ସମସ୍ତ ଦେଶର ଗୁପ୍ତ ତଥ୍ୟ ଉପରେ ଚାଇନାର ନଜର, ଆମେରିକା କମ୍ପାନୀରୁ ଚୋରି କରୁଛି ଡାଟା…

ଓ୍ବାଶିଂଟନ/ବେଜିଂ, ୮।୯ : ଏକବିଂଶ ଶତାବ୍ଦୀରେ ଗୁପ୍ତ ତଥ୍ୟ କୁ ସବୁଠାରୁ ବଡ ସମ୍ପତ୍ତି ବୋଲି କୁହାଯାଉଛି। ଏପରିସ୍ଥଳେ ଡାଟା ଚୋରି ନେଇ ଚାଇନା ଏବଂ ଆମେରିକା ମଧ୍ୟରେ ସମ୍ପର୍କ ଆହୁରି ଖରାପ ହେବାରେ ଲାଗିଛି। ଆମେରିକାର ଅନେକ ବିଶ୍ୱବିଦ୍ୟାଳୟର ଜେନେଟିକ ଗବେଷକ ୱାଙ୍ଗ ଜିଆଙ୍ଗ ଆଜି ଚାଇନାରେ ଅବସ୍ଥିତ ବିଶ୍ୱର ସର୍ବବୃହତ ବାୟୋଟେକ କମ୍ପାନୀ ବିଜିଆଇ ର ଚେୟାରମ୍ୟାନ। ବିଜିଆଇ ଦଶନ୍ଧି ଧରି ଆମେରିକାର କେତେକ ଅଗ୍ରଣୀ ଜେନେଟିକ ସଂସ୍ଥା ସହ କାର୍ଯ୍ୟ କରିଆସୁଛି। କିନ୍ତୁ ଯେତେବେଳେ କରୋନା ମାମଲା ବୃଦ୍ଧି ପାଇଲା, ୱାଙ୍ଗ ପରୀକ୍ଷା ପାଇଁ ଆମେରିକାରେ ଏକ ବଡ଼ ଲ୍ୟାବ ନିର୍ମାଣ କରିବାକୁ ପ୍ରସ୍ତାବ ଦେଲେ। କିନ୍ତୁ ତଥ୍ୟ ଚୋରି ଭୟରେ ତାଙ୍କ ପ୍ରସ୍ତାବ ପ୍ରତ୍ୟାଖ୍ୟାନ କରାଯାଇଥିଲା।

ନ୍ୟାଶନାଲ କାଉଣ୍ଟର ଇଣ୍ଟେଲିଜେନ୍ସ ଏବଂ ସିକ୍ୟୁରିଟି ସେଣ୍ଟର ଚେତାବନୀ ଦେଇଛି ଯେ ବିଦେଶୀ ଶକ୍ତିମାନେ କୋଭିଡ ପରୀକ୍ଷା ମାଧ୍ୟମରେ ବାୟୋମେଟ୍ରିକ ତଥ୍ୟ ସଂଗ୍ରହ କରିପାରିବାର ଆଶଙ୍କା ରହିଛି। ତତ୍କାଳୀନ ଟ୍ରମ୍ପ ପ୍ରଶାସନର ଆମେରିକାର ସର୍ବୋଚ୍ଚ କାଉଣ୍ଟର ଗୁପ୍ତଚର ଅଧିକାରୀ ବିଲ ଇଭାନିନା କହିଥିଲେ ଯେ ଆଧୁନିକ ଯୁଗରେ ଲ୍ୟାବ ହେଉଛି ଟ୍ରୋଜାନ ଘୋଡା, ଅର୍ଥାତ୍‌ ଶତ୍ରୁମାନଙ୍କ ଦ୍ୱାରା ପରିପୂର୍ଣ୍ଣ କାଠ ଘୋଡା। ଏହା ମାଧ୍ୟମରେ ଚାଇନା ସରକାର ଡିଏନଏ ସଂଗ୍ରହ ଏବଂ ତଥ୍ୟ ଚୋରି କରିବା ଲାଗି ଷଡ଼ଯନ୍ତ୍ର ରଚିଥିବା ସେ କହିଥିଲେ।

