତୁ ୧୯୯୨-୯୩ ଆର୍ଥିକ ବର୍ଷରେ ଶ୍ରୀବନ୍ତପୁରଠାରୁ ୧୨.୫ କିଲୋମିଟର ଲମ୍ବ ବିଶିଷ୍ଟ ବନ୍ଧ ନିର୍ମାଣ ହେବା ପରେ ଛିଣ୍ଡା ଖରାସ୍ରୋତା ନଦୀ ମୃତ ଅବସ୍ଥା ପଡିଛି। ଏହାସହ ଜଳ ସମ୍ପଦ ବିଭାଗ ପକ୍ଷରୁ ଏକ ନୂତନ ନାମ ଛିଣ୍ଡା ଖରାସ୍ରୋତା ନାଲା ନାମରେ ନାମିତ କରାଯାଇଛି। ଯଦି ସେଠାରେ ଏକ ସ୍ଲୁଇସ୍ ଫାଟକ ତିଆରି ହୋଇଥାନ୍ତା ତେବେ ପ୍ରାୟ ୩୦ ହଜାର ଲୋକ ଉପକୃତ ହୋଇ ପାରିଥାନ୍ତେ।
ମୁଖ୍ୟ ଖରସ୍ରୋତାର ଉପର ପାର୍ଶ୍ୱର ଉତ୍ତର ଦିଗରେ ନଦୀବନ୍ଧର ୧୬ କିଲୋମିଟର ପର୍ଯ୍ୟନ୍ତ କୌଣସି ସ୍ଲୁଇସ୍ ଗେଟ ନ ଥିବାରୁ ଶତାଧିକ ଏକର କୃଷିକ୍ଷେତ୍ରରେ କୃତ୍ରିମ ହ୍ରଦ ସୃଷ୍ଟି ହୋଇଛି। ଏଥିଯୋଗୁ ଅଞ୍ଚଳବାସୀ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଏନେଇ ଉନ୍ନୟନ କମିଶନର ତଥା ରାଜ୍ୟ ରିଲିଫ୍ କମିଶନର ପ୍ରଦୀପ ଜେନାଙ୍କ ସହ କୋରେଇ ବିଧାୟକ ଏବଂ ଅଞ୍ଚଳବାସୀ ଆଲୋଚନା କରିଥିଲେ। ମୂଳ ଖରସ୍ରୋତାର ସ୍ଥିତି ସମ୍ପର୍କରେ କମିଶନରଙ୍କୁ ଅବଗତ କରାଇବା ସହ ତା’ର ସମସ୍ୟାକୁ ସମାଧାନ କରିବା ପାଇଁ ଦାବି କରିଥିଲେ। ଉକ୍ତ ଦାବିକୁ କମିଶନର ଜେନା ଗ୍ରହଣ କରିବା ସହ ତକ୍ଷଣାତ୍ ଏ ନେଇ ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀଙ୍କ ସହ ଆଲୋଚନା କରି ବିହିତ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଥିଲେ।
