ବେଜିଂ,୨୦ା୯: ଚାଇନାର ପୂର୍ବତନ ବହିର୍ବ୍ୟାପାର ମନ୍ତ୍ରୀ କିନ୍ ଗାଙ୍ଗ୍ଙ୍କୁ ତାଙ୍କ ପଦରୁ ବହିଷ୍କାର କରାଯାଇଛି। ସେ ପୂର୍ବରୁ ଆମେରିକା ରାଷ୍ଟ୍ରଦୂତ ଥିବାବେଳେ ସେଠାରେ ଜଣେ ମହିଳାଙ୍କ ସହ ପ୍ରେମ ସମ୍ପର୍କ ରଖି ଏକ ପିଲାର ବାପା ହୋଇଥିବା ତଦନ୍ତରୁ ଜଣାପଡ଼ିବା ପରେ ବେଜିଂ ଉପରୋକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛି। କିନ୍ ବହିର୍ବ୍ୟାପାର ମନ୍ତ୍ରୀ ପଦରେ ୬ ମାସ କାର୍ଯ୍ୟ କରିବା ପରେ ମାସେ ପାଇଁ ରହସ୍ୟଜନକ ଭାବେ ଉଭାନ ହୋଇଯାଇଥିଲେ। ଫଳରେ ଗତ ଜୁଲାଇରେ ତାଙ୍କ ସ୍ଥାନରେ କୂଟନୀତିଜ୍ଞ ଓ୍ବାଙ୍ଗ ଓ୍ବିଙ୍କୁ ବହିର୍ବ୍ୟାପାର ମନ୍ତ୍ରୀ କରାଯାଇଥିଲା। କମ୍ୟୁନିଷ୍ଟ ପାର୍ଟି ପକ୍ଷରୁ କରାଯାଇଥିବା ତଦନ୍ତରୁ କିନ୍ଙ୍କ ଜୀବନଶୈଳୀ ପ୍ରସଙ୍ଗରେ ଜଣାପଡ଼ିଥିଲା। ସେହି ଜୀବନଶୈଳୀ କ’ଣ, ତାହା ସରକାରୀ ଭାବେ ସ୍ପଷ୍ଟ ହୋଇ ନ ଥିବାବେଳେ ସାଧାରଣତଃ ଏହା ଏକପ୍ରକାର ଯୌନ ଅସଦାଚରଣ ହୋଇପାରେ ବୋଲି କୁହାଯାଉଛି। ଆମେରିକାରେ ଏହି ସମ୍ପର୍କରୁ କିନ୍ ଏକ ସନ୍ତାନର ବାପା ହୋଇଥିଲେ। ଉକ୍ତ ସମ୍ପର୍କ ଯୋଗୁ ଦେଶର ସୁରକ୍ଷା ସହ ସାଲିସ୍ କରାଯାଇଛି କି ନାହିଁ, ତାହା ଉପରେ ତଦନ୍ତ ଜାରି ରହିଛି।
