ବେଜିଂ,୧୩।୨ : ତାଇୱାନ ପ୍ରସଙ୍ଗରେ ଆମେରିକା ସହ ଚାଲିଥିବା ବିବାଦ ମଧ୍ୟରେ ଚାଇନା ଆଣବିକ ଭଣ୍ଡାର ବୃଦ୍ଧି କରିବାକୁ ଯୋଜନା କରୁଛି। କାଇଡୋ ନ୍ୟୁଜ ସୂତ୍ରରୁ ପ୍ରକାଶ ଯେ ୨୦୩୫ ସୁଦ୍ଧା ଚାଇନା ଆଣବିକ ଅସ୍ତ୍ର ସଂଖ୍ୟାକ ୁ୯୦୦ କୁ ବୃଦ୍ଧି କରିବାକୁ ଯୋଜନା କରୁଛି। ଚାଇନାର ପିପୁଲ୍ସ ଲିବରେଶନ ଆର୍ମି ଏକ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି, ଯାହା ଚୀନ ରାଷ୍ଟ୍ରପତି ଶି ଜିନପିଙ୍ଗଙ୍କ ଦ୍ୱାରା ଅନୁମୋଦିତ ହୋଇଛି। ଏହି ବ୍ଲୁ ପ୍ରିଣ୍ଟ ଅନୁଯାୟୀ ଚାଇନା ଆମେରିକା ବିରୋଧରେ ନିଜର ସେନାର ଶକ୍ତି ବୃଦ୍ଧି କରିବାକୁ ଜୋରଦାର କାର୍ଯ୍ୟ କରୁଛି।
ଚାଇନାର ଏହି ଉଦ୍ଦେଶ୍ୟକୁ ଆମେରିକା ମଧ୍ୟ ବୁଝି ସାରିଛି। ୨୦୨୨ ମସିହାରେ ଆମେରିକା ଏହା ମଧ୍ୟ କହିଥିଲା ଯେ ଚାଇନା ଆଣବିକ ଭଣ୍ଡାର ବୃଦ୍ଧି ଦିଗରେ କାର୍ଯ୍ୟ କରୁଛି। ଆମେରିକା ଦାବି କରିଥିଲା ଯେ ଚାଇନା ୨୦୩୫ ସୁଦ୍ଧା ପରମାଣୁ ଅସ୍ତ୍ର ସଂଖ୍ୟାକୁ ୧୫୦୦କୁ ବୃଦ୍ଧି କରିବାକୁ ଯୋଜନା କରୁଛି। ବର୍ତ୍ତମାନର ରିପୋର୍ଟରେ ମଧ୍ୟ ଏହା ନିଶ୍ଚିତ ହୋଇଛି। ୨୦୩୫ ସୁଦ୍ଧା ଚାଇନା ସେନାର ଆଧୁନିକୀକରଣ କାର୍ଯ୍ୟ ସମାପ୍ତ ହେବ। କେତେକ ବିଦେଶୀ ବିଶେଷଜ୍ଞ କହିଛନ୍ତି ଯେ ଆଣବିକ ଅସ୍ତ୍ର ସମ୍ବନ୍ଧରେ ଚାଇନା ପ୍ରଥମେ ବ୍ୟବହାର ନ କରିବା ନୀତି ଛାଡିପାରେ।
ଗଣମାଧ୍ୟମର ରିପୋର୍ଟ ଅନୁଯାୟୀ, ନିକଟରେ ରୁଷିଆ-ୟୁକ୍ରେନ ଯୁଦ୍ଧରେ ରୁଷିଆର ଆକ୍ରୋଶ ସତ୍ତ୍ୱେ ନାଟୋ ଦେଶମାନେ ରୁଷ ବିରୋଧରେ ସିଧାସଳଖ କାର୍ଯ୍ୟାନୁଷ୍ଠାନ ଗ୍ରହଣ କରିନାହାଁନ୍ତି। ଚାଇନା ଅନୁଭବ କରୁଛି ଯେ ଏହାର କାରଣ ହେଉଛି ରୁଷିଆ ପାଖରେ ପରମାଣୁ ଅସ୍ତ୍ରଶସ୍ତ୍ରର ଏକ ବଡ଼ ଭଣ୍ଡାର ଅଛି। ଷ୍ଟକହୋମ ଅନ୍ତର୍ଜାତୀୟ ଶାନ୍ତି ଅନୁସନ୍ଧାନ ପ୍ରତିଷ୍ଠାନ ରିପୋର୍ଟ ଅନୁଯାୟୀ ରୁଷିଆରେ ବର୍ତ୍ତମାନ ୫୯୭୭ ପରମାଣୁ ଅସ୍ତ୍ର ରହିଛି। ଯେତେବେଳେ କି ଆମେରିକା ପାଖରେ ୫୪୨୮ ପରମାଣୁ ଅସ୍ତ୍ର ଅଛି । ଚାଇନା ୨୦୨୭ ସୁଦ୍ଧା ଆଣବିକ ଅସ୍ତ୍ରକୁ ୫୫୦ ଏବଂ ୨୦୩୫ରେ ୯୦୦ କୁ ବୃଦ୍ଧି କରିବାକୁ ଯୋଜନା କରୁଛି।
