ନୂଆଦିଲ୍ଲୀ, ୨୭ା୫: ସୀମା ବିବାଦକୁ ନେଇ ଭାରତ ସହ ଦୀର୍ଘଦିନ ମୁହାଁମୁହିଁ ସ୍ଥିତି ଲାଗିରହିବା ପରେ ଚାଇନା ଏବେ ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି)ଠାରୁ ୧୧ କିଲୋମିଟର ଭିତରକୁ ଅର୍ଥାତ୍ ଉତ୍ତରାଖଣ୍ଡ ନିକଟରେ ସୀମା ପ୍ରତିରକ୍ଷା ଗ୍ରାମ ନିର୍ମାଣ କରୁଛି। ଏହି ଗ୍ରାମରେ ୨୫୦ ଘର ରହିଛି। ସେହିପରି ଏଲ୍ଏସିଠାରୁ ୩୫ କିଲୋମିଟର ଦୂର ଉତ୍ତରାଖଣ୍ଡରେ ବେଜିଂ ଆଉ ୫୫-୫୬ ଘର ନିର୍ମାଣ କରୁଥିବା ଏକ ସୂତ୍ରରୁ ଜଣାପଡ଼ିଛି। ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ତତ୍ତ୍ୱାବଧାନରେ ଏହିସବୁ ନିର୍ମାଣ କାର୍ଯ୍ୟ ଚାଲିଛି। ସୀମାନ୍ତ ପୂର୍ବାଞ୍ଚଳ ସେକ୍ଟରରେ ମୋଟ ୪୦୦ ଗ୍ରାମ ନିର୍ମାଣ କରିବା ପାଇଁ ଚାଇନା ଯୋଜନା କରିଛି। ଚାଇନାକୁ ଲାଗି ଉତ୍ତରାଖଣ୍ଡର ୩୫୦ କିଲୋମିଟର ସୀମା ରହିଛି। ଅଧିକାଂଶ ସୀମାନ୍ତ ଗ୍ରାମର ଲୋକେ ଜୀବିକା ଅନ୍ବେଷଣରେ ବାହାରକୁ ଯାଇଥାନ୍ତି। ଚାଇନା ନିର୍ମାଣ କରୁଥିବା ଗ୍ରାମଗୁଡ଼ିକ ବଡ଼ ବଡ଼ କମ୍ପ୍ଲେକ୍ସ, ଯେଉଁଥିରେ ବିଭିନ୍ନ ସୁବିଧା ରହିଛି।
ଉତ୍ତରାଖଣ୍ଡର ଘାଟ୍ରଆବଗାର-ଲିପୁଲେଖ ରାସ୍ତାର ବୁନ୍ଦି ଏବଂ ଗାର୍ବିୟାଙ୍ଗ ମଝିରେ ୬ କିଲୋମିଟର ଟନେଲ ନିର୍ମାଣ କରାଯିବ ବୋଲି ଜଣେ ବରିଷ୍ଠ ବିଆର୍ଓ ଅଧିକାରୀ କହିଛନ୍ତି। ଏହା ଦ୍ୱାରା ଭାରତ-ଚାଇନା ସୀମାର ଲିପୁଲେଖ୍ ଗିରିପଥର ଶେଷ ସୀମାନ୍ତ ଘାଟିରେ ପହଞ୍ଚତ୍ବା ସହଜ ହୋଇପାରିବ। ଟନେଲ ନିର୍ମାଣ ପାଇଁ ଆଟିନକ୍ ଇଣ୍ଡିଆ କନ୍ସଲ୍ଟାଣ୍ଟସ୍ ସର୍ଭେ କାର୍ଯ୍ୟ ଚଳାଇଛି। ଭୁଟାନ୍ର ଆମୋ ଚୁ ନଦୀ ଉପତ୍ୟକାରେ ଚାଇନା ବ୍ୟାପକ ନିର୍ମାଣ କାର୍ଯ୍ୟ ଚଳାଇଥିବାରୁ ଗତମାସରେ ଭାରତୀୟ ସେନା ଗମ୍ଭୀର ଚିନ୍ତା ପ୍ରକଟ କରିଥିଲା। ଆମୋ ଚୁରେ ପିଏଲ୍ଏ ଏହାର ସୈନ୍ୟମାନଙ୍କ ପାଇଁ ସ୍ଥାୟୀ ବାସସ୍ଥଳୀ ଏବଂ ଯୋଗାଯୋଗ ଟାଓ୍ବାର ନିର୍ମାଣ କରୁଥିବାର ଚିତ୍ର ଭାରତୀୟ ଗଣମାଧ୍ୟମର ହସ୍ତଗତ ହୋଇଥିଲା। ଏହି ଅଞ୍ଚଳ ଡୋକଲାମ୍ ନିକଟବର୍ତ୍ତୀ। ସେଠାରେ ଚାଇନା ସୈନ୍ୟଙ୍କ ପାଇଁ ପାଖାପାଖି ୧,୦୦୦ ସ୍ଥାୟୀ ଘର ସାଙ୍ଗକୁ ଅନେକ ଅସ୍ଥାୟୀ ସେଡ୍ ମଧ୍ୟ ନିର୍ମାଣ କରାଯାଇଛି।
