ଥିରୁଭାନନ୍ତପୁରମ୍,୨୫।୭ : କେରଳ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି। କୋର୍ଟ କହିଛନ୍ତି ଯେ କୌଣସି ସନ୍ତାନଙ୍କର ତାଙ୍କ ଆବଶ୍ୟକୀୟ ପ୍ରମାଣପତ୍ରରେ ପିତାଙ୍କ ନାମ ଉଲ୍ଲେଖ ନ କରିବାର ଅଧିକାର ରହିଛି ଏବଂ ସେ କେବଳ ତାଙ୍କ ମାତାଙ୍କ ନାମ ଲେଖିପାରିବେ।
ଅବିବାହିତା ମା ଏବଂ ବଳାତ୍କାର ପୀଡିତାର ପିଲାମାନେ ସମ୍ମୁଖୀନ ହେଉଥିବା ସମସ୍ୟାକୁ ଦୃଷ୍ଟିରେ ରଖି କୋର୍ଟ ଏହି ନିର୍ଦ୍ଦେଶ ଦେଇଛନ୍ତି। ଏକ ପିଟିଶନରେ କୋର୍ଟ ଏହା ମଧ୍ୟ ନିର୍ଦ୍ଦେଶ ଦେଇଛନ୍ତି ଯେ ଆବେଦନକାରୀଙ୍କ ମାତାପିତା ଭାବରେ କେବଳ ମାତାଙ୍କ ନାମ ପ୍ରମାଣପତ୍ରରେ ଉଲ୍ଲେଖ କରାଯିବ।
ଜଣେ ଅବିବାହିତା ମହିଳାଙ୍କ ଦ୍ୱାରା ଦାଖଲ ହୋଇଥିବା ପିଟିଶନ ମାମଲାରେ କୋର୍ଟ ଏହି ରାୟ ଦେଇଛନ୍ତି। କୌଣସି ଅବିବାହିତା ମା’ଙ୍କ କ୍ଷେତ୍ରରେ ତାଙ୍କ ପିଲାମାନଙ୍କୁ ସେମାନଙ୍କର ସମସ୍ତ ପରିଚୟପତ୍ରରେ କେବଳ ମାତାଙ୍କ ନାମ ବ୍ୟବହାର କରିବାକୁ ଅନୁମତି ଦିଆଯାଇଛି।
ଅଦାଲତ କହିଛନ୍ତି ଯେ ଅବିବାହିତା ମା’ଙ୍କର ସନ୍ତାନ ମଧ୍ୟ ଆମ ଦେଶର ନାଗରିକ ଏବଂ ତାଙ୍କର କୌଣସି ମୌଳିକ ଅଧିକାରକୁ କେହି ଉଲ୍ଲଂଘନ କରିପାରିବେ ନାହିଁ। ଏହି ମନ୍ତବ୍ୟ ଆମ ସମ୍ବିଧାନରେ ନିଶ୍ଚିତ ହୋଇଛି ବୋଲି କୋର୍ଟ କହିଛନ୍ତି।
କୌଣସି କର୍ତ୍ତୃପକ୍ଷ ତାଙ୍କର ଗୋପନୀୟତା, ସମ୍ମାନ ଏବଂ ସୱାଧୀନତା ଅଧିକାରକୁ ଅଟକାଇ ପାରିବେ ନାହିଁ । ଯଦି ଏହା ଘଟେ ତେବେ କୋର୍ଟ ସେମାନଙ୍କର ଅଧିକାରୀ ସୁରକ୍ଷା କରିବେ। ଶୁଣାଣି ସମୟରେ ଜଷ୍ଟିସ କୁହ୍ନିକ୍ରିଷ୍ଣନ ମହାଭାରତର କର୍ଣ୍ଣଙ୍କ ବିଷୟରେ କହିଛନ୍ତି ଯେ ଆମେ ଏପରି ଏକ ସମାଜ ଚାହୁଁଛୁ ଯେଉଁଠାରେ କର୍ଣ୍ଣ ନଥିବେ।
ଏଥିସହ କୋର୍ଟ ସାଧାରଣ ଶିକ୍ଷା ବିଭାଗ, ଉଚ୍ଚ ମାଧ୍ୟମିକ ପରୀକ୍ଷା ବୋର୍ଡ, ୟୁନିକ ଆଇଡେଣ୍ଟିଫିକେସନ ଅଥରିଟି ଅଫ ଇଣ୍ଡିଆ, ଆୟକର ବିଭାଗ, ପାସପୋର୍ଟ ଅଧିକାରୀ, ଭାରତର ନିର୍ବାଚନ ଆୟୋଗ ଏବଂ ରାଜ୍ୟ ନିର୍ବାଚନ ଆୟୋଗଙ୍କୁ ଆବେଦନକାରୀଙ୍କ ପିତାଙ୍କ ନାମ ଅଫିସିଆଲ ରେକର୍ଡ ଏବଂ ଡାଟାବେସରୁ ହଟାଇବାକୁ ନିର୍ଦ୍ଦେଶ ଦେଇଛନ୍ତି।
