ଇସଲାମାବାଦ୍/ନୂଆଦିଲ୍ଲୀ,୯।୧୧: ଏଲ୍ଏସିରେ ଭାରତ ପାଇଁ ବିପଦ ସୃଷ୍ଟି କରୁଥିବା ଚାଇନା ଏବେ ସମୁଦ୍ରରେ ଭାରତକୁ ଘେରିବା ଲାଗି ଉଦ୍ୟମ କରୁଛି। ଏଥିରେ ଚାଇନା ପାକିସ୍ତାନର ସହାୟତା ନେଇଛି। ଏବେ ପାକିସ୍ତାନକୁ ଚାଇନା ଏକ ବିନାଶକାରୀ ଯୁଦ୍ଧ ଜାହାଜ ଦେଇଛି, ଯାହା ପାକିସ୍ତାନ ନୌସେନା ବାହିନୀର ଶକ୍ତିକୁ ବହୁଗୁଣିତ କରିବ। ଏହା ଦ୍ୱାରା ଭାରତର ଚିନ୍ତା ବୃଦ୍ଧି ପାଇଛି।
ଚାଇନାର ସରକାରୀ ଗଣମାଧ୍ୟମ ରିପୋର୍ଟରେ କୁହାଯାଇଛି ଯେ, ବେଜିଂ ପାକିସ୍ତାନକୁ ନୂତନ ତଥା ଉନ୍ନତ ଯୁଦ୍ଧ ପୋତ ଦେଇଛି। ଗ୍ଲୋବାଲ ଟାଇମ୍ସରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଚାଇନା ଷ୍ଟେଟ ସିପି ବିଲଡିଂ କର୍ପୋରେସନ ଲିମିଟେଡ (ସିଏସଏସସି) ଦ୍ୱାରା ଡିଜାଇନ ଏବଂ ନିର୍ମିତ ହୋଇଥିବା ଏହି ଯୁଦ୍ଧ ଜାହାଜକୁ ପାକିସ୍ତାନ ନୌସେନାକୁ ସାଂଘାଇରେ ଏକ କମିଶନ ସମାରୋହରେ ହସ୍ତାନ୍ତର କରାଯାଇଛି।
ପାକିସ୍ତାନୀ ନୌସେନା ଟାଇପ୍ ୦୫୪-ଏ/ପି ଯୁଦ୍ଧ ଜାହାଜକୁ ପିଏନ୍ଏସ୍ ତୁଗରିଲ ଭାବେ ନାମିତ କରିଛି। ୨୦୧୭ରେ ଟାଇପ୍ ୦୫୪ ଯୁଦ୍ଧପୋତ ପାଇଁ ଉଭୟ ଦେଶ ଚୁକ୍ତି ସ୍ବାକ୍ଷରିତ କରିଥିଲେ। ଏହା ଅନ୍ତର୍ଗତ, ଅଗଷ୍ଟ ୨୦୨୦ରେ ପ୍ରଥମ ଯୁଦ୍ଧ ଜାହାଜ ପ୍ରସ୍ତୁତ କରାଯାଇଥିଲା। ଏବେ ଏହାର ପରୀକ୍ଷଣ କରାଯାଇଛି।
ଚାଇନା ପକ୍ଷରୁ ସମୁଦ୍ରରେ ଅତି କମରେ ୩୦ ଟାଇପ୍ ୦୫୪ ଯୁଦ୍ଧ ଜାହାଜ ମୁତୟନ କରାଯାଇଛି। ପିପୁଲ୍ସ ଲିବରେସନ ଆର୍ମିର ନାଭାଲ ରିସର୍ଚ୍ଚ ଏକାଡେମୀର ଜଣେ ବରିଷ୍ଠ ଗବେଷକ ଝାଙ୍ଗ ଜୁଞ୍ଚ କହିଛନ୍ତି ଯେ ଚାଇନାର ପୁରୁଣା ଯୁଦ୍ଧ ଜାହାଜ ତୁଳନାରେ ପିଏନ୍ଏସ୍ ତୁଗରିଲ ଉନ୍ନତ ବାୟୁ ପ୍ରତିରକ୍ଷା କ୍ଷମତା ପ୍ରଦାନ କରିଥାଏ। କାରଣ ଏହାର ଉନ୍ନତ ରାଡାର ବ୍ୟବସ୍ଥା ଅଛି ଏବଂ ଦୂର ଦୂରଗାମୀ କ୍ଷେପଣାସ୍ତ୍ର ଏଥିରେ ରହିଛି। ଯୁଦ୍ଧ ଜାହାଜରେ ଭୂପୃଷ୍ଠ, ବାୟୁ ଏବଂ ଜଳ ଭାଗରେ ଲକ୍ଷ୍ୟଭେଦ କରିବାକୁ ସକ୍ଷମ।
ଏଥିରେ ଆଧୁନିକ ଆତ୍ମରକ୍ଷା କ୍ଷମତା ଏବଂ ଯୁଦ୍ଧ ପରିଚାଳନା ସହିତ ଇଲେକ୍ଟ୍ରୋନିକ ଯୁଦ୍ଧ ପ୍ରଣାଳୀକୁ ସାମିଲ କରାଯାଇଛି। ଏନେଇ ପାକିସ୍ତାନ ପକ୍ଷରୁ କୁହାଯାଇଛି, ଟାଇପ୍ ୦୫୪-ଏ/ପି ଯୁଦ୍ଧ ଜାହାଜ ଯେ କୌଣସି ପରିସ୍ଥିତିର ମୁକାବିଲା କରିବାକୁ ସକ୍ଷମ। ୨୦୨୧ର ଆରମ୍ଭରେ ଚାଇନାର ସରକାରୀ ଗଣମାଧ୍ୟମ ସହିତ କଥାବାର୍ତ୍ତା କରୁଥିବାବେଳେ ପାକିସ୍ତାନର ନୌସେନା ମୁଖ୍ୟ ଆଡମିରାଲ ଏମ୍ ଅମଜାଦ ଖାଁ ନିୟାଜି ଚାଇନାଠାରୁ ଯୁଦ୍ଧ ଜାହାଜ କିଣିବା ବିଷୟରେ ସୂଚନା ପ୍ରଦାନ କରିଥିଲେ।