ଫେସବୁକ ଏବଂ ଗୁଗୁଲ ପରି ଆମେରିକୀୟ କମ୍ପାନୀଗୁଡିକ ବିଶ୍ୱରେ ସେମାନଙ୍କ ୟୁଜରଙ୍କ ତଥ୍ୟ ବ୍ୟବହାର କରି ବିଜ୍ଞାପନରୁ ଟଙ୍କା ରୋଜଗାର କରନ୍ତି। କିନ୍ତୁ ଅନେକ ନୀତି ନିର୍ମାତା ବିଶ୍ୱାସ କରନ୍ତି ଯେ ଏହା ଜାତୀୟ ସୁରକ୍ଷା ପ୍ରସଙ୍ଗରେ ପରିଣତ ହେଉଛି। ଏହା ସହିତ ସମଗ୍ର ବିଶ୍ୱରେ ତଥ୍ୟ ମଧ୍ୟ ବିପଦରେ ଅଛି। ଭୟ ହେଉଛି ଆମେରିକୀୟ ଲୋକଙ୍କୁ ପ୍ରଭାବିତ କରିବା ପାଇଁ ଚାଇନା କର୍ପୋରେଟ ତଥ୍ୟ ଚୋରି କରୁଛି ଏବଂ ଏହାର ପ୍ରାଧାନ୍ୟ ଉପରେ ଟେକ୍ନୋଲୋଜିର ଭବିଷ୍ୟତ ପାଇଁ ଭିତ୍ତିପ୍ରସ୍ତର ସ୍ଥାପନ କରୁଛି। ଆମେରିକାର ଅନେକ ବିଶେଷଜ୍ଞ ଗତ ମାସରେ ଚେତାବନୀ ଦେଇଛନ୍ତି ଯେ ଚାଇନା କମ୍ୟୁନିଷ୍ଟ ପାର୍ଟି ଦେଶର ତଥ୍ୟକୁ ନିୟନ୍ତ୍ରଣ କରିବାକୁ ଚାହୁଁଛି।

ଡାଟା ଚୋରିର ଭୟ ନେଇ ଆମେରିକା ଏବଂ ଏହାର ଇଣ୍ଟରନେଟରେ କାର୍ଯ୍ୟ କରୁଥିବା ଚାଇନାର କମ୍ପାନୀଗୁଡିକର ବିସ୍ତୃତ ସମୀକ୍ଷା କରିବାକୁ ରାଷ୍ଟ୍ରପତି ଜୋ ବାଇଡେନ ପ୍ରଶାସନକୁ ବିଶେଷଜ୍ଞମାନେ ପରାମର୍ଶ ଦେଇଛନ୍ତି। ଚାଇନା ଆମେରିକାର ନାଗରିକଙ୍କ ଉପରେ ଗୁପ୍ତଚରୀ କରି ଅର୍ଥନୈତିକ, ସାମରିକ ଏବଂ ବ୍ୟବସାୟିକ ସ୍ବାର୍ଥକୁ ମଧ୍ୟ କ୍ଷତି ପହଞ୍ଚାଇବାର ଆଶଙ୍କା ରହିଥିବା ସେମାନେ କହିଛନ୍ତି। ଆସନ୍ତା କିଛି ଦିନ ମଧ୍ୟରେ ଏହି ପ୍ରସଙ୍ଗରେ କଂଗ୍ରେସର ଏକ ନୂତନ ଶୁଣାଣି ଆରମ୍ଭ ହେବ ବୋଲି ଆଶା କରାଯାଉଛି। ଏଥିସହ, ବାଇଡେନ ପ୍ରଶାସନ ଏକ ଆଦେଶ ଚୂଡାନ୍ତ କରୁଛନ୍ତି ଯାହା ନ୍ୟାୟ ବିଭାଗକୁ ଚାଇନା ଭଳି ବିଦେଶୀ ଦେଶକୁ ଆମେରିକାର ଲୋକଙ୍କ ତଥ୍ୟ ଚୋରି କରିବାକୁ ରୋକିବା ପାଇଁ ନୂତନ ଶକ୍ତି ଦେବ।