ଟିକିରି,୨୭ା୬: ପୁଣି ଜନନୀ ଯନ୍ତ୍ରଣା। ଗର୍ଭବତୀଙ୍କୁ ଚଲାଇ ଚଲାଇ ନେବା ସମୟରେ ରାସ୍ତାରେ ପ୍ରସବ କରିଛନ୍ତି। ରାୟଗଡ଼ା ଜିଲା କାଶୀପୁର ବ୍ଲକ୍ କୋଡ଼ିପାରି ପଞ୍ଚାୟତ ଅନ୍ତର୍ଗତ ଭେଜାପଦର ଗ୍ରାମରୁ ଆସିଛି ଏପରି ଖବର। ଗାଁକୁ ଭଲ ରାସ୍ତାଟିଏ ନ ଥିବାରୁ ଆମ୍ବୁଲାନ୍ସ ଯାଇପାରୁନି। ଶନିବାର ଗାଁର ତୁଳାରାମ ନାୟକଙ୍କ ସ୍ତ୍ରୀ ମୋନାଲି ଗର୍ଭଯନ୍ତ୍ରଣା ଅନୁଭବ କରିବାରୁ ୧୦୮ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। ହେଲେ ରାସ୍ତା ଖରାପ ଯୋଗୁ ଗାଡ଼ି ଆସି ସିଲାଫାସ ଗ୍ରାମରେ ଅଟକିଥିଲା। ପରିବାର ଲୋକେ ମୋନାଲିଙ୍କୁ ଚଲାଇ ଚଲାଇ ୩ କି.ମି. ବାଟ ନେଇଥିବାବେଳେ କାଲିଆଚଚରା ଗ୍ରାମ ନିକଟରେ ସେ ପ୍ରସବ କରିଥିବା ଜଣାପଡ଼ିଛି। ଖବର ପାଇ ୧୦୮ କର୍ମଚାରୀ ପହଞ୍ଚି ଷ୍ଟ୍ରେଚର ସାହାଯ୍ୟରେ ଗର୍ଭବତୀଙ୍କୁ ଆମ୍ବୁଲାନ୍ସ ପର୍ଯ୍ୟନ୍ତ ନେଇଥିଲେ। ତାଙ୍କୁ ଟିକିରି ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା କରାଯାଉଥିବାବେଳେ ମା’ ଓ ଶିଶୁ ସୁସ୍ଥ ଥିବା ଜଣାପଡ଼ିଛି। ତେବେ ଆବଶ୍ୟକ ସ୍ଥଳେ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯିବ ବୋଲି ମେଡିକାଲ ଅଫିସର ଅନୀଲ ବେହେରା କହିଛନ୍ତି।
