ନୂଆଦିଲ୍ଲୀ, ୧୭।୯: ଭାରତ ଚାଇନା ମଧ୍ୟରେ ପୂର୍ବ ଲଦାଖରେ ସ୍ଥିତି ଧୀରେଧୀରେ ଉତ୍ତେଜନାପୂର୍ଣ୍ଣ ହେବାରେ ଲାଗିଛି। ଚାଇନା ଏଲ୍ଏସି ବାସ୍ତବିକ ସ୍ଥିତିର ଉଲ୍ଲଂଘନ କରୁଛି। ତେବେ ଭାରତୀୟ ଯବାନ ଯେ କୌଣସି ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ବୋଲି ଗୁରୁବାର ରାଜ୍ୟ ସଭାରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି। ଜୁନ୍ ୧୫ରେ ଗଲଓ୍ବାନ ଘାଟିରେ ହୋଇଥିବା ସଂଘର୍ଷରେ ଭାରତର ୨୦ ଜଣ ଯବାନ ଶହୀଦ୍ ହୋଇଥିଲେ। ଗଲଓ୍ବାନ ଘଟଣା ପାଇଁ ଚାଇନା ହିଁ ଦାୟୀ।ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୀମାରେ ପହଞ୍ଚି ଯବାନଙ୍କ ମନୋବଳ ବଢ଼ାଇଥିଲେ। ଏଲ୍ଏସିରେ ଶାନ୍ତିପୂର୍ଣ୍ଣ ସ୍ଥିତି ସୃଷ୍ଟି କରିବା ଲାଗି ଭାରତ ଉଦ୍ୟମ କରୁଛି। ଚାଇନା ଯୋଗୁ ଉତ୍ତେଜନା ବଢୁଥିବା ରାଜନାଥ କହିଛନ୍ତି। ଏହାଦ୍ୱାରା ଦୁଇଦେଶର ଦ୍ୱିପାକ୍ଷିକ ସମ୍ପର୍କ ଉପରେ ନକାରାତ୍ମକ ପ୍ରଭାବ ପଡୁଛି। ଲଦାଖ ଅଞ୍ଚଳରେ ଚାଇନା ଭାରତ ୩୮, ୦୦୦ ବର୍ଗ କିଲୋମିଟର ଜମି ଉପରେ ବେଆଇନ କବ୍ଜା କରିଛି। ସେହିପରି ପାକିସ୍ତାନ ୧୯୬୩ ସୀମା ଚୁକ୍ତିର ଉଲ୍ଲଘଂନ କରି ପାକ୍ ଅଧିକୃତ କଶ୍ମୀର (ପିଓକେ)ର ୫୧୮୦ ବର୍ଗ କିଲୋମିଟର ଜମି ଚାଇନାକୁ ଅବୈଧ ଭାବେ ପ୍ରଦାନ କରିଛି। ଏହା ଭାରତ ପାଇଁ ସମସ୍ୟା ସୃଷ୍ଟି କରୁଛି। ସେହିପରି ଚାଇନା ଅରୁଣାଚଳ ପ୍ରଦେଶରେ ୯୦,୦୦୦ ବର୍ଗ କିଲୋମିଟର ଜମି ଉପରେ ନିଜର ନିୟନ୍ତ୍ରଣ ଆଣିବା ଲାଗି ଉଦ୍ୟମ କରୁଛି। ଭାରତୀୟ ସେନା ସଞ୍ଜମତା ଆଚରଣ ପ୍ରଦର୍ଶନ କରୁଛନ୍ତି। ମାତ୍ର ଅବାଶ୍ୟକ ପଡ଼ିଲେ ସେମାନେ ନିଜର ବୀରତ୍ୱର ପରିଚୟ ମଧ୍ୟ ଦେବେ ବୋଲି ରାଜନାଥ କହିଛନ୍ତି। ଅତୀତରେ ଭାରତୀୟ ସେନା ଚାଇନାକୁ କଡ଼ା ଜବାବ ମଧ୍ୟ ଦେଇ ସାରିଥିବା ସେ କହିଛନ୍ତି। ସୀମା ବିବାଦ ସମ୍ପର୍କରେ ଗୃହର କେତେକ ବରିଷ୍ଠ ସଦସ୍ୟଙ୍କୁ ଡାକି ବିବରଣୀ ପ୍ରଦାନ କରିବାକୁ ରାଜନାଥଙ୍କୁ ରାଜ୍ୟ ସଭା ବାଚସ୍ପତି ପରାମର୍ଶ ଦେଇଛନ୍ତି।
