ନୂଆଦିଲ୍ଲୀ, ୨୧।୧୧: ଲଦାଖକୁ ବିଶ୍ୱ ନଜରରେ ରଖି ଚାଇନା ଗୋପନରେ କେନ୍ଦ୍ରୀୟ, ସିକିମ୍ ଓ ପୂର୍ବ ସେକ୍ଟରରେ ବୃହତ୍ ସାମରିକ ଭିତ୍ତିଭୂମିର ବିକାଶ କରିବା ସହିତ ମିସାଇଲ୍ ମୁତୟନ ସ୍ଥଳଗୁଡ଼ିକର ସୁଦୃଢ଼ୀକରଣ କରିଛି। କେବଳ ସେତିକି ନୁହେଁ, ଏହା ମାନବବିହୀନ ଏରିଏଲ୍ ଯାନ ସଂଖ୍ୟା ବଢ଼ାଇଥିବାବେଳେ ତିବ୍ବତରେ ଏୟାରବେସ୍ର ସମ୍ପ୍ରସାରଣ କରିଛି।
ପୂର୍ବ ଲଦାଖର ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି) ଅଞ୍ଚଳରେ ଚାଇନା ସୈନ୍ୟ ଅନୁପ୍ରବେଶ କରି ଭାରତୀୟ ଯବାନଙ୍କ ସହ ଦୀର୍ଘଦିନ ହେଲା ମୁହାଁମୁହିଁ ସ୍ଥିତିରେ ରହିଥିବାବେଳେ ଏହାକୁ ନେଇ ଉତ୍ତେଜନା ଲାଗିରହିଛି। ପୂର୍ବ ଲଦାଖରେ ପିପୁଲ୍ସ ଲିବରେଶନ ଆର୍ମି (ପିଏଲ୍ଏ)ର ସୈନ୍ୟ ସଂଖ୍ୟା ବଢ଼ୁଥିବାରୁ ସଂଘର୍ଷ ସ୍ଥଳରେ ପୂର୍ବ ସ୍ଥିତାବସ୍ଥା ଫେରିବା ଆଶା କ୍ଷୀଣ। ଗତ କିଛିମାସ ହେଲା ପିଏଲ୍ଏ କେନ୍ଦ୍ରୀୟ ସେକ୍ଟରର କୌରିକ୍ ପାସ୍ ଅପରପାର୍ଶ୍ୱରେ ଥିବା ଚୁରୁପ୍ ଗ୍ରାମରେ ରାସ୍ତା ନିର୍ମାଣ ଜାରି ରଖିଛି। ହିମାଚଳପ୍ରଦେଶ ଓ ଉତ୍ତରାଖଣ୍ଡ ଦେଇ ଯାଇଥିବା ଏଲ୍ଏସିଠାରୁ ମାତ୍ର ୪ କିମି ଦୂରରେ ତୁନଜୁମ୍ ଲା’ଠାରେ ବେଜିଂ ନୂଆ କଣ୍ଟେନର ଗୃହ ରଖିଛି। ସେହିପରି ଡେମ୍ଚୋକ୍ ଏଲ୍ଏସିଠାରୁ ୮୨ କିଲୋମିଟର ଦୂରରେ ଥିବା ଶିକୁଆନ୍ ଗାରିସନ ଡିପୋ ଏବେ ଚାଇନା ସୈନ୍ୟ ଓ ଭାରୀ ଉପକରଣ ଗଚ୍ଛିତ ରଖିବାର କେନ୍ଦ୍ରସ୍ଥଳ ପାଲଟିଛି।
ପୂର୍ବ ସେକ୍ଟରରେ ମଧ୍ୟ ସମାନ ସ୍ଥିତି। ଅରୁଣାଚଳ ପ୍ରଦେଶ ସୀମାଠାରୁ ୬୦ କିମି ଦୂର ନ୍ୟାଙ୍ଗ୍ଲୁରେ ଥିବା ୧୯୬୨ ଯୁଦ୍ଧ ସମୟର ପିଏଲ୍ଏ କ୍ୟାମ୍ପ୍ରେ ଚାଇନା ଇଲେକ୍ଟ୍ରୋନିକ୍ ଯୁଦ୍ଧାସ୍ତ୍ର ମୁତୟନ କରିଛି। ସେଠାରେ ୪ଟି କାଉଣ୍ଟର ସ୍ପେସ୍ ଜାମର ରହିଛି, ଯାହା ଉକ୍ତ ଅଞ୍ଚଳକୁ ଭାରତର ଜିସାଟ୍ ଓ ଅନ୍ୟ ବ୍ୟବସାୟିକ ସାଟେଲାଇଟ୍ର ଦୃଷ୍ଟି ଆଢ଼ୁଆଳରେ ରଖିଛି। ୟେବିରେ ଚାଇନା ପୁଣିଥରେ ସୈନ୍ୟ ନିୟୋଜିତ କରିବା ସହ ବୁମ୍ ଲା’ରେ ସର୍ଭିଲାନ୍ସ ବଢ଼ାଇଛି। ଚାଙ୍ଗମୁରେ ଯୋଗାଯୋଗ ଟାଓ୍ବାର ସ୍ଥାପନ ସହ ୩,୪୮୮ କିଲୋମିଟର ଦୀର୍ଘ ଏଲ୍ଏସିରେ ଚାଇନା ଏହାର ଗୋଇନ୍ଦା କାର୍ଯ୍ୟକୁ ବଢ଼ାଇଦେଇଛି। ଏଲ୍ଏସିର ପଶ୍ଚିମ ସେକ୍ଟରଠାରୁ ୪୭୫ କିଲୋମିଟର ଦୂର କଶଗର ଏୟାରବେସ୍ରେ ଭୂପୃଷ୍ଠରୁ ଆକାଶକୁ ନିକ୍ଷେପ କରାଯାଉଥିବା କ୍ଷେପଣାସ୍ତ୍ର ମୁତୟନ ଥିବାବେଳେ ସେଠାରେ ନୂଆ ଟ୍ରାନ୍ସପୋର୍ଟର ଇରେକ୍ଟର ଲଞ୍ଚର ସ୍ଥାପନ କରାଯାଇଛି। କଶଗର ଓ ହୋଟନ ବେସ୍ରେ ବୃହତ୍ ପରିବହନ ବିମାନ ରଖାଯାଇଥିବା ଜଣେ ଭାରତୀୟ ସେନା କମାଣ୍ଡର ସୂଚନା ଦେଇଛନ୍ତି।
