ବେଜିଂ,୨୫।୩: ଇସ୍ରାଏଲ-ଆମେରିକା ଏବଂ ଇରାନ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଚାଇନା ଏବେ ଏକ ନୂଆ ପଦକ୍ଷେପ ପାଇଁ ଚର୍ଚ୍ଚାକୁ ଆସିଛି। ଚାଇନା ବିଶ୍ୱର ବିଭିନ୍ନ ପ୍ରାନ୍ତରେ ‘ଓସିଆନ ମ୍ୟାପିଂ’ ବା ସମୁଦ୍ରର ମାନଚିତ୍ର ପ୍ରସ୍ତୁତ କରିବା ସହ ନିରୀକ୍ଷଣ ଅଭିଯାନକୁ ଜୋରଦାର କରିଛି। ପ୍ରଶାନ୍ତ, ଭାରତ ଏବଂ ଆଣ୍ଟଲାଟିକ୍ ମହାସାଗରରେ ଚାଇନାର ଏହି ବିଶାଳ ଅଭିଯାନ ଆମେରିକା ଓ ତା’ର ସହଯୋଗୀ ଦେଶମାନଙ୍କ ପାଇଁ ଚିନ୍ତାର କାରଣ ପାଲଟିଛି।
କ’ଣ ଏହି ସମୁଦ୍ର ମ୍ୟାପିଂ?
ସମୁଦ୍ରର ଗଭୀରତା, ସମୁଦ୍ର ତଳର ଭୌଗୋଳିକ ସ୍ଥିତି ଏବଂ ସେଠାରେ ଥିବା ପାହାଡ଼ କିମ୍ବା ଖାଲ ବିଷୟରେ ଜାଣିବାକୁ ‘ସମୁଦ୍ର ମ୍ୟାପିଂ’ କୁହାଯାଏ। ଏହା ମାଧ୍ୟମରେ:
* ସମୁଦ୍ରର କେଉଁ ଅଂଶ ଅଧିକ ଗଭୀର ତାହା ଜଣାପଡ଼େ।
* ଜାହାଜ ଚଳାଚଳ ପାଇଁ ସୁରକ୍ଷିତ ମାର୍ଗ ଚିହ୍ନଟ କରାଯାଏ।
* ତେଲ, ଗ୍ୟାସ ଏବଂ ସାମୁଦ୍ରିକ ସମ୍ପଦର ସନ୍ଧାନ ମିଳିଥାଏ।
କିପରି ହୁଏ ମ୍ୟାପିଂ?
ଏଥିପାଇଁ SONAR (Sound Navigation and Ranging) ବୈଷୟିକ ଜ୍ଞାନକୌଶଳ ବ୍ୟବହାର କରାଯାଏ। ଏଥିରେ ଶବ୍ଦ ତରଙ୍ଗକୁ ସମୁଦ୍ର ଭିତରକୁ ପଠାଯାଏ ଏବଂ ତାହା ଫେରିବାକୁ କେତେ ସମୟ ନେଉଛି, ସେହି ଆଧାରରେ ସମୁଦ୍ରର ଗଭୀରତା ମପାଯାଏ। ଆଧୁନିକ ‘ମଲ୍ଟିବିମ ସୋନାର ସିଷ୍ଟମ’ ଜରିଆରେ ଏବେ ଅତି ସୂକ୍ଷ୍ମ ତଥ୍ୟ ସଂଗ୍ରହ କରାଯାଉଛି।
ଚାଇନାର ରଣନୀତି ଓ ଗୁପ୍ତଚର ବୃତ୍ତି:
ରଏଟର୍ସର ରିପୋର୍ଟ ଅନୁଯାୟୀ, ଚାଇନାର ’ଡୋଙ୍ଗ ଫାଙ୍ଗ ହୋଙ୍ଗ ୩’ ନାମକ ଏକ ଗବେଷଣା ଜାହାଜ ୨୦୨୪ ଏବଂ ୨୦୨୫ ମଧ୍ୟରେ ତାଇୱାନ, ଗୁଆମ (ଆମେରିକାର ସାମରିକ ଘାଟି) ଏବଂ ଭାରତ ମହାସାଗରରେ କ୍ରମାଗତ ଭାବେ ଭ୍ରମଣ କରିଛି। ଅକ୍ଟୋବର ୨୦୨୪ରେ ଜାପାନ ନିକଟରେ ସମୁଦ୍ର ତଳେ ଚାଇନା ନିଜର ଶକ୍ତିଶାଳୀ ସେନ୍ସରଗୁଡ଼ିକର ପରୀକ୍ଷା କରିଥିଲା। ମାର୍ଚ୍ଚ ୨୦୨୫ରେ ଶ୍ରୀଲଙ୍କା ଏବଂ ଇଣ୍ଡୋନେସିଆ ମଧ୍ୟବର୍ତ୍ତୀ ସାମୁଦ୍ରିକ ଅଞ୍ଚଳ ତଥା ମଲାକା ପ୍ରଣାଳୀ (Strait of Malacca) ଦେଇ ଏହି ଜାହାଜ ଯାତ୍ରା କରିଥିଲା, ଯାହା ବାଣିଜି୍ୟକ ଦୃଷ୍ଟିକୋଣରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ପନଡୁବ୍ବି ଯୁଦ୍ଧ ପାଇଁ ପ୍ରସ୍ତୁତି?
ନୌସେନା ବିଶେଷଜ୍ଞଙ୍କ ମତରେ, ଚାଇନା କେବଳ ବୈଜ୍ଞାନିକ ଗବେଷଣା ପାଇଁ ଏହା କରୁନାହିଁ। ଅଷ୍ଟ୍ରେଲିଆର ପୂର୍ବତନ ସବମାରିନ ଫୋର୍ସ ମୁଖ୍ୟ ପିଟର ସ୍କଟ କହିଛନ୍ତି ଯେ, ଏହି ତଥ୍ୟ ଚାଇନାର ପନଡୁବ୍ବି (Submarines) ଗୁଡ଼ିକୁ ଯୁଦ୍ଧ ସମୟରେ ଲୁଚି ରହିବାକୁ ଏବଂ ଆକ୍ରମଣ କରିବାକୁ ସାହାଯ୍ୟ କରିବ। ସମୁଦ୍ରର ଭୌଗୋଳିକ ଜ୍ଞାନ ଥିଲେ ଚାଇନା ନିଜର ପନଡୁବ୍ବିଗୁଡ଼ିକୁ ବିନା କୌଣସି ବାଧାରେ ଶତ୍ରୁ ପକ୍ଷର ନିକଟତର କରିପାରିବ।
