ନୂଆଦିଲ୍ଲୀ,୨୩।୬: ଦକ୍ଷିଣ ଏସିଆର ପ୍ରତିରକ୍ଷା ବଜାର (ଡିଫେନ୍ସ ମାର୍କେଟ)ରେ ଏବେ ଜୋରଦାର ହଲଚଲ ଦେଖିବାକୁ ମିଳିଛି। ପାକିସ୍ତାନକୁ ଅନୁସରଣ କରି ଏବେ ବାଂଲାଦେଶ ମଧ୍ୟ ଚାଇନାର ଲଢ଼ୁଆ ବିମାନ J-10CEକୁ ନିଜ ବାୟୁସେନାରେ ସାମିଲ କରିବା ପାଇଁ ପ୍ରସ୍ତୁତି ଆରମ୍ଭ କରିଦେଇଛି। ବାଂଲାଦେଶ ବାୟୁସେନା ଚୀନଠାରୁ ଏଭଳି ୨୪ଟି ଫାଇଟର ଜେଟ କିଣିବା ଚୁକ୍ତିର ଅତି ନିକଟତର ହୋଇଛି। ‘ଅପରେସନ ସିନ୍ଦୂର’ (Operation Sindoor) ସମୟରେ ଏହି ଯୁଦ୍ଧବିମାନ ଫେଲ ମାରିଥିଲେ ମଧ୍ୟ, ଚୀନ ଏହାର ଓଲଟା ପ୍ରଚାର କରି ଏହି ଜେଟକୁ ଜୀବନ ବିକଳେ ପ୍ରମୋଟ କରିଥିଲା। ଏବେ ଢାକା (ବାଂଲାଦେଶ) ତାର ଜାଲରେ ଫସିଯାଇଛି। ପ୍ରାୟ ୪୦ ମିଲିୟନ ଡଲାର ମୂଲ୍ୟର ଏହି ଚୁକ୍ତି ଯଦି ଚୂକ୍ତି ହୁଏ, ତେବେ ଭାରତର ଦୁଇଟି ଯାକ ସୀମାରେ ଚୀନ ଅସ୍ତ୍ରଶସ୍ତ୍ରର ପହରା ଶକ୍ତ ହୋଇଯିବ।
ବାଂଲାଦେଶର ସେନା ପୂର୍ୱରୁ ହିଁ ବଡ଼ ଆକାରରେ ଚୀନର ଅସ୍ତ୍ରଶସ୍ତ୍ର ଉପରେ ର୍ନିଭରଶୀଳ। ଚୀନ ଧୀରେ ଧୀରେ ବାଂଲାଦେଶର ତିନୋଟି ଯାକ ସେନା (ଥଳ, ଜଳ ଓ ଆକାଶ) ଭିତରକୁ ପ୍ରବେଶ କରିସାରିଛି। ଥଳସେନା କଥା ଯଦି କହିବା, ତେବେ ବାଂଲାଦେଶର ସମ୍ପୂର୍ଣ୍ଣ ଟ୍ୟାଙ୍କ ବାହିନୀ ଚୀନ ମୂଳର ଅଟେ। ସେମାନଙ୍କ ଏୟାର ଡିଫେନ୍ସ ଏବଂ ଆର୍ଟିଲାରୀରେ ମଧ୍ୟ ଚୀନର ଉପକରଣ ଭରପୂର ରହିଛି। ନୌସେନା କ୍ଷେତ୍ରରେ ମଧ୍ୟ ବାଂଲାଦେଶ ଚୀନଠାରୁ ହିଁ ବୁଡ଼ାଜାହାଜ (ପନଡୁବ୍ୱି) ହାସଲ କରିଥିଲା।
ଏବେ ଏହି ଯୋଜନାକୁ ଆଗକୁ ବଢ଼ାଇ ବାଂଲାଦେଶୀ ବାୟୁସେନାକୁ ମଧ୍ୟ ସମ୍ପୂର୍ଣ୍ଣ ଭାବେ ଚୀନ ରଙ୍ଗରେ ରଙ୍ଗେଇବାକୁ ପ୍ରସ୍ତୁତି ଚାଲିଛି। ବାଂଲାଦେଶ ପାଖରେ ବର୍ତ୍ତମାନ ଋଷର ମିଗ-୨୧ (Mig-21)ର ଚୀନ ସଂସ୍କରଣ F-7 ଫାଇଟର୍ସ ରହିଛି, ଯାହାକୁ ସେ ବହୁ ସମୟରୁ ବଦଳାଇବାକୁ ଚେଷ୍ଟା କରୁଥିଲା। ଯଦିଓ ସେ ୟୁରୋଫାଇଟର ଭଳି ପଶ୍ଚିମା ଜ୍ଞାନକୌଶଳ ଉପରେ ମଧ୍ୟ ବିଚାର କରିଥିଲା, କିନ୍ତୁ ଚୀନ ଏଠାରେ ଏକ ନୂଆ ଚାଲ ଖେଳିଲା। ଚୀନ ବାଂଲାଦେଶକୁ କମ ମୂଲ୍ୟ ଏବଂ ସହଜ ସର୍ତ୍ତର ଅଫର ଦେଲା ଏବଂ ଶେଷରେ ପାସା ଚୀନ ସପକ୍ଷକୁ ଢଳୁଥିବା ଦେଖାଯାଉଛି।
ଯଦି ବାଂଲାଦେଶ-ଚୀନର ଏହି ଚୁକ୍ତି ଫାଇନାଲ ହୁଏ, ତେବେ ଭାରତର ପଶ୍ଚିମ ସୀମା ଅର୍ଥାତ ପାକିସ୍ତାନ ଏବଂ ପୂର୍ୱ ସୀମା ଅର୍ଥାତ ବାଂଲାଦେଶ, ଦୁଇ ପଟେ ଚୀନର ଫାଇଟର ଜେଟ ମୁତୟନ ହୋଇଯିବେ, ଅର୍ଥାତ ଚୀନର ପ୍ରବେଶ ହୋଇଯିବ। ଭାରତ ପାଇଁ ସବୁଠାରୁ ବଡ଼ ଆହୱାନ ଏହା ହେବ ଯେ ସଙ୍କଟ ସମୟରେ ଭାରତକୁ ଦୁଇ ପାଖରୁ ଆକାଶମାର୍ଗର ବିପଦର ସାମ୍ନା କରିବାକୁ ପଡ଼ିପାରେ। ଏହା ବ୍ୟତୀତ, ବାଂଲାଦେଶରେ ଚୀନର ଟେକନିସିଆନ ଏବଂ ସାମରିକ ବିଶେଷଜ୍ଞଙ୍କ ଉପସ୍ଥିତି ବଢ଼ିବ, ଯେଉଁମାନେ ଭାରତୀୟ ସୀମାର ଅତି ନିକଟରେ ରହି ଗୁପ୍ତଚର ବୃତ୍ତି ଓ ନଜର ରଖିବା କାର୍ଯ୍ୟକୁ ସହଜରେ କରିପାରିବେ।